លោក សម រង្ស៊ី ដាក់បិណ្ឌទី១២នៅវត្តដែលធ្លាប់មានជម្លោះដីធ្លីនៅសង្កាត់ព្រែកលៀប
លោក សម រង្ស៊ី ប្រធានគណបក្សសង្គ្រោះជាតិ នៅថ្ងៃទី២០កញ្ញានេះ បានដឹកនាំក្រុមអ្នកតំណាងរាស្ត្រគណបក្សសង្គ្រោះជាតិដាក់បិណ្ឌទី១២នៅក្នុងវត្តពោធិព្រឹក ហៅវត្តខ្ទរ ស្ថិតនៅសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។ ជាវត្តដែលធ្លាប់មានជម្លោះដីធ្លីយ៉ាងស្រួចស្រាវជាមួយក្រុមហ៊ុនឯកជនអេង កាំង ដែលបានឈានទៅដល់ការបិទផ្លូវជាតិលេខ៦ និងការដុតបំផ្លាញគ្រឿងចក្រនិងសំភារៈរបស់ក្រុមហ៊ុនថែមទៀត។
ចុះផ្សាយនៅថ្ងៃ៖
ស្តាប់ - ០២:០៩
វាមិនមែនជារឿងចៃដន្យពេកនោះទេ ដែលប្រធានគណបក្សប្រឆាំងលោក សម រង្ស៊ី បានជ្រើសរើសវត្តពោធិព្រឹក ហៅវត្តខ្ទរ ស្ថិតនៅក្នុងសង្កាត់ព្រែកលៀប ខណ្ឌជ្រោយចង្វារ ដើម្បីដាក់បិណ្ឌទី១២ នៅថ្ងៃទី២០កញ្ញានេះ។
ដៃកាន់ក្បាលម៉េក្រូ មេបក្សប្រឆាំងរូបនេះ បានថ្លែងភ្លាមពីជោគជ័យរបស់ប្រជាពលរដ្ឋជាពុទ្ធបរិស័ទនៅចំណុះជើងវត្តពោធិព្រឹក រួមទាំងព្រះសង្ឃផងដែរ ដែលបានរួមគ្នាប្រឆាំងនឹងការវាយកំទិចឈាបនដ្ឋានដោយក្រុមហ៊ុនឯកជននៅក្នុងជម្លោះដីធ្លីទំហំ៣ហិចតាកាលពីខែវិច្ឆិការឆ្នាំ២០១៣។
គេនៅចាំបានថា កាលណោះ ប្រជាពលរដ្ឋរស់នៅភូមិខ្ទរ សង្កាត់ព្រែកលៀប បានប្រមូលផ្តុំគ្នា បិទផ្លូវជាតិលេខ៦A តាំងពីម៉ោង១២រំលងអធ្រាត្រ ឈានចូល ព្រឹកថ្ងៃទី២៣ ខែវិច្ឆិកា ដើម្បីប្រឆាំងនឹងក្រុមហ៊ុនអេងកាំង ដែលបានយកគ្រឿងចក្រមកឈូសឆាយ វាយកំទេច ឈាបនដ្ឋាន ដើម្បីយកដីទំហំ៣ហិចតា ដែលស្ថិតនៅមុខ វត្តពោធិព្រឹក្ស ហៅវត្តខ្ទរ។ ដោយសារកំហឹង ប្រជាពលរដ្ឋក៍បានឈានទៅដុតកំទេចគ្រឿងចក្រអេស្កាវ៉ាទ័ររបស់ក្រុមហ៊ុនមួយគ្រឿង រួមទាំងទុយោបូមខ្សាច់ ដែលដាក់ក្នុងបរិវេណទីបច្ឆានេះផងដែរ។
លោក សម រង្ស៊ី បានហៅព្រឹត្តិការណ៍នោះថា គឺជាជោគជ័យមួយ ដែលកើតឡើងពីការសាមគ្គីរបស់ប្រជាពលរដ្ឋ។ ជាមួយនឹងការសរសើរមិនដាច់ពីមាត់ លោក សម រង្ស៊ី ក៍បានប្រកាសពីការបន្តជួយគាំទ្រ និងការពារចំពោះប្រជាពលរដ្ឋដែលរងគ្រោះដោយការរំលោភបំពានផ្សេងៗទៀត។
ក្រៅពីករណីនេះ លោក សម រង្ស៊ី មិនបានថ្លែងសារនយោបាយអ្វីសំខាន់ទៀតនោះទេ។
ក្រោយពីចូលរួមពិធីបុណ្យកាន់បិណ្ឌ នៅវត្តពោធិ៍ព្រឹករួចមក លោក សម រង្ស៊ី ក៍បានបន្តដំណើរទៅចូលរួមពិធីបុណ្យកាន់បិណ្ឌ នៅវត្តជ្រៃមាសសាគរ ហៅវត្តថ្មី ស្ថិតក្នុងឃុំព្រែកដំបង ស្រុកមុខកំពូល ខេត្តកណ្តាលផងដែរ។ បើតាមលោក យឹម សុវណ្ណ អ្នកនាំពាក្យគណបក្សសង្គ្រោះជាតិ នៅថ្ងៃអាទិត្យស្អែកនេះ លោក សម រង្ស៊ី ក៍គ្រោងធ្វើពិធីបង្សុកូល ឧទ្ទិសកុសលជូនដល់វិញ្ញាណក្ខន្ធដល់ជនរងគ្រោះ ដែលបានស្លាប់បាត់បង់ជីវិតនៅមុខរដ្ឋសភាចាស់ កាលពីឆ្នាំ១៩៩៧ផងដែរ។ អ្វីជាការកត់សំគាល់ នេះគឺជាឆ្នាំដំបូងហើយ ដែលលោក សម រង្ស៊ី ប្រធានគណបក្សប្រឆាំងបានចូលរួមពិធីបុណ្យភ្ជុំបិណ្ឌជាមួយប្រជាពលរដ្ឋកម្ពុជា ក្រោយពីបានរស់នៅដោយនិរទេសខ្លួននៅក្រៅប្រទេស ចាប់ពីឆ្នាំ២០០៩ ដល់ឆ្នាំ២០១៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ