សហជីពស្នើអោយដកតំណែងអាជ្ញាធរមូលដ្ឋានក្នុងរឿងបាញ់កម្មករ នៅខេត្តស្វាយរៀង
ប៉ូលិសនៅមិនទាន់រកឃើញជនសង្ស័យដែលបានបាញ់រះលើកម្មការិនីជាបាតុករដែលតវ៉ានៅក្នុងតំបន់សេដ្ឋកិច្ចពិសេសបាវិត កាលពីសប្តាហ៍មុននៅឡើយទេ។ ទន្ទឹមពេលជាមួយគ្នានេះ សហភាពសហជីពកម្ពុជាបានផ្ញើលិខិត២ច្បាប់ទៅរដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងការងារដើម្បីស្នើអោយថ្នាក់ដឹកនាំក្រសួងទាំងពីរបញ្ចប់ដំណែងប្រធានស្ថាប័ននៅថ្នាក់ខេត្តដែលពាក់ព័ន្ធបញ្ហាកម្មករនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៤
រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស ខេងបានអះអាងប្រាប់អ្នកកាសែត នៅព្រឹកថ្ងៃចន្ទនេះថា សមត្ថកិច្ចនៅមិនទាន់ចាប់ខ្លួនជនដៃដល់ដែលប្រើកាំភ្លើងបាញ់លើកម្មការិនី៣នាក់ ក្នុងពេលកន្លងមកនោះបាននៅឡើយទេ។ មួយថ្ងៃក្រោយបាញ់ប្រហារទៅលើក្រុមកម្មករ កាលពីដើមសប្តាហ៍មុន លោករដ្ឋមន្ត្រីធ្លាប់បានថ្លែងជាសាធារណៈរួចហើយថា ខ្មាន់កាំភ្លើងត្រូវបានស្គាល់អត្តសញ្ញាណហើយ។
ការចាប់ខ្លួនជនដៃដល់មកផ្តន្ទាទោសគឺជារឿងមួយ។ ប៉ុន្តែថា មិនមែនចាប់បានជនដៃដល់ហើយ រដ្ឋាភិបាលគ្មានទណ្ឌកម្មដាក់មន្ត្រីរបស់ខ្លួននោះទេ។ លោករ៉ុង ឈុនប្រធានសហភាពសហជីពកម្ពុជាគឺជាអ្នកទាមទារអោយមានទណ្ឌកម្មនេះ។ នៅក្នុងលិខិតពីរផ្សេងគ្នាផ្ញើទៅរដ្ឋមន្ត្រីក្រសួងមហាផ្ទៃលោក ស ខេង និងរដ្ឋមន្ត្រីក្រសួងការងារលោក វង សូត្រ ប្រធានសហភាពសហជីពកម្ពុជាបានស្នើអោយថ្នាក់ដឹកនាំនៃក្រសួងទាំងពីរដកតំណែងស្នងការខេត្តស្វាយរៀង មេបញ្ជាការកងរាជអាវុធហត្ថខេត្ត និងប្រធានមន្ទីរការងារខេត្តស្វាយរៀង។ ចំពោះប្រធានសហជីព ការចាត់វិធានការរដ្ឋបាលចំពោះមន្ត្រីមានសមត្ថកិច្ចបែបនេះគឺជាការបង្ហាញការទទួលខុសត្រូវរបស់រដ្ឋាភិបាលចំពោះវិនិយោគិន និងចំពោះការគោរពសិទ្ធិមនុស្សនៅកម្ពុជាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ