អាមេរិក -

អត្ថបទចុះផ្សាយនៅថ្ងៃ ព្រហស្បតិ៍ 04 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 04 តុលា 2012

លោកមីត រ៉ូមនីមានប្រៀបលើលោកអូបាម៉ាក្នុងការជជែកដេញដោលគ្នាជុំទីមួយ

លោកអូបាម៉ា និងលោករ៉ូមនី គូប្រជែងក្នុងការបោះឆ្នោតប្រធានាធិបតីអាមេរិក

REUTERS/Michael Reynolds

ដោយ សេង ឌីណា

មុនដល់ពេលបោះឆ្នោតប្រធានាធិបតី នៅថ្ងៃទី៦ វិច្ឆិកា ខាងមុខ លោកអូបាម៉ា និងលោកមីត រ៉ូមនី (Mitt Romney) ត្រូវធ្វើការជជែកដេញដោលគ្នា មួយទល់នឹងមួយ ចំនួន ៣លើក។ ការជជែកដេញដោលគ្នាលើកទី១ បានប្រព្រឹត្តធ្វើទៅ កាលពីយប់ម្សិលមិញ ហើយសាធារណមតិជាទូទៅ នៅអាមេរិក យល់ថា លោកមីត រ៉ូមនី គឺជាអ្នកមានប្រៀបលើលោកអូបាម៉ា។

សេចក្តីរាយការណ៍របស់ សេង ឌីណា

ស្តាប់ (01:52)

04/10/2012

នៅក្នុងប្រវត្តិនៃការជជែកដេញដោលគ្នា រវាងបេក្ខជនប្រធានាធិបតីអាមេរិក នាពេលកន្លងមក គេកម្រនឹងឃើញមានការជជែកដេញដោលគ្នាណា ដែលមតិស្ទើរតែជាឯកច្ឆន្ទ កំណត់ច្បាស់ៗថា បេក្ខជនណាឈ្នះ ហើយបេក្ខជនណាចាញ់ ដូចជា ការជជែកដេញដោលគ្នា រវាងលោកអូបាម៉ា និងលោករ៉ូមនី កាលពីយប់មិញ។

អ្នកវិភាគស្ទើរតែគ្រប់គ្នាទាំងអស់ សុទ្ធតែយល់ថា លោកមីត រ៉ូមនី បេក្ខជនមកពីគណបក្សសាធារណរដ្ឋ គឺជាអ្នកមានប្រៀបលើលោកអូបាម៉ា។ ពលរដ្ឋអាមេរិក ដែលជាអ្នកគូសសន្លឹកឆ្នោត កំណត់ជោគវាសនាបេក្ខជនទាំងពីរ ក៏ហាក់ដូចជាមើលឃើញដូចគ្នានេះដែរ។ ការស្ទាបស្ទង់មតិជាច្រើន ដែលធ្វើឡើងភ្លាមៗ ក្រោយការជជែកដេញដោលគ្នា យប់មិញនេះ សុទ្ធតែបង្ហាញថា ពលរដ្ឋអាមេរិកប្រមាណជា ៦៧% ឆ្លើយថា លោកមីត រ៉ូមនី គឺជាអ្នកឈ្នះ ក្នុងការជជែកដេញដោលគ្នានេះ។

ក៏ប៉ុន្តែ មានការចោទជាសំណួរថា តើជោគជ័យក្នុងការជជែកដេញដោលគ្នានេះ អាចនឹងជួយលោករ៉ូមនីបានប៉ុណ្ណា ក្នុងការដណ្តើមសន្លឹកឆ្នោតពីលោកអូបាម៉ា?

គិតរហូតមកទល់នឹងមុនពេលមានការជជែកដេញដោលគ្នា កាលពីយប់មិញ គ្រប់ការស្ទាបស្ទង់មតិទាំងអស់ សុទ្ធតែបង្ហាញថា លោកអូបាម៉ា គឺជាអ្នកមានឱកាសឈ្នះ ក្នុងការបោះឆ្នោតនៅខែក្រោយ។ ការស្ទាបស្ទង់មតិរបស់ Reuters/Ipsos នៅក្រោយការជជែកដេញដោលគ្នានេះ បង្ហាញថា លោកអូបាម៉ា នៅតែនាំមុខលោករ៉ូមនី គឺ ៤៧% ទល់នឹង ៤១%។ ហើយនៅសល់តែមួយខែទៀតប៉ុណ្ណោះ ដល់ថ្ងៃបោះឆ្នោត។

អ្នកវិភាគជាច្រើន ដែលជំនាញខាងការបោះឆ្នោតប្រធានាធិបតីអាមេរិក បានអះអាងថា កន្លងមក ការជជែកដេញដោលគ្នារវាងបេក្ខជនប្រធានាធិបតីមានឥទ្ធិពលតិចតួចណាស់ ទៅលើការសម្រេចចិត្តរបស់ម្ចាស់ឆ្នោត។ អ្នកណាដែលបានសម្រេចចិត្តជ្រើសរើសបេក្ខជនណាមួយហើយ កម្រនឹងប្តូរចិត្តវិញ ដោយសារតែការជជែកដេញដោលគ្នា រវាងបេក្ខជនណាស់។ ក៏ប៉ុន្តែ ឱកាសសម្រាប់លោករ៉ូមនី នៅតែមាន ដោយសារតែនៅមានពលរដ្ឋអាមេរិកច្រើនទៀត ដែលនៅមិនទាន់សម្រេចចិត្តច្បាស់លាស់នៅឡើយ។

ដូច្នេះ លោករ៉ូមនី នៅសល់ពេលមួយខែ និងការជជែកដេញដោលគ្នាពីរលើកទៀត ដើម្បីដេញឲ្យទាន់ និងយកឈ្នះលោកអូបាម៉ា៕