រុស្ស៊ីទាមទារឲ្យអូតង់បញ្ជាក់ពីវិធានការពង្រាយទ័ព នៅអឺរ៉ុបខាងកើត
ចុះផ្សាយនៅថ្ងៃ៖
ស្តាប់ - ០៧:១១
នៅថ្ងៃព្រហស្បតិ៍ទី ៣ មេសា រដ្ឋមន្រ្តីការបរទេសរុស្ស៊ី បានកោះប្រជុំសម្ព័ន្ធមិត្ត របស់រុស្ស៊ី ដូចជាបេឡូរុស្ស៊ី អារមេនី កាហ្សាស់ស្ថាន គៀហ្សីស្ថាន និងតាហ្សីគីស្ថាន នៅទីក្រុងម៉ូស្គូ។ កាលពីថ្ងៃអង្គារ ទី ១ មេសា អង្គការអូតង់ បានសម្រេចផ្អាក ព្យួររាល់សហប្រតិបត្តិការជាមួយរុស្ស៊ី ដើម្បីឆ្លើយតបទៅនឹងការចងភ្ជាប់ទឹកដីគ្រីមេរបស់អ៊ុយក្រែនទៅក្នុងទឹកដីរុស្ស៊ី។
ជំនួបរុស្ស៊ី និងសម្ព័ន្ធមិត្តរបស់ខ្លួន ដែលធ្លាប់ជាសហភាពសូវៀត ធ្វើឡើង ដើម្បីឆ្លើយតបនឹងចំណាត់ការរបស់អង្គការអូតង់។ កាលពីថ្ងៃអង្គការអូតង់ សម្រេចព្យូរសហប្រតិបត្តិការទាំងយោធា និងស៊ីវិល ជាមួយរុស្ស៊ី។ ក្រុមរដ្ឋមន្រ្តីការបរទេសរបស់ប្រទេសសមាជិកអូតង់ថែមទាំង បានបញ្ជាឲ្យមេបញ្ជាការទ័ព នៅអូតង់ ធ្វើផែនការថ្មី ដើម្បីពង្រឹងផ្នែកការពាររបស់អង្គការអូតង់។ នៅក្នុងផែនការនោះ មានរួមបញ្ចូលវិធានការបញ្ជូនទ័ពអូតង់ និងសព្វាវុធទៅប្រទេសសមាជិកអូតង់ ដែលស្ថិតនៅភាគខាងលិចអឺរ៉ុប។ អូតង់គ្រោងផងដែរ ថា នឹងបង្កើនសមយុទ្ធយោធា កាន់តែច្រើនជាងមុន ដើម្បីអាចធ្វើការពង្រាយទ័ពយ៉ាងប្រសិទ្ធភាពចូលទៅកាន់តំបន់ដែលអាចរងការឈ្លានពាន។
រដ្ឋមន្រ្តីការបរទេសរុស្ស៊ី បានទាមទារ នៅថ្ងៃនេះ សុំឲ្យអូតង់បញ្ជាក់ឲ្យច្បាស់ ពីយុទ្ធសាស្រ្តពង្រាយទ័ពរបស់ខ្លួន នៅប្រទេសអឺរ៉ុប ដែលស្ថិតនៅក្បែររុស្ស៊ី។ តាមរុស្ស៊ី អូតង់ត្រូវឆ្លើយតបនឹងសំណួររបស់រុស្ស៊ី និងត្រូវតែហ៊ានបញ្ជាក់ថា តើចំណាត់ការរបស់អូតង់ធ្វើឡើង ដោយគោរពទៅតាមបទបញ្ជារួមគ្នា ដែលអូតង់ និងរុស្ស៊ីបានចុះជាមួយគ្នាដែរទេ។
នៅក្នុងជំនួបកំពូលដែលបិទបញ្ចប់កាលពីថ្ងៃពុធម្សិលមិញ អង្គការអូតង់ក៏បានព្យាយាមនិយាយធានាសន្តិសុខដល់ប្រទេសអឺរ៉ុបមួយចំនួន ដែលស្ថិតនៅក្បែរទឹកដីរុស្ស៊ី។ ប្រទេសដែលស្ថិតនៅជាប់រុស្ស៊ីព្រួយបារម្ភពីសន្តិសុខជាតិរបស់ខ្លួន បន្ទាប់ពីឃើញរុស្ស៊ីចាប់ពង្រាយទ័ព សន្ធឹកសន្ធាប់ នៅតាមព្រំដែនខាងកើត រុស្ស៊ី ជាពិសេសនៅ តាមព្រំដែនជាមួយអ៊ុយក្រែន។ តាមមេបញ្ជាការទ័ពអាមេរិកម្នាក់ ទ័ពរុស្ស៊ីជាទ័ពឆ្នើម ទទួលការបណ្តុះបណ្តាលខ្ពស់ និងមានសមត្ថភាពប្រយុទ្ធដណ្តើមបានទីតាំង តែក្នុងរយៈពេល ៤ ទៅ៥ថ្ងៃ ប្រសិនបើគេបានទទួលបញ្ជាពីថ្នាក់លើ។ ប្រទេសអឺរ៉ុបដែលជាសមាជិកអូតង់ខ្លាចថា រុស្ស៊ី ដែលបានចងភ្ជាប់ទឹកដីគ្រីមេចូលជាទឹកដីរបស់ខ្លួនហើយនោះ នឹងអាចប្រើទ័ពឈ្លានពានប្រទេសពួកគេបន្តទៀត។
នៅក្នុងជំនួបកំពូលអូតង់ នៅព្រុចស៊ែល ប្រទេសជុំវិញសមុទ្របាល់ទិក ដែលបារម្ភខ្លាំងពីសន្តិសុខរបស់ខ្លួន ទល់នឹងការគំរាមកំហែងរបស់រុស្ស៊ី ថែមទាំងបានទាមទារឲ្យមានការបោះមូលដ្ឋានទ័ពជាអចិន្ត្រៃយ៍របស់អូតង់ក្នុងទឹកដីរបស់ខ្លួន។ អគ្គលេខាធិការរបស់អង្គការអូតង់បានអះអាងថា អូតង់នៅមិនទាន់ឈានដល់ដំណាក់កាលនោះទេ ព្រោះអូតង់មិនចង់ចាក់សាំងលើភ្លើង គឺរុញឲ្យរុស្ស៊ីកាន់តែខឹងក្រោធនោះទេ។ អូតង់ចង់បន្ថយភាពតានតឹង និងដើរតាមផ្លូវចរចាការទូត ដោយជៀសវាងការប្រឈមមុខផ្នែកអាវុធជាមួយ រុស្ស៊ី។
ប៉ុន្តែ យ៉ាងណាក៏ដោយ ក្នុងពេលរង់ចាំឲ្យរុស្ស៊ីដកទ័ពចេញពីព្រំដែនជាមួយអ៊ុយក្រែន ប្រទេសសមាជិករបស់អង្គការអាត្លង់ទិកមួយចំនួន បានសម្រេចចិត្ត ពង្រឹងវត្តមានទ័ព តាមតែអាចធ្វើទៅបាន នៅក្នុងទឹកដីប្រទេសសមាជិក អូតង់ ដែលស្ថិតនៅក្បែររុស្ស៊ី។ ជាក់ស្តែង តាំងតែពីអូតង់សំគាល់ឃើញទ័ពរុស្ស៊ី ត្រូវពង្រាយយ៉ាងច្រើន នៅតាមព្រំដែនអ៊ុយក្រែន អូតង់បានបញ្ជូនយន្តហោះចម្បាំង កាន់តែច្រើន ទៅហោះហើរការពារដែនអាកាសឲ្យប្រទេសសមាជិក នៅតំបន់សមុទ្របាល់ទិក។ កាលពីដើមសប្តាហ៍មុន អាមេរិកជាសមាជិកមួយដែរ ទើបបានបញ្ជូនយន្តហោះចម្បាំង ១០គ្រឿងទៀត ទៅហោះក្នុងដែនអាកាសរបស់ប្រទេសលេតូនី អេស្តូនី និងលីទុយអានី ដែលបើតាមអូតង់ គឺនៅមិនទាន់មានសមត្ថភាពយោធាគ្រប់គ្រាន់ដើម្បីការពារដែនអាកាសរបស់ខ្លួន។ អាមេរិក ដែលទើបបញ្ជាឲ្យអង្គការណាសាផ្អាកសហប្រតិបត្តិការជាមួយរុស្ស៊ី កាលពីថ្ងៃពុធ ម្សិលមិញ បានបញ្ជូននាវាចម្បាំងរបស់ខ្លួនរួចហើយ ទៅក្នុងសមុទ្រខ្មៅ។
វិបត្តិអ៊ុយក្រែន៖ រុស្ស៊ីមានអារម្មណ៍ខ្លួនត្រូវប្រទេសលោកខាងលិចបោកប្រាស់
ដើម្បីអាចយល់រឿងនេះ គេត្រូវត្រលប់ទៅមើលកិច្ចព្រមព្រៀងឆ្នាំ ១៩៩០ នៅពេលដែលរដ្ឋមន្រ្តីការបរទេសអាមេរិក ដើម្បីទាក់ទាញសូវៀតឲ្យគាំទ្រ ការបង្រួបបង្រួមអាល្លឺម៉ង់ បានសន្យាទៅភាគី សហភាពសូវៀតថា នឹង អូតង់ សម្ព័ន្ធមិត្តខាងលិច នឹងមិនដាក់ជើង ពង្រីកឥទ្ធិពលរបស់ខ្លួន ទៅតំបន់ខាងកើតទេ។ ប៉ុន្តែ នៅឆ្នាំ ១៩៩៩ ប្រទេសប៉ូឡូញ សាធារណរដ្ឋឆែក និងហុងគ្រី ដែលបែកចេញពីសហភាពសូវៀតបានចូលរួមជាមួយ អូតង់។ ប្រាំឆ្នាំក្រោយ នៅឆ្នាំ ២០០៤ ប៊ុលហ្គារី រូម៉ានី ស្លូវ៉ាគី និងប្រទេសជាប់សមុទ្រប៉ាល់ទិកទាំងបី បានចូលរួមជាមួយអូតង់។ ការចូលរួមជាសមាជិករបស់ប្រទេសអតីតសហភាពសូវៀត ទៅក្នុងអង្គការអូតង់ ដែលដឹកមុខដោយអាមេរិក ត្រូវបានរុស្ស៊ីចាត់ទុកជាការក្បត់ការសន្យារបស់អូតង់ និងជាការគំរាមកំហែងដល់ដែនឥទ្ធិពលរបស់រុស្ស៊ី។
នៅឆ្នាំ ២០០៨ ប្រទេសអ៊ុយក្រែន ដែលស្ថិតនៅជាប់រុស្ស៊ីច្រើនជាងគេ សឹងតែបានចុះឈ្មោះ ក្លាយជាសមាជិករបស់អូតង់ ទៅហើយ។ ប៉ុន្តែ គឺនាយករដ្ឋមន្រ្តី អាល្លឺម៉ង់ដែលបានជួយទប់កុំទាន់ឲ្យអ៊ុយក្រែន ចូលជាសមាជិករបស់អូតង់ ដែលនោះ នឹងបង្កឲ្យរុស្ស៊ីក្តៅក្រហាយ។
ដោយសារតែចាញ់កលប្រទេសលោកខាងលិច ម្តង ជាពីរដង រុស្ស៊ី លែងជឿទុកចិត្តប្រទេសលោកខាងលិច ទៀត។ ជាពិសេស នៅពេលអាមេរិកចាប់ផ្តើមលូកដៃចូលកិច្ចការនយោបាយរបស់អ៊ុយក្រែន ដែលតាមពិតទៅ ជាទឹកដី ស្ថិតនៅចុងច្រមុះរបស់រុស្ស៊ី និងដែលរុស្ស៊ីកំពុងទាក់ទាញមកចូលរួម ក្នុងសហព័ន្ធដែលរុស្ស៊ីដឹកនាំ។
តាមរយៈការចងភ្ជាប់គ្រីមេ មកក្នុងទឹកដីរបស់ខ្លួន រុស្ស៊ីនៅតែបង្ហាញភាពត្រឹមត្រូវតាមច្បាប់ និងភាពសមហេតុ សមផល ក្នុងការការពារទឹកដី និងដែនឥទ្ធិពលរបស់ខ្លួនប្រឈមមុខនឹងការពង្រីកឥទ្ធិពលរបស់ប្រទេសលោកខាងលិច។ សម្រាប់ម៉ូស្គូ វាមិនមែនជាការឈ្លានពាន ហើយការពង្រាយទ័ពនៅក្នុងទឹកដីរបស់ខ្លួន គឺជារឿងស្របច្បាប់។
សម្រាប់អូតង់ និងប្រទេសលោកខាងលិច ម៉ូស្គូកំពុងប្រើកម្លាំងចង់រំលោភឈ្លានពានចង់គ្រប់គ្រងប្រទេសតូចតាច អតីតសហភាពសូវៀត ឲ្យមកនៅក្នុងដែនឥទ្ធិពលរបស់ខ្លួន។ ក្នុងគំនិតរបស់ប្រទេសលោកខាងលិច រុស្ស៊ីមិនព្រមទទួលស្គាល់ការពិត នោះ គឺប្រទេសនៅអឺរ៉ុបខាងកើត ដែលរំដោះខ្លួនចេញពីសហភាពសូវៀត លែងចង់ស្ថិតនៅក្រោមដែនឥទ្ធិពលរបស់រុស្ស៊ីដូចមុនទៀតហើយ។ អូតង់ជាដើម បាននិយាយការពារខ្លួនថា ប្រទេសអតីតសហភាពសូវៀត បានចុះចូលជាមួយអូតង់ ក៏ដើម្បីសុំឲ្យអូតង់ជួយការពារសន្តិសុខរបស់ពួកគេ ពីការគំរាមកំហែងរបស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ