រុស្ស៊ី និង ប៉ូឡូញ បណ្តេញមន្ត្រីការទូត ទៅវិញ ទៅមក
រុស្ស៊ីទើបឆ្លើយតប នឹងការបញ្ជូនអ្នកការទូតខ្លួនមួយចំនួន ចេញពីប៉ូឡូញ ដោយការបណ្តេញចេញពី ប្រទេសខ្លួន នូវមន្ត្រីមួយចំនួននៃស្ថានទូតប៉ូឡូញនៅម៉ូស្គូ។ ការនេះ មាននិយាយ ក្នុងសេចក្តីជូនដំណឹងរបស់ក្រសួងការបរទេសរុស្ស៊ី ចេញថ្ងៃ១៧វិច្ឆិកា ២០១៤។
ចុះផ្សាយនៅថ្ងៃ៖
សេចក្តីជូនដំណឹងនេះ លើកឡើងថា ភាគីរុស្ស៊ីឈានជំហាននេះ គឺជាចម្លើយស្មើនឹងទង្វើពីខាងប៉ូឡូញ ហើយមន្ត្រីការទូតប៉ូឡូញមួយចំនួន បានចាកចេញពីដែនដីរុស្ស៊ីទៅហើយ ចំពោះសកម្មភាពរបស់គេ ដែលមិនស៊ីគ្នានឹងលក្ខន្តិកៈជាអ្នកការទូត។
ក្រសួងការបរទេសរុស្ស៊ី ជាថ្មីម្តងទៀត ចាត់ទុក ការបណ្តេញពួកអ្នកការទូតរុស្ស៊ីចេញពីប៉ូឡូញថា ជា “ជំហានអមិត្ត ហើយគ្មានអ្វីជាមូលដ្ឋានសំអាង”។ ស្របនឹងព័ត័មានផ្សព្វផ្សាយ ៖ អាជ្ញាធរប៉ូឡូញ បានឈានជំហានបែបនេះ គឺដោយមកពីសំណុំរឿងហៅថា ”ចារកិច្ច” ដែល ក្នុងក្របខ័ណ្ឌសំណុំរឿងនេះ ពលរដ្ឋប៉ូឡូញពីរនាក់ត្រូវបានឃាត់ខ្លួន គឺម្នាក់ជានាយទាហាន កងទ័ពប៉ូឡូញ និងម្នាក់ទៀតជា អ្នកច្បាប់ធ្វើការនៅក្រុងវ៉ារសូវី ហាក់បី បានស៊ីឈ្នួល លួចយកការណ៍ ឲ្យរុស្ស៊ី។
អំពីចំនួនពិតនៃអ្នកការទូត បណ្តេញចេញទៅវិញទៅមក ទាំងភាគីរុស្ស៊ី ទាំងភាគីប៉ូឡូញ ឥតលំអិតឲ្យដឹងឡើយ។
តាមមតិអ្នកសង្កេតការណ៍ ការបណ្តេញមន្ត្រីការទូតទៅវិញទៅមក គឺ ជាការចាប់ផ្តើម “សង្គ្រាម ការទូតដំណាក់ទី២” រវាង ប៉ូឡូញ និងសហព័ន្ធរុស្ស៊ី។ សង្គ្រាមបែបនេះ កាលពីលើកមុន បាន កើតមាន ក្នុងខែមករាឆ្នាំ២០០០។ កាលណោះ ប៉ូឡូញ បានប្រកាសជា “បុគ្គលមិនស្វាគម“ គឺ អ្នកការទូតរុស្ស៊ី ៩នាក់ ក្រោមលេសថា សកម្មភាពរបស់គេមិនសមស្របឡើយ នឹងលក្ខន្តិកៈគេ ជាអ្នកការទូត។ ជាចម្លើយបកវិញ រុស្ស៊ីបានប្រកាស ជា “បុគ្គលមិនស្វាគម “ដែរ គឺមន្ត្រី៩នាក់ នៃស្ថានទូតប៉ូឡូញនៅម៉ូស្គូ ហើយបណ្តេញគេឲ្យចាកចេញពីដែនដីរុស្ស៊ីទៅ។
ទើបថ្ងៃ១៥ វិច្ឆិកាកន្លងទៅសោះ ដោយមកពីរឿងអាស្រូវការទូតបានផ្ទុះឡើង រវាង រុស្ស៊ីនិង អាល្លឺម៉ង់ សហការិនីម្នាក់នៃស្ថានទូតអាល្លឺម៉ង់នៅម៉ូស្គូ ដែលទទួលបន្ទុកខាងផ្នែកនយោបាយ ស្របនឹងការទាមទារ របស់ក្រុងម៉ូស្គូ បានបង្ខំខ្លួនចាកចេញពីរុស្ស៊ីទៅ។ តាមមតិក្រុងប៊ែរឡាំង ភាគីរុស្ស៊ី គ្មានទឡ្ហីករណ៍អ្វីណា ប្រកាសរូបស្ត្រីនោះ ជា “បុគ្គលមិនស្វាគម”ឡើយ។
សាច់រឿង មកពី មុនពេលនេះ ភាគីអាល្លឺម៉ង់ បានប្រកាសជា ”បុគ្គលមិនស្វាគម” គឺ រូបមន្ត្រីម្នាក់នៃ ស្ថានអគ្គកុងស៊ុលរុស្ស៊ីនៅក្រុងបូន ដែលអស់ប៉ុន្មានខែជាប់ ត្រូវប្រតិចារកម្មអាល្លឺម៉ង់ តាមដានក្រោមបទសង្ស័យថា លួចយកការណ៍ពីប្រទេសអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ