រុស្ស៊ីថានឹងកែប្រែ "យុទ្ធសាស្ត្រទ័ព" ខ្លួនដើម្បីទុកទប់ទល់នឹងអូតង់
សេចក្តីនេះ ថ្លែងព្រឹកមិញ ក្នុងបទសម្ភាសន៍ ទៅទីភ្នាក់ងារព័ត៌មានរុស្ស៊ី RIA Novosti ដោយអនុប្រធានក្រុមប្រឹក្សាសន្តិសុខជាតិរុស្ស៊ី លោក មីខាអ៊ីល ប៉ូប៉ូវ ដែលចង្អុល ឲ្យឃើញថា សហរដ្ឋអាមេរិក កំពុងបង្កើនក្រុមទ័ពអូតង់ ប្រចាំនៅតាមបីប្រទេសបាល់ទ៍ ទាំង គ្រោងបញ្ជូនទៅនូវសព្វាវុធធុនធ្ងន់ៗ បូកទាំងរថក្រោះ ទៅកាន់ ប្រទេសអេស្តូនី ជាដើម។
ចុះផ្សាយនៅថ្ងៃ៖
ស្តាប់ - ០២:០៥
មូលហេតុនៃសេចក្តីថ្លែងការណ៍នេះ គឺមកពីបក្សសម្ព័ន្ធអូតង់ ស្របនឹងការចុះផ្សាយ នៃកាសែតអាល្លឺម៉ង់មួយកាលពីម្សិលម៉្ងៃ មានគម្រោងពង្រាយមូលដ្ឋានយោធា៥ថ្មី ប្រចាំនៅ តាមបីប្រទេសបាល់ទ៍ គឺ លីទុយអានី ឡេតូនី អេស្តូនី ព្រមទាំងនៅ ប៉ូឡូញ និង រូម៉ានី ដែលសុទ្ធតែ មានព្រំដែនជាប់នឹងរុស្ស៊ី។ តាមគម្រោងអូតង់ នៅនឹងមូលដ្ឋាននេះនីមួយៗ នឹងដាក់ឲ្យឈរជើង គឺយោធាអូតង់ ៦០០នាក់សម្រាប់អំឡុងពេលយូរតែម្តង។ ផែនការនេះ ត្រូវលើកយកទៅពិភាក្សា ក្នុងជំនួបកំពូលអូតង់ នៅប្រទេសអង់គ្លេសថ្ងៃ ៤-៥ កញ្ញាខាងមុខ។
លោក មីខាអ៊ីល ប៉ូប៉ូវ អនុប្រធាន ក្រុមប្រឹក្សាសន្តិសុខជាតិរុស្ស៊ី ក្នុងបទសម្ភាសន៍នោះ លំអិតថា ៖ ការកែប្រែ « យុទ្ធសាស្ត្រទ័ពរុស្ស៊ី » គឺតម្រូវ ដោយកត្តានយោបាយក្រៅប្រទេស មួយចំនួន បែបយ៉ាង ទន្ទឹមនឹងការដែលអូតង់ចេះតែវាតទី រំកិលមកទិសខាងកើត មកជិតនឹង រុស្ស៊ី ក៏ចោទឡើងទាំងបញ្ហា បណ្តាលមកពី ប្រព័ន្ធខែលមីស្ស៊ីលប្រឆាំងមីស្ស៊ីល ដែលស.រ.អា.បន្តបង្កើតឡើង នៅអឺរ៉ុបខាងកើត សម្រាប់បន្សោយជាមុន សក្តានុពលកងកម្លាំងបរមាណូរបស់ រុស្ស៊ី ព្រមទាំងមកពីស្ថានការណ៍នៅអ៊ុយក្រែន។ ម៉្លោះហើយ បានជាតាមប្រសាសន៍គាត់ យុទ្ធសាស្ត្រទ័ព ដែលរុស្ស៊ី បានអនុម័តតាំងពី៤ឆ្នាំមុន គឺក្នុងឆ្នាំ ២០១០ មិនអាចឆ្លើយ តបនឹង កាលៈទេសៈថ្មី បានពេញលក្ខណៈឡើយ។ ការកែប្រែ ត្រូវសម្រេចឲ្យបានមុនដំណាច់ឆ្នាំនេះ។
គួរនិយាយថា នៅលើផ្លូវធានាដល់សន្តិសុខជាតិខ្លួន សម្រាប់ប្រឈមនឹង ប្រព័ន្ធខែលមីស្ស៊ីល ប្រឆាំងមីស្ស៊ីលរបស់អូតង់ នៅលើដែនដីប៉ូឡូញ រុស្ស៊ីបានដំឡើងទៅហើយឲ្យ ប្រចាំការ នៅ ខេត្តកាលីនីនក្រាដ ប៉ែកខាងលិចបង្អស់របស់ខ្លួន គឺកាំជ្រួចមីស្ស៊ីល មានប្រសិទ្ធិភាពខ្ពស់ ធុន Iskander ដែលវង់សកម្មរបស់វា បាញ់ដល់ចម្ងាយ ៥០០គ.ម. គ្របដណ្តប់បានយ៉ាងងាយ លើដែនដីប៉ូឡូញទាំងមូលពីកើត ទៅលិច ក៏ដូចជាគ្របដណ្តប់លើ ដែនដីនៃបីប្រទេសបាល់ទ៍ តូចច្រម៉ក់ៗ នៅជាប់នឹងរុស្ស៊ី។ តាមដែលក្រសួងការពាររជាតិរុស្ស៊ីបានបង្ហើបឲ្យដឹង កាំជ្រួច Iskander នេះ ក៏នឹងត្រូវរុស្ស៊ីដំឡើង នៅប៉ែកខាងត្បូងប្រទេស នៅជិតព្រំដែន រូម៉ានី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ