សហរដ្ឋអាមេរិក -

អត្ថបទចុះផ្សាយនៅថ្ងៃ ពុធ 31 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 31 តុលា 2012

Sandy ក្លាយជាវិញ្ញាសាចុងក្រោយ មុនការបោះឆ្នោតប្រធានាធិបតីមកដល់

លោកបារ៉ាក់ អូបាម៉ាថ្លែងទៅកាន់ជនរងគ្រោះដោយខ្យល់ព្យុះ Sandy ក្នុងដំណើរទៅកាន់ទីស្នាក់ការកាកបាទក្រហម

REUTERS/Larry Downing

ដោយ លាង ដឺលុច

ខ្យល់ព្យុះសង្ឃរា Sandy បានរារាំងគម្រោងឃោសនាបោះឆ្នោតរបស់បេក្ខជនប្រធានាធិបតីទាំងពីររបស់អាមេរិកនៅក្នុងតំបន់ខ្លះមែន ប៉ុន្តែបេក្ខជនទាំងពីរមិនបាននៅស្ងៀមឡើយ ហើយបានប្រែក្លាយគ្រោះធម្មជាតិដ៏មហន្តរាយនេះទៅជាវិញ្ញាសាមួយថ្មីនៅក្នុងការបោះឆ្នោត។ លោកបារ៉ាក់ អូបាម៉ា និងលោកមីត រូមនីបានចាប់ផ្តើមជួបអ្នករងគ្រោះ និងបង្ហាញសម្មានចិត្តចំពោះពួកគេ។ លោកប្រធានាធិបតីអូបាម៉ាបានប្រកាសដាក់ក្រុងញូយ៉ក និងរដ្ឋ New Jersey ស្ថិតក្នុងស្ថានភាពគ្រោះមហន្តរាយ។ យ៉ាងហោចណាស់ មានមនុស្ស ៣០នាក់បានស្លាប់ និងតម្លៃនៃការខូចខាតត្រូវបានវាយតម្លៃជាបឋមក្នុងរង្វង់២០ពាន់លានដុល្លារ។

សេចក្តីរាយការណ៍របស់ លាង ដឺលុច ពីរដ្ឋអូហៃអូ សហរដ្ឋអាមេរិក

ស្តាប់ (02:24)

31/10/2012 by លាង ដឺលុច

លោកប្រធានាធិបតីអស់អណត្តិ បារ៉ាក់ អូបាម៉ានឹងធ្វើដំណើរជាលើកដំបូងចេញទៅសួរសុខទុក្ខជនរងគ្រោះដោយព្យុះសង្ឃរា Hurricane Sandy នៅក្នុងរដ្ឋ New Jersey នៅថ្ងៃពុធនេះ នេះបើតាមសេចក្តីប្រកាសព័ត៌មានរបស់សេតវិមាន។ នៅថ្ងៃអង្គារនេះ លោកអូបាម៉ាបានទៅទស្សនកិច្ចការិយាល័យកាកបាទក្រហមនៅក្នុងក្រុងវ៉ាស៊ីនតោន នៅទីនោះហើយដែលលោកអូបាម៉ាបានប្រកាសដាក់បញ្ជាដល់មន្ត្រីក្រោមឱវាទ និងមន្ត្រីពាក់ព័ន្ធទាំងអស់ត្រូវប្រើប្រាស់គ្រប់មធ្យោបាយជួយសង្គ្រោះជនរងគ្រោះ។ នៅព្រឹកថ្ងៃអង្គារនេះដែរ លោកអូបាម៉ាបានចុះហត្ថលេខាដាក់ក្រុងញូយ៉ក និងរដ្ឋ New Jersey អោយស្ថិតនៅក្នុងស្ថានភាពមហន្តរាយ និងបានប្រកាសដាក់រដ្ឋមួយចំនួនទៀតដែលវាយប្រហារដោយខ្យល់ព្យុះ Hurricane Sandy អោយស្ថិតនៅក្នុងភាពប្រកាសអាសន្ន។

សកម្មភាពរបស់លោកបារ៉ាក់ អូបាម៉ាយ៉ាងនេះវាបានស្ថិតនៅក្នុងក្របខណ្ឌនៃរដ្ឋបាលរបស់ខ្លួនក៏ពិតមែន ប៉ុន្តែការនេះ វាក៏ស្ថិតនៅក្នុងរយៈពេលនៃការឃោសនាបោះឆ្នោតផងដែរ។ ការជួយសង្គ្រោះ និងការស្រោយស្រង់ប្រជាជនពីភយន្តរាយ កំពុងតែក្លាយជាវិញ្ញាសាចុងក្រោយ មុនការបោះឆ្នោតមកដល់ក្នុងមួយសប្តាហ៍ទៀតនេះ។ បេក្ខជនប្រធានាធិបតីទាំងពីរឈប់និយាយអំពីកម្មវិធីនយោបាយរបស់ពួកគេហើយ ប៉ុន្តែបានបញ្ចេញសកម្មភាពមនុស្សធម៌ប្រណាំងគ្នាវិញ។ លោកមីត រ៉ូមនី បេក្ខជនប្រធានាធិបតីនៃគណបក្សសាធារណៈរដ្ឋនៅតែឆ្លៀតមករដ្ឋអូហៃអូដ៏សំខាន់អោយខាងតែបាននៅថ្ងៃអង្គារនេះ ដើម្បីជួបជុំជាមួយអ្នកគាំទ្រ និងប្រកាសរៃអង្គាស រួមទាំងប្រមូលគ្រឿងឧបត្ថម្ភជួយជនរងគ្រោះដោយព្យុះកំណាច។ រាល់ពាក្យពេចន៍នៃសុន្ទរកថារបស់លោកសុទ្ធតែជាការចូលរួមរំលែកក្តីលំបាក និងការកោតស្ងប់ស្ងែងចំពោះអ្នកដែលបានបរិច្ចាកជំនួយឧបត្ថម្ភ។

លោក អូបាម៉ាវិញដោយសារតែរវល់នឹងការងារគ្រប់គ្រងគ្រោះមហន្តរាយនៅឯសេតវិមានប៉ុន្មានថ្ងៃនេះ បានអនុញ្ញាតអោយលោកប៊ីល គ្លីនតុន និងសហការីផ្សេងទៀតធ្វើយុទ្ធនាការឃោសនាបោះឆ្នោតនៅតាមរដ្ឋសំខាន់ៗ។ ចំណែកលោកដែលទំនងជានឹងដើរលុយទឹកនៅក្នុងរដ្ឋ New Jersey នៅថ្ងៃពុធនេះបានថ្លែងសាររួចហើយទៅកាន់ជនរងគ្រោះដោយនិយាយថា យើងពិតជាយល់ពីអារម្មណ៍របស់បងប្អូនដែលកំពុងមានជីវភាពប្រឈមនឹងគ្រោះមហន្តរាយនេះ។ ប៉ុន្តែសារសំខាន់របស់ខ្ញុំទៅកាន់ពួកគេគឺថា សហរដ្ឋអាមេរិកនៅជាមួយអ្នក។ យើងស្ថិតនៅពីក្រោយអ្នកជានិច្ច។ យោងតាមសារព័ត៌មានក្នុងស្រុកនៅសហរដ្ឋអាមេរិក ចំនួនអ្នកស្លាប់ត្រូវបានរកឃើញមិនតិចជាង ៣០នាក់ឡើយរហូតដល់ល្ងាចថ្ងៃអង្គារនេះ រីឯការខូចខាតអាចមានតម្លៃរហូតដល់២០ពាន់លានដុល្លារ៕