រដ្ឋាភិបាលសម្រេចដកហូតដីសម្បទានពីក្រុមហ៊ុន៨ និងកាត់បន្ថយរយៈពេលផ្តល់ដីសម្បទានសេដ្ឋកិច្ច
លោក សាយ សំអាល់ រដ្ឋមន្ត្រីក្រសួងបរិស្ថាន នៅរសៀលថ្ងៃចន្ទទី២៩កញ្ញានេះ បាន ប្រកាសថា រដ្ឋាភិបាលកម្ពុជា បានសម្រេចលុបចោលកិច្ចសន្យាវិនិយោគនិងដកហូតយកដីសម្បទានសេដ្ឋកិច្ច ពីក្រុមហ៊ុនឯកជនចំនួន៨ មកស្ថិតនៅក្រោមការគ្រប់គ្រងរបស់ខ្លួនវិញ។ លោករដ្ឋមន្ត្រី ក៍បានប្រកាស ពីការកាត់បន្ថយរយៈពេលនៃការផ្តល់ដីសម្បទានសេដ្ឋកិច្ច ពីរយៈពេល៩៩ឆ្នាំ មកនៅត្រឹម៥០វិញផងដែរ សំរាប់ក្រុមហ៊ុនដែលទទួលបានគោលការណ៍ហើយ តែមិនទាន់ចុះកិច្ចព្រមព្រៀង។
ចុះផ្សាយនៅថ្ងៃ៖
ស្តាប់ - ០២:១៩
មូលហេតុនៃការសម្រេចដកហូតយកដីសម្បទានសេដ្ឋកិច្ចពីក្រុមហ៊ុនឯកជនទាំង៨ គឺដោយសារតែក្រុមហ៊ុនទាំង៨នោះ មិនបានធ្វើសកម្មភាពអភិវឌ្ឍន៍អ្វីទាល់តែសោះ។ សូម្បីតែអាស័យដ្ឋានទាក់ទងក្រុមហ៊ុន ក៍ស្ទើតែពិបាកនឹងទាក់ទងផងដែរ។ នេះបើតាមការថ្លែងបញ្ជាក់ពីលោក សាយ សំអាល់ រដ្ឋមន្ត្រីក្រសួងបរិស្ថាន នៅក្នុងសន្និសីទកាសែតមួយ កាលពីរសៀលថ្ងៃចន្ទទី២៩កញ្ញានេះ។ ក្រុមហ៊ុនទាំង៨នោះរួមមាន ក្រុមហ៊ុនវិមានសិលាខូអ៊ិលធីឌី, ក្រុមហ៊ុនសៀងហេង១, ក្រុមហ៊ុនសៀងហេង២, ក្រុមហ៊ុនប្លូម៉េតត្រូ, ក្រុមហ៊ុនហេងប៉ុណ្ណាត, ក្រុមហ៊ុនសាំងវឌ្ឍនៈ, ក្រុមហ៊ុនចាន់រ៉ាត់ និងក្រុមហ៊ុនឋានសួគ៌ចំកាត់ជាដើម។ ក្រុមហ៊ុនទាំងនេះ ដែលបានទទួលដីសម្បទានសេដ្ឋកិច្ចពីរដ្ឋាភិបាល ដើម្បីអភិវឌ្ឍន៍ជាតំបន់ទេសចរណ៍ នៅតំបន់ឧទ្យានជាតិរាមខេត្តព្រះសីហនុ ឧទ្យានជាតិបុទមសាគខេត្តកោះកុង និងឧទ្យានជាតិកុសមៈគីរីរម្យ ចន្លោះពី៣៥០ហិចតា ទៅ៩ពាន់ហិចតា។ លោករដ្ឋមន្ត្រីបានពន្យល់ថា ការសម្រេចលុបចោលគម្រោងទាំងនេះ មិនមែនចេះតែធ្វើនោះទេ តែក្រសួងបានដាស់តឿន និងសិក្សាវាយតម្លៃអស់រយៈពេលជាង១ឆ្នាំមកហើយ ក្នុងបំណងអោយក្រុមហ៊ុនទាំងនោះធ្វើសកម្មភាព ប៉ុន្តែនៅតែគ្មានលទ្ធផល។ អញ្ចឹងហើយបានជារដ្ឋាភិបាលកម្ពុជា តាមរយៈអនុក្រឹត្យចុះថ្ងៃទី២៦កញ្ញា បានសម្រេចលុបចោលគម្រោងវិនិយោគរបស់ក្រុមហ៊ុនទាំង៨ ទៅតាមសំណើររបស់ក្រសួងបរិស្ថាន និង ក្រសួងកសិកម្ម។
នេះគឺជាលើកទីមួយហើយ ដែលរដ្ឋភិបាលបានសម្រេចដកហូតយកដីសម្បទានសេដ្ឋកិច្ចពីក្រុមហ៊ុនឯកជនទាំងនេះ ដើម្បីឆ្លើយតបទៅនឹងការអនុវត្តគោលនយោបាយរបស់រដ្ឋាភិបាលកម្ពុជាអាណត្តិទី។ ជាមួយគ្នានេះ លោករដ្ឋមន្ត្រី ក៍បានប្រកាសពីការកាត់បន្ថយរយៈពេលនៃការផ្តល់ដីសម្បទានសេដ្ឋកិច្ចពីរយៈពេល៩៩ឆ្នាំ មកនៅត្រឹមតែ៥០វិញផងដែរ ចំពោះក្រុមហ៊ុនណាដែលទទួលបានគោលការណ៍អភិវឌ្ឍន៍រួចហើយ តែមិនទាន់បានចុះកិច្ចព្រមព្រៀង។
លោក ឡាត់ គី ប្រធានផ្នែកដីធ្លីនៃអង្គការអាដហុក បានស្វាគមន៍ចំពោះសេចក្តីសម្រេចនេះ តែលោកបានបង្ហាញការខកចិត្តបន្តិចថា វាហាក់យឺតពេលទៅហើយ។
សូមបញ្ជាក់ថា ដីដែលរដ្ឋាភិបាលបានសម្រេចដកហូតពីក្រុមហ៊ុនទាំង៨នេះសរុបមានចំនួនជាង១ម៉ឺន២ពាន់ហិកតា នឹងត្រូវដាក់ជាតំបន់សម្រាប់អភិរក្ស ស្ថិតក្រោមការគ្រប់គ្រងរបស់ក្រសួងបរិស្ថាន។ ហើយបើតាមការបញ្ជាក់ពីលោករដ្ឋមន្ត្រី ដីទាំងនោះ មិនទាន់មានការកាប់ព្រៃឈើនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ