រុស្ស៊ី -

អត្ថបទចុះផ្សាយនៅថ្ងៃ ព្រហស្បតិ៍ 27 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 27 កញ្ញា 2012

ម៉ូស្គូបញ្ជាក់ជាថ្មីថា វិបត្តិនៅស៊ីរីត្រូវដោះស្រាយដោយឈរតែលើច្បាប់អន្តរជាតិ

លោកវ៉្លាឌីមៀរ ពូទីន ប្រធានាធិបតីរុស្ស៊ី

©Reuters

ដោយ កែវ ឆាយា

គោលជំហរនេះ ត្រូវបានលើកឡើងដោយលោកប្រធានាធិបតីរុស្ស៊ីពូទីន ក្នុងពិធីទទួលសារតាំងនៅវិមានក្រេមឡាំងរសៀលម្សិលមិញ ពីអគ្គរដ្ឋទូតថ្មី នៃ២១ប្រទេស ក្នុងនោះ មានបណ្តាប្រទេសអាស៊ានផងដែរ។

សេចក្តីរាយការណ៍របស់ កែវ ឆាយា ពីទីក្រុងម៉ូស្គូ

ស្តាប់ (02:23)

27/09/2012 by កែវ ឆាយា

ថ្លែងសុន្ទរកថាក្នុងពិធីទទួលសារតាំងនៅពីមុខឯកអគ្គរដ្ឋទូត និងរាជទូតថ្មីៗនៃ២១ប្រទេស មកពីទ្វីបប្លែកៗ ដែលក្នុងនោះ មានទូតរាជាណាចក្រថៃ ទូតក្សត្រប្រទេសប្រ៊ុយណេ ទូតសិង្ហបុរី ជាដើម លោកប្រធានាធិបតីពូទីន រំលឹកថា រុស្ស៊ីក្នុងឆ្នាំជាបន្តបន្ទាប់ចំពោះមុខ នឹងធ្វើជាប្រធាននៃជំនួបកំពូលមួយចំនួន គឺថា ក្នុងឆ្នាំ ២០១៣ នឹងធ្វើជាប្រធាន G-20 ក្នុងឆ្នាំ ២០១៤ ជាប្រធាន G-8 ផង និងជាប្រធាន BRICS ផង។ BRICS ជាក្រុមនៃ៥ប្រទេសធំៗ ដែលមានសេដ្ឋកិច្ចកំពុងលូតលាស់ ដោយចង្វាក់យ៉ាងលឿន ពោលគឺ ប្រេស៊ីល រុស្ស៊ី ឥណ្ឌា ចិន និងសាធារណរដ្ឋអាហ្វ្រិកខាងត្បូង។ លោកពូទីនសង្កត់ធ្ងន់ថា ក្នុងតួនាទីនេះ រុស្ស៊ីនឹងធ្វើសព្វបែបយ៉ាង ដើម្បីពង្រឹងទំនោរជាវិជ្ជមាន ទាំងក្នុងនយោបាយ ទាំងក្នុងសេដ្ឋកិច្ចពិភពលោក។ ហើយសកម្មភាពណា ដែលនាំទៅកាន់អស្ថិរភាពនៃស្ថានការណ៍ក្នុងលោក គឺមិនអាចទទួលយកបានជាដាច់ខាត។

តាមលោកពូទីន ជាការចាំបាច់ខានមិនបានដែលត្រូវតែធានាឲ្យមានឧត្តមភាពនៃច្បាប់ ទាំងលើឆាកអន្តរជាតិ ទាំងនៅក្នុងរដ្ឋនិមួយៗផ្ទាល់។ ប្រសាសន៍លោកពូទីន គឺសំដៅទៅលើព្រឹត្តិការណ៍ដែលកំពុងវិវឌ្ឍនៅតាម “ចំណុចក្តៅ” ជាបឋមនៅតំបន់ដើមបូព៌ា មានក្នុងប្រទេសស៊ីរីជាដើម។ តាមប្រមុខរដ្ឋរុស្ស៊ី ការញុះញង់ក្នុងរូបភាពប្លែកៗ ការបន្តប្រើអំពើហិង្សា ដើម្បីផ្លាស់ប្តូររបបគ្រប់គ្រងក្នុងប្រទេសនេះ ឬនោះ គឺអាចអូសទាញស្ថានការណ៍ឲ្យធ្លាក់តែក្នុងសភាពទាល់ច្រកប៉ុណ្ណោះ។

លោកពូទីនគូសបញ្ជាក់ជាថ្មីថា បើមិនពឹងផ្អែកលើច្បាប់អន្តរជាតិទេ គឺមិនអាចរៀបរយស្ថានការណ៍ឲ្យបានស្រួលបួលឡើយក្នុងលោកសម័យបច្ចុប្បន្ន ហើយការប៉ុនប៉ងជំនួសគោលការណ៍ជាគ្រឹះគន្លឹះនៃលក្ខន្តិកៈអ.ស.ប. ទៅដោយសកម្មភាពជាឯកតោភាគី ឬទៅដោយការស៊ុំគ្រលំគ្នាជាប្លុកស្អីណា និងជាពិសេស ទៅដោយការប្រើកម្លាំង ទាំងឃ្វាងសេចក្តីសម្រេច របស់អ.ស.ប. គឺនឹងនាំទៅកាន់លទ្ធផលដ៏អាក្រក់សែនអាក្រក់។ សកម្មភាពបែបនេះ ងំជាប់ទៅដោយគ្រោះថ្នាក់នាំឲ្យបាត់បង់ស្ថិរភាព ហើយបង្កជាភាពច្របូកច្របល់។ របស់ដែលហៅថា “ការកាច់ចង្កូតគ្រប់គ្រងលើវិបត្តិ“ មិនអាចដំណើរការទៅមុខឡើយ។ ព្រឹត្តិការណ៍នាពេលចុងក្រោយ តាមដែលលោកប្រធានាធិបតីពូទីនបញ្ចប់សេចក្តី គឺសឲ្យឃើញថា គោលជំហរប្រកាន់យកដោយរុស្ស៊ី ជាគោលជំហរត្រូវឈរលើសច្ចធម៌៕