តារាប្រណាំងរថយន្ត Michael Schumacher គ្រោះថ្នាក់ស្គី របួសក្បាលធ្ងន់ធ្ងរ មានស្ថានភាពធូរបន្តិច
កីឡាករប្រណាំងរថយន្ត Formula One ដ៏ល្បីរបស់អាល្លឺម៉ង់ Michael Schumacher មីខាអែល ស្ហ៊ូម៉ារើ កំពុងទទួលការព្យាបាល នៅមន្ទីរពេទ្យក្រុងក្រឺណូប Gernoble ប្រទេសបារាំង នៅថ្ងៃអង្គារនេះ បន្ទាប់ពីលោកបានរងគ្រោះថ្នាក់ស្គី កាលពីថ្ងៃអាទិត្យចុងសប្តាហ៍មុន ប៉ះទង្គិចក្បាលធ្ងន់ធ្ងរ។ នៅយប់ថ្ងៃចន្ទម្សិលមិញ ក្រុមគ្រូពេទ្យបារាំងបានវះកាត់លោកជាលើកទី២ ហើយនៅថ្ងៃអង្គារនេះ ស្ថានភាពលោករាងធូរជាងថ្ងៃចន្ទបន្តិច។ ប៉ុន្តែ លោកមិនទាន់រួចផុតពីគ្រោះថ្នាក់នៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
គួររំលឹកថា កាលពីថ្ងៃអាទិត្យ ពេលកំពុងលេងស្គី ជាមួយកូនប្រុសរបស់គាត់ នៅតំបន់សាវ័រ ភាគខាងត្បូងប្រទេសបារាំង លោក មីខាអែល ស្ហ៊ូម៉ារើ ជាតារាប្រណាំងរថយន្តអាល្លឺម៉ង់ Formula ១ ដ៏ល្បីក្នុងពិភពលោក បានរងគ្រោះថ្នាក់ ដោយបានដួលធ្លាក់ ហើយក្បាលរបស់គាត់ប៉ះទង្គិចខ្លាំង រហូតធ្វើអោយគាត់សន្លប់បាត់ស្មារតី។
លោក ស្ហ៊ូម៉ារើ កំពុងទទួលការព្យាបាលពីក្រុមគ្រូពេទ្យបារាំង នៅមន្ទីរពេទ្យក្រុងក្រឺណូប។ នៅយប់ថ្ងៃចន្ទម្សិលមិញនេះ ដោយស្ថានភាពរបស់លោករាងធូរបន្តិច ក្រុមគ្រូពេទ្យបានវះកាត់លោកជាលើកទី២។ ហើយនៅថ្ងៃអង្គារនេះ ស្ថានភាពលោកបានធូរជាងថ្ងៃចន្ទម្សិលមិញបន្តិច។ ទោះយ៉ាងនេះក្តី ក្រុមគ្រូពេទ្យបានប្រាប់ថា កីឡាករអាល្លឺម៉ង់រូបនេះ នៅមិនទាន់ចេញផុតពីស្ថានភាពគ្រោះថ្នាក់នៅឡើយទេ។
គួរបញ្ជាក់ថា ក្រោយពេលរងគ្រោះថ្នាក់ស្គីភ្លាមៗ លោកស្ហ៊ូម៉ារើ នៅអាចកំរើកអវៈយវៈបាន ប៉ុន្តែ លោកមិនបានឆ្លើយសំណួរដែលគេសួរនោះទេ។ បន្តិចក្រោយមក ស្ថានភាពរបួសបានប្រែធ្ងន់ធ្ងរ ធ្វើអោយលោកសន្លប់បាត់ស្មារតី។ អាជ្ញាធរបារាំងកំពុងបើកការស៊ើបអង្កេតពីស្ថានភាព និងមូលហេតុដែលនាំអោយតារាប្រណាំងរថយន្តអាល្លឺម៉ង់រូបនេះ រងគ្រោះថ្នាក់ធ្ងន់ធ្ងរ។ យោងតាម ក្រុមអ្នកស៊ើបអង្កេត គ្រោះថ្នាក់នេះ បានកើតឡើង នៅតំបន់ដែលមិនមែនជាផ្លូវប្រើសំរាប់ជិះស្គី។ ទីនោះគ្របដណ្តប់ទៅដោយទឹកកក និងសំបូរដោយថ្មជាច្រើន។
ជនជាតិអាល្លឺម៉ង់ មីខាអែល ស្ហ៊ូម៉ារើ ជាតារាប្រណាំងរថយន្ត Formula ១ ដ៏ល្បីក្នុងពិភពលោក នឹងមានអាយុ៤៥ឆ្នាំ នៅថ្ងៃ៣មករា ឆ្នាំថ្មី២០១៤ នេះ។ ស្ហ៊ូម៉ារើ ធ្លាប់ជាម្ចាស់ពានរង្វាន់ពិភពលោក ៧ដង ចន្លោះឆ្នាំ១៩៩៤ និង២០០៤។ លោកក៏ជាម្ចាស់ពានរង្វាន់ជោគជ័យចំនួន៩១ ផ្សេងទៀតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ