កម្ពុជា -

អត្ថបទចុះផ្សាយនៅថ្ងៃ អង្គារ 17 មេសា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 17 មេសា 2012

ឆ្នាំនេះគ្រោះថ្នាក់ចរាចរណ៍ថយចុះក្នុងពេលបុណ្យចូលឆ្នាំ

គ្រោះថ្នាក់ចរាចរណ៍តែងតែកើតមាន នៅក្នុងពេលបុណ្យចូលឆ្នាំម្តងៗ

RFI/Channa Siv

ដោយ លី ម៉េងហួរ

៤៨នាក់ ស្លាប់ និងរបួស ៣៤៤នាក់ បណ្តាលមកពីគ្រោះថ្នាក់ចរាចរណ៍ ១៦៥លើក នៅទូទាំងប្រទេស ក្នុងអំឡុងពេលបុណ្យចូលឆ្នាំប្រពៃណីជាតិ រយៈពេល ៥ថ្ងៃ ចាប់ពីថ្ងៃទី១២ មេសា ដល់ថ្ងៃទី១៦មេសា។ បុណ្យចូលឆ្នាំខ្មែរ កាលពីឆ្នាំមុន គ្រោះថ្នាក់ចរាចរណ៍ នៅកម្ពុជា បានសម្លាប់មនុស្ស ៥៨ នាក់ និងរបួស ៤៨៤ នាក់ ក្នុងគ្រោះថ្នាក់ចរាចរណ៍ ២១១ លើក។

សេចក្តីរាយការណ៍របស់ លី ម៉េងហួរ ពីភ្នំពេញ

ស្តាប់ (01:50)

17/04/2012

គ្រោះថ្នាក់ចរាចរណ៍ នៅពេលបុណ្យចូលឆ្នាំ ដែលទើបតែកន្លងផុតទៅ នៅទូទាំងប្រទេស មានចំនួន ១៦៥ ករណី បណ្តាលឲ្យមនុស្សស្លាប់ ៤៨ នាក់ និងរបួសចំនួន ៣៤៤ នាក់។ នៅខេត្តតាកែវ មានអត្រាខ្ពស់ជាងគេ រហូតដល់ ២០ លើក ខេត្តកំពង់ចាម មានចំនួន ១៨ លើក និងខេត្តបាត់ដំបង មាន ១៤ លើក។ នេះបើតាមលោកឧត្តមសេនីយ៍ទោ ហ៊ឹម យ៉ាន ប្រធាននាយកដ្ឋានសណ្តាប់ធ្នាប់ របស់អគ្គស្នងការដ្ឋាននគរបាលជាតិ។

លោកឧត្តមសេនីយ៍ទោ ហ៊ឹម យ៉ាន បានបន្ថែមថា គ្រោះថ្នាក់ចរាចរណ៍ ពេលបុណ្យចូលឆ្នាំ គិតចាប់ពីថ្ងៃទី១២ ដល់ថ្ងៃទី១៦មេសា កើតឡើង មកពីការបើកបរលើសល្បឿនកំណត់ មានរហូតដល់ ៥០%។ បើកបរក្នុងភាពស្រវឹងមាន ១៣%។ បើកជែងបង្កគ្រោះថ្នាក់ មាន ១០%។ ការមិនគោរពសិទ្ធិជាអាទិភាព និងមិនប្រកាន់ស្តាំមាន ១០%។

ទោះជាយ៉ាងណាក៏ដោយ លោកឧត្តមសេនីយ៍ទោ ហ៊ឹម យ៉ាន បានបន្ថែមថា អត្រាគ្រោះថ្នាក់ចរាចរណ៍ ពេលបុណ្យចូលឆ្នាំ នៅឆ្នាំនេះ បានថយចុះ ២២ % បើធៀបនឹងរយៈពេលបុណ្យចូលឆ្នាំ កាលពីឆ្នាំមុន។ នោះគឺថយពី ២១១ លើក មកនៅត្រឹម ១៦៥ លើក។ រីឯអ្នកស្លាប់ កាលឆ្នាំមុន មាន ៥៨ នាក់ តែនៅឆ្នាំនេះ មានតែ ៤៨ នាក់ប៉ុណ្ណោះ។ ចំណែកអ្នករបួស ឆ្នាំមុន មាន ៤៨៤ នាក់ នៅឆ្នាំនេះ មានចំនួន ៣៤៤ នាក់។

ការថយចុះនៃអត្រាគ្រោះថ្នាក់ចរាចរណ៍ ក្នុងឱកាសបុណ្យចូលឆ្នាំថ្មីនេះ ត្រូវបានលោកឧត្តមសេនីយ៍ ឲ្យដឹងថា មកពីប្រសិទ្ធភាពនៃការរឹតបន្តឹងការអនុវត្តច្បាប់ ការរឹតបន្តឹងលើការដឹកជញ្ជូនលើសចំណុះ ការត្រួតពិនិត្យជាតិស្រវឹង ការអប់រំ និងការកើនឡើងនូវការយល់ដឹងរបស់ប្រជាជន ជាដើម៕