កម្ពុជា -

អត្ថបទចុះផ្សាយនៅថ្ងៃ សុក្រ 26 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 26 តុលា 2012

ចលនាយុវជនសមរង្ស៊ីប្រកាសគម្រោងធ្វើបាតុកម្មនៅដើមខែវិច្ឆិកា

ទីស្នាក់ការគណបក្សសមរង្ស៊ី

ដោយ ហុង សីហា

ប្រធានចលនាយុវជនគណបក្សសម រង្ស៊ី គ្រោងនឹងធ្វើបាតុកម្មជាថ្មីនៅថ្ងៃទី ៨វិច្ឆិកាខែក្រោយនេះ ដើម្បីទាមទារឲ្យរដ្ឋាភិបាលគោរពកិច្ចព្រមព្រៀងសន្តិភាពក្រុងប៉ារីស កែប្រែសមាសភាពគណៈកម្មាធិការជាតិរៀបចំការបោះឆ្នោត( គ.ជ.ប) និងធ្វើកំណែទម្រង់ប្រព័ន្ធតុលាការ។ បាតុកម្មនេះក៏នឹងទាមទារឲ្យរដ្ឋាភិបាលលើកលែងទោសលោកសម រង្ស៊ីផងដែរ។

សេចក្តីរាយការណ៍របស់ហុង សីហា ពីទីក្រុងភ្នំពេញ

ស្តាប់ (02:38)

26/10/2012

លោក សួង សោភ័ណ្ឌ ប្រធានចលនាយុវជនគណបក្ស សម រង្ស៊ីបានប្រាប់វិទ្យុបារាំងអន្តរជាតិនៅថ្ងៃនេះថា លោកមានគម្រោងធ្វើបាតុកម្មធំមួយនៅថ្ងៃទី៨ វិច្ឆិកា ដើម្បីធ្វើការទាមទារ ឲ្យរដ្ឋាភិបាលគោរពសន្ធិសញ្ញាក្រុងប៉ារីស, កែប្រែសមាសភាពគណៈកម្មាធិការជាតិរៀបចំការបោះឆ្នោត ដែលត្រូវបានអនុម័ត ដោយរដ្ឋសភា កាលពីថ្ងៃទី ១១តុលាកន្លងទៅ និងការទាមទារឲ្យមានការកែប្រែប្រព័ន្ធតុលាការ ដែលលោកអះអាងថា ខ្វះភាពឯករាជ្យ។ លើសពីនេះ ចលនាយុវជនសម រង្ស៊ីក៏ទាមទារឲ្យមានការដោះលែងអ្នកទោសនយោបាយ និងសកម្មជនដីធ្លីដែលត្រូវកាត់ទោសឲ្យជាប់ពន្ធនាគារផងដែរ។

លោកឡុង ឌីម៉ង់ អ្នកនាំពាក្យសាលារាជធានីភ្នំពេញបានប្រាប់វិទ្យុបារាំងអន្តរជាតិនៅថ្ងៃនេះថា លោកនៅមិនទាន់បានដឹង និងមិនទាន់បានទទួលសំណើស្តីពីការធ្វើបាតុកម្មនេះនៅឡើយទេ។ លោកបានបន្តថា បើសិនជាបានទទួល សាលាក្រុងនឹងជួបពិភាក្សាគ្នា ហើយបើសិនជាសំណើនោះស្របច្បាប់នោះ សាលាក្រុងនឹងអនុញ្ញាត តែបើមិនស្របច្បាប់ទេ សាលាក្រុងមិនអនុញ្ញាតទេ។

ក៏ប៉ុន្តែលោក សួន សោភ័ណ្ឌបានអះអាងថា បាតុកម្មដែលក្រុមយុវជនសម រង្ស៊ីធ្វើគឺជាបាតុកម្មអហិង្សា និងស្របទៅតាមរដ្ឋធម្មនុញ្ញ។ ជាងនេះលោកបានប្រាប់ឲ្យដឹងទៀតថា នៅវេលាម៉ោង ២ម៉៣០នាទីរសៀលថ្ងៃសុក្រនេះ លោកបានបញ្ជូនលិខិតស្នើសុំធ្វើបាតុកម្មនេះទៅសាលារាជធានីរួចហើយ ប៉ុន្តែលិខិតនោះត្រូវបានបញ្ជូនត្រឡប់វិញ ដោយសារមានចំណុចខ្វះចន្លោះ។ ក្រោយការកែតម្រូវហើយលិខិតនោះនឹងត្រូវបញ្ជូនត្រឡប់ទៅសាលារាជធានីភ្នំពេញម្តងទៀត។

ទាក់ទិនទៅនឹងគោលការណ៍ទាំងបីដែលគ្រោងទាមទារនោះ លោក សោភ័ណ្ឌក៏គ្រោងដង្ហែញត្តិមួយជូនរដ្ឋសភា ក្រសួងមហាផ្ទែ និងក្រសួងយុត្តិធម៌ដើម្បីស្នើសុំឲ្យមានការលើកលែងទោសលោក សម រង្ស៊ី ដែលលោកចាត់ទុកថា ទោសរបស់លោក សម រង្ស៊ីគឺជាទោសនយោបាយ។

ទាក់ទិនទៅនឹងបញ្ហានេះដែរ លោកសម រង្ស៊ីផ្ទាល់ក៏ធ្លាប់បានផ្ញើលិខិតជូនមេដឹកនាំគណបក្សកាន់អំណាចទាំងបី ដើម្បីសុំចូលគោរពព្រះវិញ្ញាណក្ខន្ធរបស់អង្គសម្តេចឪ។ ប៉ុន្តែ លិខិតរបស់លោក សម រង្ស៊ីទាំងប៉ុន្មាន ត្រូវបានបញ្ជូនទៅគណបក្ស សម រង្ស៊ី វិញ ដោយពុំបានភ្ជាប់ពីមូលហេតុឡើយ។

រីឯអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ធ្លាប់បានពន្យល់ប្រាប់វិទ្យុបារាំងអន្តរជាតិកាលពីពេលកន្លងទៅថា លិខិតរបស់លោក សម រង្ស៊ីខ្វះជាលក្ខណៈផ្លូវការ ហើយលោកបានឲ្យលោក សម រង្ស៊ីបញ្ជាក់ថា ការស្នើសុំនោះជាលក្ខណៈឯកជន ឬក៏ក្នុងនាមបក្សរបស់លោក។ ជាងនេះ លោកបានពន្យល់បណ្តាញផ្សព្វផ្សាយថា រដ្ឋាភិបាលបានពិនិត្យលិខិតនោះយ៉ាងយកចិត្តទុកដាក់ តែវាមិនបានឆ្លើយតបនឹងនីតិវិធី និងវាខុសពីអ្វីដែលកម្ពុជាធ្វើ ដើម្បីពង្រឹងនីតិរដ្ឋ។

សូមរម្លឹកថា កាលពីថ្ងៃទី ២៣ តុលានេះ ក្រុមយុវជនគណបក្សសម រង្ស៊ី ធ្លាប់មានគម្រោងធ្វើបាតុកម្មប្រឆាំងនឹងសមាសភាព គណៈកម្មាធិការជាតិរៀបចំការបោះឆ្នោត ប៉ុន្តែបានបង្វែរទៅជាការគោរពព្រះវិញ្ញាណក្ខន្ធអតីតព្រះមហាក្សត្រ សម្តេចឳ នរោត្តម សីហនុ ដែលបានយាងចូលទិវង្គតកាលពីថ្ងៃទី ១៥ តុលានៅទីក្រុងប៉េកាំងប្រទេសចិន៕