Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ ពុធ 24 តុលា 2012 -
ព័ត៌មានទើបកែប្រើលើកចុងក្រោយ ថ្ងៃ ពុធ 24 តុលា 2012
លោកសម រង្ស៊ីសរសេរលិខិតម្តងទៀត ដើម្បីសុំចូលគោរពព្រះវិញ្ញាណក្ខន្ធព្រះមហាវីរក្សត្រ
លោកនាយករដ្ឋមន្រ្តី ហ៊ុន សែន និងលោកសម រង្ស៊ី (រូបថតឯកសារ)
លោក សម រង្ស៊ី ប្រធានគណបក្សប្រឆាំង ដែលកំពុងស្ថិតនៅក្រៅប្រទេស បានសេរសេរលិខិតមួយថ្មីទៀត ដាក់ទៅកាន់ប្រមុខដឹកនាំទាំង ៣ រូប របស់គណបក្សកាន់អំណាច ដើម្បីស្វែងរកផ្លូវ ចូលគោរពព្រះវិញ្ញាណក្ខន្ធសម្តេចព្រះមហាវីរក្សត្រ សម្តេចព្រះ នរោត្តម សីហនុ នៅព្រះបរមរាជវាំង ក្នុងទីក្រុងភ្នំពេញ។ មកដល់ថ្ងៃ២៤តុលានេះ មិនទាន់មានការឆ្លើយតបបែបណាទេ តែបើតាមលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី ក្តីសង្ឃឹមរបស់លោក សម រង្ស៊ី ហាក់ដូចជា នឹងមិនអាចទៅរួចឡើយ។
អស់ពីលិខិតថ្វាយព្រះមហាក្សត្រ និងលិខិតជូនលោកនាយករដ្ឋមន្ត្រី ហ៊ុន សែន កាលពីថ្ងៃ១៧តុលា គឺនៅពេលនេះ លោក សម រង្ស៊ី បានសរសេរលិខិតជាថ្មីម្តងទៀត ផ្ញើជូនប្រមុខដឹកនាំកំពូលទាំងបីរូបរបស់គណបក្សប្រជាជនកម្ពុជា ដែលកំពុងតែដឹកនាំប្រទេស ដឹកនាំទាំងព្រឹទ្ធសភា ទាំងរដ្ឋសភា និងទាំងរដ្ឋាភិបាល។
លិខិតរួមរបស់លោក សម រង្ស៊ី ធ្វើនៅថ្ងៃទី២២ ខែតុលា ឆ្នាំ២០១២ បានផ្ញើជូនសម្តេចទាំងបី របស់គណបក្សប្រជាជនកម្ពុជា ក្នុងនាមជាប្រធាន និងអនុប្រធាននៃគណៈកម្មាធិការជាតិរៀបចំព្រះរាជពិធីបុណ្យព្រះបរមសពសម្តេចព្រះមហាវីរក្សត្រ។ លិខិតនោះ ត្រូវបានមន្ត្រីខុទ្ទកាល័យរបស់ថ្នាក់ដឹកនាំគណបក្សប្រជាជនកម្ពុជាទទួលយកកាលពីថ្ងៃទី២៣ ខែតុលា ឆ្នាំ២០១២។
ម្តងនេះ លោក សម រង្ស៊ី បានទទូចសុំអន្តរាគមន៍ដោយទឹកចិត្តយោគយល់ពីប្រមុខដឹកនាំកំពូលគណបក្សប្រជាជនកម្ពុជា ដើម្បីឲ្យលោកបានវិលចូលប្រទេសកម្ពុជា ទៅគោរពព្រះវិញ្ញាណក្ខន្ធ និងឃើញព្រះភក្ត្រចុងក្រោយរបស់សម្តេចព្រះមហាវីរក្សត្រ សម្តេចឪ នរោត្តម សីហនុ នៅព្រះបរមរាជវាំង។
លោកសម រង្ស៊ី ក៏បានជម្រាបជូនសម្តេចទាំងបីថា ព្រះករុណា សម្តេចឪ មានព្រះមហាករុណាទិគុណដ៏ធំធេងចំពោះរូបលោក និងក្រុមគ្រួសារលោក។
ក្នុងស្ថានភាពដែលកម្ពុជារងនូវព្រះរាជអវត្តមានជារៀងរហូតរបស់ព្រះវររាជបិតា សម្តេចឪ លោក សម រង្ស៊ី អះអាងថា ក្នុងនាមលោកជាកូនខ្មែរមួយរូប លោកចាំបាច់ត្រូវតែខិតខំជួយពង្រឹងការផ្សះផ្សាជាតិ រួបរួមជាតិ ឯកភាពជាតិ និងជួយដោះស្រាយបញ្ហាខ្មែរ ដោយខ្មែរគ្នាឯង ស្របតាមព្រះរាជតំរិះ និងព្រះរាជជំហរដ៏ខ្ពង់ខ្ពស់របស់ព្រះអង្គ។
មកដល់រសៀលនេះ មិនទាន់មានការឆ្លើយតបបែបណាពីប្រមុខដឹកនាំគណបក្សប្រជាជនកម្ពុជា នៅឡើយទេ។ ក៏ប៉ុន្តែលោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានចាត់ទុកលិខិតរបស់លោកសម រង្ស៊ីថាជាការធ្វើនយោបាយលើព្រះបរមសពព្រះករុណា ហើយថា រដ្ឋាភិបាល ពិសេសលោកនាយករដ្ឋមន្ត្រី ហ៊ុន សែន តែងតែប្រកាន់យកនយោបាយបង្រួបបង្រួម និងផ្សះផ្សាជាតិ តាំងពីមុនឆ្នាំ១៩៩០ ពោលគឺ មុនថ្ងៃចុះកិច្ចព្រមព្រៀងសន្តិភាព ទីក្រុងប៉ារីស ថ្ងៃ២៣តុលា ឆ្នាំ១៩៩១។ នយោបាយរួបរួម និងផ្សះផ្សាជាតិ ក៏ត្រូវរដ្ឋាភិបាលប្រកាន់យកជាដរាប បើទោះបីជាព្រះមហាវីរក្សត្រ បានយាងចូលទិវង្គតក៏ដោយ។
លោក ផៃ ស៊ីផាន បានបន្ថែមថា "រាជរដ្ឋាភិបាល បានដង្ហែតាមព្រះទ័យរបស់ព្រះករុណាសម្តេចព្រះមហាវីរក្សត្រ... ហើយរាជរដ្ឋាភិបាល នៅតែគោរពនូវការបង្រួបបង្រួម ការផ្សះផ្សាជាតិ តាមព្រះរាជតំរិះរបស់ព្រះអង្គដដែល។ មិនមែនបានសេចក្តីថា ព្រះមហាវីរក្សត្រ កាលពីលោកនៅមានព្រះជន្ម គណបក្សប្រឆាំងឆក់ឱកាសរំលោភច្បាប់ ហើយនៅពេលដែលព្រះអង្គយាងចូលទិវង្គត គណបក្សប្រឆាំង នៅតែឆក់ឱកាស រំលោភច្បាប់នោះទេ។ អីចឹង ការគោរពនេះ រាជរដ្ឋាភិបាលត្រូវតែគោរពជានិច្ចជាកាល ចំពោះនីតិរដ្ឋ"។
ការលើកឡើងរបស់មន្ត្រីជាន់ខ្ពស់រដ្ឋាភិបាលដូច្នេះ ក៏ជាការឆ្លើយតបទៅកាន់មេដឹកនាំ គណបក្សសង្គ្រោះជាតិ ក្នុងពិធីជួបជុំរម្លឹកខួបថ្ងៃ២៣តុលា ឆ្នាំ១៩៩១ ថ្ងៃចុះកិច្ចព្រមព្រៀងសន្តិភាព ទីក្រុងប៉ារីស ដែលបានធ្វើឡើង កាលពីព្រឹកថ្ងៃទី២៤តុលា ឆ្នាំ២០១២ នៅទីស្នាក់ការកណ្តាលគណបក្សសមរង្ស៊ី ក្នុងរាជធានីភ្នំពេញ។ គណបក្សប្រឆាំងអំពាវនាវឲ្យរដ្ឋាភិបាលអនុវត្តនយោបាយបង្រួបបង្រួម និងផ្សះផ្សាជាតិ ដោយបើកផ្លូវឲ្យលោកសម រង្ស៊ី ដែលតុលាការកម្ពុជាផ្តន្ទាទោសកំបាំងមុខ ដាក់ពន្ធនាគារ ១២ ឆ្នាំ ក្នុងរឿងព្រំដែនកម្ពុជា-វៀតណាម បានវិលត្រឡប់ចូលស្រុកឡើងវិញ។
ក្នុងអំឡុងពេលការយាងចូលព្រះទិវង្គត របស់សម្តេចព្រះមហាវីរក្សត្រ គឺរដ្ឋាភិបាល តាមរយៈក្រសួងមហាផ្ទៃ មិនបានរៀបចំឲ្យមានការលើកលែងទោសដល់អ្នកទោសឡើយ។ នេះបើតាមការបញ្ជាក់របស់លោកឧត្តមសេនីយ៍ គុយ ប៊ុនសន អគ្គនាយក នៃអគ្គនាយកដ្ឋានពន្ធនាគារ របស់ក្រសួងមហាផ្ទៃ៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (2)
ខ្ញុំគាំទ្រគោលនយោបាយបង្រួមបង្
ខ្ញុំគាំទ្រគោលនយោបាយបង្រួមបង្រោមជាតិរបស់សម្តេច ហ៊ុនសែន បើសិនអាចធ្វើទៅបាននោះ សម្តេច ហ៊ុនសែនអាចក្លាយទៅជាទំព័រថ្មីមួយសម្រាប់ប្រជាជនកម្ពុជា ហើយសម្តេចនឹងដកជាប់ក្នុងដួងចិត្តប្រជារាស្រ្តខ្មែរទាំងអស់ ដូចសម្តេចតាដែរ។
គាំបង្រួមបង្រួម
សូមជនរួមជាតិអង្វរសមេ្តចមេត្តាអនុគ្រោះ ដល់ជនរូមជាតិជាអ្នកខុសផង
ប្រតិកម្មជុំវិញអត្ថបទនេះ