ប្រល័យពូជសាសន៍នៅរវ៉ាន់ដា ៖ តុលាការសម្រេចដាក់ទោស២៥ឆ្នាំលើអតីតប្រធានកងស៊ើបការណ៍
ប៉ាស្កាល់ ស៊ីមប៊ីកង់វ៉ា (Pascal Simbikangwa) អតីតប្រធានឯកភាពស៊ើបការណ៍សម្ងាត់របស់ប្រធានាធិបតី ក្នុងសម័យកាន់អំណាចប្រល័យពូជសាសន៍ឆ្នាំ១៩៩៤ ត្រូវបានតុលាការដំបូងក្រុងប៉ារីស កាត់ទោសឱ្យជាប់ពន្ធនាគារ២៥ឆ្នាំ។ Pascal Simbikangwa ជាជនសង្ស័យផ្សំគំនិតប្រល័យពូជសាសន៍រវ៉ាន់ដាដំបូង ដែលកាត់ទោសដោយតុលាការបារាំង ក្រោមគោលការណ៍យុត្តាធិកាសកល Compétence universelle។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
២៥ឆ្នាំក្នុងគុក ជាទោសដ៏ធ្ងន់ ! ដែលតុលាការបារាំង បានដាក់ទោសលើរូប Pascal Simbikangwa ពីបទបានផ្សំគំនិតប្រព្រឹត្តអំពើប្រល័យពូជសាសន៍ នៅរវ៉ាន់ដា កាលពី២០ឆ្នាំមុន។
មានអាយុ៥៤ឆ្នាំ ពិការ ជិះកៅអី ជាប់រហូតតាំងពីឆ្នាំ១៩៨៦មក អតីតប្រធានឯកភាពស៊ើបការណ៍សម្ងាត់ប្រធានាធិបតីរវ៉ាន់ដា ត្រូវបានតុលាការជាប្រវត្តិសាស្ត្រ រកឃើញថាជាអ្នកប្រព្រឹត្តនិងផ្សំគំនិតធ្វើឧក្រិដ្ឋកម្មប្រឆាំងនឹងមនុស្សជាតិ។ សាលក្រមបានធ្លាក់មក បន្ទាប់ពីមានសវនការរយៈពេល៧សប្តាហ៍ និងពិគ្រោះសម្រេចរយៈពេល១២ម៉ោង។
តុលាការសាលាដំបូងប៉ារីស មិនដាក់ទោសអស់មួយជីវិត ដូចការទាមទាររបស់មហាអយ្យការមែនប៉ុន្តែគ្រប់គ្នា ក្នុងសំឡេងភាគច្រើនដាច់ខាត បានថ្កោលទោស Pascal Simbikangwa ក្នុងនាមជាឧក្រិដ្ឋជន មិនមែនគ្រាន់តែជាអ្នកផ្សំគំនិតទេ ព្រោះជនរូបនេះ បានរួមចំណែកយ៉ាងពេញទំហឹងប្រព្រឹត្តអំពើប្រល័យពូជសាសន៍ តាមរយៈការចែកចាយអាវុធ ការចេញបញ្ជា ឱ្យមានការសម្លាប់រង្គាលផ្តាច់ពូជ។
នេះគឺសាលក្រម ប្រកបដោយនិមិត្តរូប និងអត្ថន័យបំផុត ដែលជាសារបញ្ជូនទៅឱ្យគ្រប់ជនប្រព្រឹត្តអំពើប្រល័យពូជសាសន៍រវ៉ាន់ដារ ដែលកំពុងជ្រកកោនលើទឹកដីបារាំង។ នេះក៏ជាគំរូមួយសម្រាប់សំណុំរឿងប្រល័យពូជសាសន៍ ២៧ទៀត ដែលកំពុងស្ថិតក្នុងដំណាក់កាលស៊ើបអង្កេត។
សម្រាប់សង្គមស៊ីវិលវិញ ថ្ងៃនេះជាថ្ងៃរីករាយ ព្រោះបានឃើញពន្លឺយុត្តិធម៌បឋម ដល់ជនរងគ្រោះបាត់បង់ជីវិតប្រមាណជិត៨សែននាក់។ ប៉ុន្តែខាងចុងចោទ បានប្រកាសថានឹងធ្វើឧទ្ទរណ៍ សុំលើកលែងទោស ព្រោះ យល់ថាសាក្សីមានលក្ខណៈផុយស្រួយ និងជាដំណើរការតុលាការមាននយោបាយលាយលំ។ ក្នុងអំឡុងពេលសវនការបានបដិសេធទាំងប្រទាំងប្រទើស ថាមិនដែលបានឃើញខ្មោចមនុស្សស្លាប់សោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ