រូម៉ានី -

អត្ថបទចុះផ្សាយនៅថ្ងៃ ចន្ទ 30 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 30 កក្កដា 2012

ប្រជាមតិម្សិលមិញមិនអាចទម្លាក់ប្រធានាធិបតីពីអំណាចទេ

លោកប្រធានាធិបតី Traian Basescu ថ្លែងទៅកាន់អ្នកកាសែត នៅថ្ងៃអាទិត្យ៣០ កក្កដា ក្រោយពេលចេញលទ្ធផលប្រជាមតិ

REUTERS/Bogdan Cristel

ដោយ កែវ ឆាយា

មូលហេតុ មកពីអត្រាអ្នកទៅបោះឆ្នោត តាមតួលេខគ.ជ.ប. គឺតែ៤៥,៩២% បានន័យថា ទាបជាង កម្រិត៥០% ទាមទារដោយច្បាប់។ ម៉្លោះហើយបានជាលទ្ធផលប្រជាមតិនោះមិនអាចយកជាការបានឡើយ ទោះបីក្នុងចំណោមអ្នកទៅបោះឆ្នោត មានដល់ទៅជាង ៨៦% ដែលគាំទ្រដល់ការទម្លាក់រូបលោកប្រធានាធិបតី Traian Basescu ពីអំណាចក្តី។ ដូច្នេះ គាត់នឹងបន្តកាន់តំណែងខ្លួនរហូតដល់ផុតអាណត្តិ នៅឆ្នាំ២០១៤។

សេចក្តីរាយការណ៍របស់ កែវ ឆាយា ពីម៉ូស្គូ

ស្តាប់ (02:23)

30/07/2012

ប្រជាមតិម្សិលមិញ ធ្វើឡើងគឺ ទៅតាមការសម្រេចចិត្តរបស់រដ្ឋសភារូម៉ានី ដែលកាលពីថ្ងៃទី៦កក្កដា ដោយសំឡេងភាគច្រើន នៃពួកអ្នកតំណាងរាស្ត្រខាង “សម្ព័ន្ធកណ្តាលនិយម លំអៀងឆ្វេង” មានភាគច្រើន ដល់ទៅ២៥៦ លើ៤៥២ និងជាបក្សពួកលោកនាយករដ្ឋមន្ត្រី Victor Ponta បានបោះឆ្នោតដកការទុកចិត្តពីលោកប្រធានាធិបតី Traian Basescu តំណាងឲ្យ “កម្លាំងកណ្តាលនិយមលំអៀងស្តាំ”។

ដកនេះ គឺក្រោមបទចោទប្រកាន់រូបប្រមុខរដ្ឋនោះ ថា ៖ រំលោភលើរដ្ឋធម្មនុញ្ញ ដោយចេះតែលូកដៃជ្រៀតចូលក្នុងសកម្មភាពស្ថាប័នប្លែកៗ, ប្រើអំណាចខ្លួនជ្រុល ទាំងឆ្លៀតដាក់គ្នីគ្នាខ្លួន ឲ្យកាន់តំណែងនានាក្នុងរដ្ឋ, ធ្វើនយោបាយរឹតត្បិតសន្សំសំចៃគ្មានប្រណី នាំជាទុក្ខសោកដល់ប្រជាជន បែបយ៉ាងកាត់បន្ថយប្រាក់ខែនិយោជិតរដ្ឋ កាត់ប្រាក់រ៉ឺត្រែត បន្ថយប្រាក់ជំនួយសង្គម ដើម្បីបំពេញខ្លបត្រចៀកតាមល័ក្ខខ័ណ្ឌ របស់ “មូលនិធិរូបិយវត្ថុអន្តរជាតិ” FMI ជាម្ចាស់ជំនួយបង្គាប់បញ្ជាលើប្រទេសរូម៉ានីដែលធ្លាក់ក្នុងវិបត្តិធ្ងន់ធ្ងរ។ គួរនិយាយថា រូម៉ានីដែលកម្ពុជាមានទំនាក់ទំនងការទូតជាមួយ គឺជាប្រទេសមួយក្រីក្រជាងគេនៅអឺរ៉ុប ដែលត្រូវបានទទួលចូលជាសមាជិកសហភាពអឺរ៉ុប តាំងពីឆ្នាំ២០០៧មក។

គួរនិយាយថា លោកប្រធានាធិបតី Traian Basescu តាំងពីដើមទីមក តែងចាត់ទុកការសម្រេចចិត្តនោះ របស់រដ្ឋសភា ធ្វើដោយគូសត្រូវគាត់ លោកនាយករដ្ឋមន្ត្រី Victor Ponta ទោះបីវាត្រូវបានទទួលស្គាល់ដោយតុលាការធម្មនុញ្ញថា ស្របច្បាប់ក៏ដោយ គឺមានន័យជារដ្ឋប្រហារសោះ។

យប់មិញ ក្រោយពីឮដំណឹង ស្តីអំពីបរាជ័យប្រជាមតិនោះ លោកប្រធានាធិបតី Traian Basescu ថ្លែងដោយមោទនភាពថា លទ្ធផលដែលមានសឲ្យឃើញថា ប្រជាជនរូម៉ានីនាំគ្នាច្រានចោលរដ្ឋប្រហារនោះឯង ដែលធ្វើដោយមនុស្សមួយក្តាប់។

ជាការកត់សម្គាល់ សេចក្តីសម្រេចរបស់រដ្ឋសភារូម៉ានី ដកការទុកចិត្តពីលោកប្រធានាធិបតី Traian Basescu បានញ៉ាំងឲ្យមានប្រតិកម្មអវិជ្ជមានពីខាងសហភាពអឺរ៉ុប និងស.រ.អា. ដោយមកពីវាត្រូវបានអនុម័តយកទាំងប្រញាប់ប្រញាល់ពេក។

លោកប្រធានាធិបតី Traian Basescu ដែលកាន់អំណាចបាន៨ឆ្នាំហើយ តាំងពីឆ្នាំ២០០៤មក នឹងបន្តស្ថិតនៅក្នុងតំណែងខ្លួន លុះរហូតដល់ផុតអាណត្តិ នៅឆ្នាំ២០១៤ ខាងមុខ៕

tags: រូម៉ានី