រុស្ស៊ី -

អត្ថបទចុះផ្សាយនៅថ្ងៃ ព្រហស្បតិ៍ 11 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 11 តុលា 2012

រុស្ស៊ីបន្តស្ថិតនៅនាំមុខគេក្នុងលោក ខាងចំនួនបង្ហោះទៅអវកាស

ដោយ កែវ ឆាយា

នេះជាសេចក្តីសន្និដ្ឋាន នៅក្នុងរបាយការណ៍ថ្មីទើបចេញដោយក្រុមហ៊ុន Futron នៅក្រុងវ៉ាស៊ីនតោន ដែលមានឯកទេសកម្មសិក្សាអំពីនិន្នាការសម័យបច្ចុប្បន្ន ខាងប្រើលំហអវកាសក្នុងគោលដៅវិទ្យាសាស្ត្រយោធា និងពាណិជ្ជ។ អស់៥ឆ្នាំជាប់មកហើយ ដែលក្រុមហ៊ុននេះតាក់តែងឡើងជាតារាងស្តីអំពីសមត្ថភាពប្រជែងគ្នារវាងរដ្ឋផ្នែកអវកាស។

សេចក្តីរាយការណ៍របស់ កែវ ឆាយា ពីទីក្រុងម៉ូស្គូ

ស្តាប់ (02:35)

11/10/2012 by កែវ ឆាយា

តារាងស្តីអំពីសមត្ថភាពប្រជែងនេះ តាមដែលទីភ្នាក់ងារព័ត៌មានរុស្ស៊ី ITAR-TASS កត់សម្គាល់ គឺឈរលើការធ្វើវិភាគអំពីកម្មវិធីរដ្ឋាភិបាល អំពីមូលដ្ឋានឧស្សាហកម្ម និងអំពីធនធានមនុស្សនៅតាមប្រទេសដែលជាប់ដៃរវល់នឹងការស្រាវជ្រាវប្រើប្រាស់លំហអវកាស។ កាលមុន របាយការណ៍ Futron ប៉ះតែលើតួអង្គ១០ដ៏សំខាន់នៅលើ “ទីផ្សារពិភពលោកខាងផ្តល់សេវាអវកាស” ពោលគឺរុស្ស៊ី ស.រ.អ. ចិន ប្រេស៊ីល អឺរ៉ុប អ៊ីស្រាអែល ឥណ្ឌា កាណាដា កូរ៉េខាងត្បូង និងជប៉ុន។ ឥឡូវក្នុងឆ្នាំ២០១២នេះ មានបន្ថែមទៅដោយ៥ប្រទេសផ្សេង គឺ អូស្ត្រាលី អារហ្សង់ទីន អ៊ីរ៉ង់ អ៊ុយក្រែន និង សាធារណរដ្ឋអាហ្វ្រិកខាងត្បូង ហេតុដែលសឲ្យឃើញ ពីការ ”ពន្លឿនពិភពលោកភាវូបនីយកម្មនៃសកម្មភាពក្នុងអវកាស”។

របាយការណ៍ Futron កត់សម្គាល់ថា រុស្ស៊ី និង ស.រ.អ.នៅតែនាំមុខគេដដែលក្នុងលោក ខាងវិស័យអវកាស ប៉ុន្តែកំពុងពើបប្រទះនឹងការប្រជែងកាន់តែខ្លាំងឡើងៗ ពីខាងប្រទេសឯទៀត ជាបឋម គឺពីខាងមហាប្រទេសចិន។ តាមទិន្នន័យលើកឡើងដោយរបាយការណ៍ Futron ៖ក្នុង១០ឆ្នាំចុងក្រោយ ពីក្នុងចំណោមការបង្ហោះយ៉ាងជោគជ័យទៅអវកាសចំនួន ៦៤០លើក ធ្លាក់មកលើប្រទេសរុស្ស៊ីដែលជាប់លេខ១នាំមុខគេ គឺមានចំនួនដល់ទៅ ២២៥លើក។ ជាប់លេខ២ គឺ ស.រ.អ. ១៩១លើក លេខ៣ គឺចិន៨៧លើក លេខ៤ គឺ អឺរ៉ុប ៦១លើក លេខ៥ គឺជប៉ុន ២៤លើក លេខ៦ គឺឥណ្ឌា ១៧លើក លេខ៧ គឺអ៊ីស្រាអែល ៣លើក ហើយលេខ៨ គឺអ៊ីរ៉ង់ ២លើក។ ប៉ុន្តែក្នុងរយៈពេលនេះ ខាងចំនួនសាតេលីទដែលមានសង់បានចំនួន ១.០៨៦គ្រឿង គឺ ស.រ.អ. ដែលជាប់លេខ១ មានចំណែកដល់ទៅ ៣៨% រុស្ស៊ីជាប់លេខ២ដោយអត្រា ២០% លេខ៣ គឺអឺរ៉ុប ១៧% លេខ៤ គឺចិន ៩% និងលេខ៥ គឺជប៉ុន ៦%។

និយាយពីករណីរុស្ស៊ី របាយការណ៍នៃក្រុមហ៊ុនស្រាវជ្រាវអាមេរិកាំង Futron សង្កត់ធ្ងន់ថា រុស្ស៊ីស្ថិតនៅជាប្រទេសនាំមុខគេក្នុងលោក ខាងចំនួនបង្ហោះទៅអវកាស ហើយតាមមើលទៅ គឺនឹងនៅរក្សាទុកតួនាទីនេះ ទាំងក្នុងប៉ុន្មានឆ្នាំចំពោះមុខ ដោយសារយានអវកាសរុស្ស៊ីធុន Soyuz បន្តស្ថិតនៅជានាវាតែមួយគត់ដែលដឹកអ្នកអវកាសសញ្ជាតិប្លែកៗទៅកាន់ “ស្ថានីយ
អវកាសអន្តរជាតិ” SSI ហោះក្នុងឋានៈជា ”មន្ទីរពិសោធ” ប្រចាំនៅកំពស់ប្រមាណ ៤០០គ.ម. លើផែនដីអស់១២ឆ្នាំជាប់មកហើយ។ មិនតែប៉ុណ្ណោះ នាវា Soyuz របស់រុស្ស៊ីក៏ចាប់ផ្តើមបង្ហោះចេញពីអវកាសយានដ្ឋានបារាំងឈ្មោះ Kourou នៅលើដែនដី Guyane ទៅផង៕