រុស្ស៊ីប្រាប់ថាដកកងទ័ពចេញពីព្រំដែនអ៊ុយក្រែន តែបន្តដាក់សម្ពាធរដ្ឋាភិបាលក្រុងគៀវ
នៅថ្ងៃចន្ទម្សិលមិញ ក្រសួងការពារជាតិរុស្ស៊ីបានប្រកាសថា រុស្ស៊ីកំពុងដកកងទ័ពនៅតាមព្រំដែនជាមួយអ៊ុយក្រែន។ ប៉ុន្តែនៅថ្ងៃអង្គារនេះ អង្គការអូតង់បានប្រាប់ថា មិនទាន់អាចបញ្ជាក់បានទេថា តើរុស្ស៊ីពិតជាបានដកទ័ពមែនរឺយ៉ាងណា។ អាជ្ញាធរអ៊ុយក្រែនដែលបារម្ភខ្លាចរុស្ស៊ីឈ្លានពានអ៊ុយក្រែន បានសំដែងការប្រុងប្រយ័ត្នចំពោះព័ត៌មាននៃការដកកងទ័ពរុស្ស៊ីពីព្រំដែនអ៊ុយក្រែន។ ទោះយ៉ាងណាក្តី រុស្ស៊ីបានសម្រេចដំឡើងថ្លៃឧស្ម័នដែលត្រូវផ្តល់អោយអ៊ុយក្រែន បន្តដាក់សម្ពាធលើរដ្ឋាភិបាលក្រុងគៀវ។ នៅអ៊ុយក្រែនថ្ងៃអង្គារនេះ សភាក្រុងគៀវបានបោះឆ្នោតសម្រេចអោយសកម្មជនគាំទ្រអឺរ៉ុប ដែលធ្លាប់បានតស៊ូនៅក្រុងគៀវ ដាក់អាវុធចុះអោយអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅថ្ងៃចន្ទម្សិលមិញ រុស្ស៊ីបានដកកងទ័ពខ្លួនជាបន្តបន្ទាប់ចេញពីព្រំដែនអ៊ុយក្រែន។ ប៉ុន្តែ ក្រសួងការពារជាតិអ៊ុយក្រែនមិនបានដឹងពីចំនួនទ័ពដែលរុស្ស៊ីបានដកទេ។ កាលពីថ្ងៃសុក្រ អ្នកទទួលខុសត្រូវអាមេរិកនានាប្រាប់ថា កងទ័ពរុស្ស៊ីនៅតាមព្រំដែនអ៊ុយក្រែន មានប្រមាណ៤ម៉ឺននាក់។ ប៉ុន្តែ ខាងអឺរ៉ុបគិតថា ទ័ពរុស្ស៊ីមានប្រមាណ៣ម៉ឺននាក់ប៉ុណ្ណោះ។
គេក៏មិនបានដឹងដែរថា រុស្ស៊ីដកទ័ពនេះដើម្បីផ្លាស់វេនជាមួយទ័ពថ្មី រឺក៏ដើម្បីសម្របតាមការយល់ឃើញរបស់អាមេរិក ដែលថា ការដកកងទ័ពគឺជាដំណោះស្រាយរកច្រកចេញសម្រាប់វិបត្តិអ៊ុយក្រែន។ កាលពីយប់ថ្ងៃអាទិត្យ ក្រោយពីបានជួបជាមួយប្រមុខការទូតរុស្ស៊ី ស៊ែរហ្កី ឡាវ្រ៉ូវ ប្រមុខការទូតអាមេរិក ចន ឃែររី បានលើកឡើងពីការយល់ឃើញបែបនេះ។
ម្សិលមិញ ក្នុងការពិភាក្សាជាមួយប្រមុខដឹកនាំអាល្លឺម៉ង់ អង់ហ្កឺឡា មែរគេល ប្រធានាធិបតីរុស្ស៊ី ពូទីន បានគូសបញ្ជាក់ពីសារៈសំខាន់នៃកំណែទម្រង់ក្នុងស្ថាប័នអ៊ុយក្រែន ដើម្បីការពារប្រជាជនដែលរស់នៅគ្រប់តំបន់ក្នុងទឹកដីអ៊ុយក្រែន។ រុស្ស៊ីលើកឡើងទៀតថា ការកើនឡើងនៃកងកម្លាំងនៅតាមព្រំដែនជាមួយអ៊ុយក្រែន គឺធ្វើឡើងក្នុងក្របខណ្ឌយោធាប៉ុណ្ណោះ។ កន្លងមក ក្រុងម៉ូស្គូតែងបដិសេធថា មិនបានផ្តុំទ័ពនៅតាមព្រំដែនរុស្ស៊ី-អ៊ុយក្រែននោះទេ។ រុស្ស៊ីពន្យល់ថា អ្នកជំនាញអន្តរជាតិធ្លាប់ចុះទៅរុស្ស៊ីពិនិត្យស្ថានភាព និងបានសន្និដ្ឋានថា គ្មានសកម្មភាពយោធាអ្វីខុសធម្មតានោះទេ។
ទោះជាបានដកកងទ័ពពីព្រំដែនអ៊ុយក្រែនក្តី រុស្ស៊ីនៅតែបន្តដាក់សម្ពាធលើអ៊ុយក្រែន។ នៅថ្ងៃអង្គារនេះ ក្រុមហ៊ុនឧស្ម័នដ៏ធំរបស់រុស្ស៊ី ឈ្មោះថា ហ្កាសព្រូម Gazprom បានប្រកាសដំឡើងថ្លៃឧស្ម័នដល់អ៊ុយក្រែន ដល់៣៨៥ដុល្លារ៥០សេន ក្នុងមួយពាន់ម៉ែត្រគូប សម្រាប់ត្រីមាសទី២។ តម្លៃនេះ គឺកើនដល់ជាង១ភាគ៣ នៃតម្លៃកន្លងមក។ រុស្ស៊ីបានសម្រេចបិទបញ្ចប់អត្ថប្រយោជន៍ឧស្ម័នដែលខ្លួនធ្លាប់ផ្តល់អោយអ៊ុយក្រែន កាលពីខែធ្នូ ឆ្នាំ២០១៣ ក្នុងពេលដែលលោក វិចទ័រ យ៉ានូកូវិច នៅធ្វើជាប្រធានាធិបតីអ៊ុយក្រែននៅឡើយ។
នៅថ្ងៃអង្គារនេះរហូតដល់ថ្ងៃពុធស្អែក រដ្ឋមន្ត្រីការបរទេសប្រទេសសមាជិកអង្គការអូតង់ទាំង២៨ បានជួបពិភាក្សាគ្នា នៅក្រុងព្រុចសែលសម្រេចគាំទ្របណ្តាប្រទេសអឺរ៉ុបខាងកើតអោយខ្លាំងក្លាបន្ថែមទៀត ដើម្បីប្រឈមនឹងរុស្ស៊ីក្នុងវិបត្តិអ៊ុយក្រែននេះ។ ទន្ទឹមនេះដែរ សភាអ៊ុយក្រែនក៏បានអនុម័តសម្រេចអោយមានសមយុទ្ធយោធា ក្នុងទឹកដីអ៊ុយក្រែនជាមួយបណ្តាប្រទេសអូតង់ និងសហភាពអឺរ៉ុប ចាប់ពីខែឧសភាដល់ខែតុលា ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ