ឱកាសទទួលអាហារូបករណ៍សម្រាប់ការសិក្សានៅបរទេសបើកចំហរចំពោះនិស្សិតកម្ពុជា
ក្រសួងអប់រំប្រកាសឱ្យដឹងអំពីការផ្តល់អាហារូបករណ៍សម្រាប់ការសិក្សា នៅក្រៅប្រទេស ជាបន្តបន្ទាប់។ នេះជាឱកាស ដែលបើកទ្វារចំហរសម្រាប់និស្សិតកម្ពុជា ដែលមានបំណងទៅរៀននៅប្រទេសរុស្ស៊ី តួកគី នូវែលហ្សេឡង់ គុយបា និងថៃជាដើម ក្នុងឆ្នាំសិក្សា២០១៤-២០១៥។ ក្រៅពីនេះ អាហារូបករណ៍រយៈពេលខ្លី នៅប្រទេសហ្វាំងឡង់ ក៏មានដែរ។ ការផ្តល់អាហារូបករណ៍សម្រាប់និស្សិតកម្ពុជា ដោយបណ្តាប្រទេសជាមិត្ត ត្រូវបានគេចាត់ទុកថា ជាការរួមចំណែកអភិវឌ្ឍន៍ធនធានមនុស្សរបស់ប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
បច្ចុប្បន្ន អាហារូបករណ៍សម្រាប់ការសិក្សានៅក្រៅប្រទេស ទាំងរយៈពេលខ្លី ទាំងរយៈពេលវែង បានបើកចំហរចំពោះនិស្សិតកម្ពុជា គួរឱ្យកត់សម្គាល់។ យ៉ាងណាមិញ ថ្មីៗនេះ ក្រសួងអប់រំ យុវជន និងកីឡា បានប្រកាសឱ្យដឹង ជាបន្តបន្ទាប់ អំពីការផ្តល់អាហារូបករណ៍សម្រាប់និស្សិតកម្ពុជាណា ដែលមានបំណងទៅរៀនឯបរទេស ក្នុងឆ្នាំសិក្សា២០១៤-២០១៥។
យោងតាមវ៉េបសាយរបស់ក្រសួងអប់រំ ប្រទេសជាមិត្តរបស់កម្ពុជាជាច្រើន កំពុងផ្តល់អាហារូបករណ៍ឱ្យនិស្សិតកម្ពុជា។ ក្នុងចំណោមនោះ អាហារូបករណ៍រយៈពេលវែង ដែលនៅអាចដាក់ពាក្យសុំបានគឺនៅប្រទេសថៃ ប្រទេសនូវែលហ្ស៊េឡង់ ប្រទេសរុស្ស៊ី និងប្រទេសទួរគី ដែលមានកម្រិតចាប់ពីបរិញ្ញាប័ត្រឡើងទៅ ជាច្រើនមុខវិជ្ជា។ ជាធម្មតា ប្រទេសជាមិត្តរបស់កម្ពុជារ៉ាប់រងចំពោះថ្លៃសិក្សា ការចំណាយក្នុងការរស់នៅ ថ្លៃធ្វើដំណើរ និងការធានារ៉ាប់រងសុខភាពជាដើម។
ក្រៅពីអាហារូបករណ៍រយៈពេលវែង ក៏មានដែរអាហារូបករណ៍រយៈពេលខ្លី ដែលផ្តល់ដោយអង្គការ ស្ថាប័ន នៃប្រទេសជាមិត្តរបស់កម្ពុជាដ៏ទៅទៀតដែរ។ ជាក់ស្តែង ទីភ្នាក់ងារសារព័ត៌មានកម្ពុជារាយការណ៍ឱ្យដឹងនៅថ្ងៃនេះថា អាហារូបករណ៍រយៈពេលបីថ្ងៃ ពោលគឺចាប់ពីថ្ងៃទី១២ ដល់ទី១៥ ខែកញ្ញា ឆ្នាំ២០១៤ខាងមុខ នៅប្រទេសហ្វាំងឡង់ ត្រូវបានប្រកាស។
បើតាម អាកាប៉េ នោះគឺជាអាហារូបករណ៍សម្រាប់ចូលរូមក្នុង«សិក្ខាសាលាយុវជនអន្តរជាតិ ស្តីពីការអភិវឌ្ឍភាពជាអ្នកដឹកនាំ និងសហគ្រិនភាព» ដែលរៀបចំដោយ«បណ្តាញមេដឹកនាំ និងសហគ្រិនវ័យក្មេងពិភពលោក» ហៅកាត់ជាភាសាអង់គ្លេសថា WNYLE។ ក្រោយពិធីបុណ្យចូលឆ្នាំខ្មែរ និស្សិតអាចពិចារណាពង្រីកចំណេះដឹង និងបទពិសោធរបស់ខ្លួន តាមរយៈឱកាសទាំងនេះហើយ។
សូមបញ្ជាក់ថា របាយការណ៍ក្រសួងអប់រំ យុវជន និងកីឡាចង្អុលប្រាប់ថា កាលពីឆ្នាំ២០១២-២០១៣ និស្សិតកម្ពុជាជិត៥០០នាក់បានទទួលអាហារូបករណ៍ឱ្យទៅសិក្សានៅបរទេស ក្នុងនោះ ជិតមួយភាគបួនគឺជាស្រី ហើយនៅឆ្នាំនោះដដែល និស្សិតអាហារូបករណ៍កម្ពុជា ដែលបានសិក្សានៅក្រៅប្រទេស មានទាំងអស់២៦២៤នាក់ ស្រី៥៥៥នាក់។
ការប្រកាសផ្តល់អាហារូបករណ៍ជាបន្តបន្ទាប់ ដោយអង្គការ ស្ថាប័ននៃបណ្តាប្រទេសជាមិត្តរបស់កម្ពុជា ដើម្បីផ្តល់ឱកាសឱ្យនិស្សិតខ្មែរ បានទៅសិក្សានៅបរទេសនេះ ត្រូវបានរដ្ឋាភិបាលកម្ពុជាចាត់ទុកថា ជាការរួមចំណែកដ៏មានសារសំខាន់ ក្នុងការអភិវឌ្ឍធនធានមនុស្សរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ