វៀតណាមបានអនុញ្ញាតឲ្យអាមេរិកស្មុំកូនវៀតណាមទៅចិញ្ចឹមជាថ្មី
ប្រទេសវៀតណាម និងអាមេរិកបានបញ្ជាក់ឲ្យដឹងកាលពីថ្ងៃទី១៦ កញ្ញាថា ការស្មុំកូនវៀតណាមទៅចិញ្ចឹមដោយក្រុមគ្រួសារអាមេរិកំាងនឹងអនុញ្ញាតឲ្យមានជាថ្មី តែលើកនេះត្រូវគោរពតាមលក្ខខណ្ឌមួយចំនួន។ ការអនុញ្ញាតឲ្យពលរដ្ឋអាមេរិកំាងអាចស្មុំកូនវៀតណាមទៅចិញ្ចឹមជាថ្មីពេលនេះបានធ្វើឡើង បន្ទាប់ពីមានការហាមឃាត់អស់រយៈពេល ៦ឆ្នំា។ ការហាមឃាត់ដោយសារតែមានរឿងអាស្រូវផ្ទុះឡើងជុំវិញការលក់កូនក្មេង និងការរំលោភបំពានលើច្បាប់ស្មុំកូន។
ចុះផ្សាយនៅថ្ងៃ៖
ស្តាប់ - ០១:៥០
ការអនុញ្ញាតឲ្យអាមេរិកអាចស្មុំកូនវៀតណាមទៅចិញ្ចឹមជាថ្មីពេលនេះត្រូវបានក្រសួងយុត្តិធម៌វៀតណាមប្រគល់អាជ្ញាប័ណ្ណទៅឲ្យទីភ្នាក់ងារស្មុំកូនរបស់អាមរិកចំនួនពីរនៅក្នុងប្រទេសវៀតណាម។ ជាសរុបបច្ចុប្បន្ននេះ មានទីភ្នាក់ងារស្មុំកូនបរទេសចំនួន ៣៦ ដែលកំពុងប្រចំាការនៅក្នុងទឹកដីវៀតណាម រួមមានបារំាង អ៊ីតាលី ឬមួយក៏ទីភ្នាក់ងារស្មុំកូនរបស់ប្រទេសស៊ុតអែតជាដើម។ តែសម្រាប់ទីភ្នាក់ងារស្មុំកូនរបស់អាមេរិកត្រូវបានគេអនុញ្ញាតឲ្យយកកូនក្មេងដែលមានអាយុចាប់ពី ៥ឆ្នំាឡើងទៅ និងដែលកូនក្មេងនោះមានតម្រូវការចំាបាច់ពិសេស។ លោកតាដ គីនកៃ ស្ថាបនិកអង្គការជួយក្មេងកំព្រាបានបញ្ជាក់ថា វាពិតជាត្រឹមត្រូវដែលគេគួរតែជួយស្រោចស្រង់ក្មេងកព្រាដែលកំពុងជួបការលំបាកខ្លំាង ឬមួយក៏កូនកំព្រាណាដែលពិបាកនឹងរកគ្រួសារដើម្បីយល់ព្រមទទួលយក។
គួរជម្រាបជូនថា មុននឹងច្បាប់ហាមស្មុំកូនវៀតណាមពីគ្រួសារអាមេរិកំាងចូលជាធរមានក្នុងឆ្នំា ២០០៨ កូនស្មុំភាគច្រើនមានអាយុក្រោម ២ឆ្នំា ហើយអ្នកដែលមានអាយុលើសពី ៥ឆ្នំា មានប្រមាណតែ ៥% ប៉ុណ្ណោះ។ ការដែលក្រុងហាណូយ និងវ៉ាស៊ីនតោនបានអនុម័តហាមមិនឲ្យមានការស្មុំកូនវៀតណាមពីគ្រួសារអាមេរិកំាងនោះ មកពីអាមេរិកបារម្ភពីព័ត៌មានដែលថា មានកូនស្មុំមួយចំនួនត្រូវគ្រួសារយកទៅលក់ ឬមួយក៏បំបរបង់ចោល។ តំាងពីពេលនោះមក រដ្ឋអំណាចវៀតណាមក៏បានធ្វើការកែប្រែច្បាប់ទាក់ទងនឹងបញ្ហានេះដើម្បីការពារកូនស្មុំរបស់ខ្លួន។ អាមេរិកបានសាទរចំពោះការខិតខំប្រឹងប្រែងរបស់រដ្ឋាភិបាលក្រុងហាណូយលើប្រព័ន្ធការពារកូនក្មេងឲ្យសមស្របទៅនឹងច្បាប់អន្តរជាតិ។
អ្វីជាការកត់សម្គាល់ ការអនុញ្ញាតឲ្យគ្រួសារអាមេរិកអាចស្មុំកូនវៀតណាមទៅចិញ្ចឹមជាថ្មីពេលនេះបានធ្វើឡើង ចំពេលដែលទំនាក់ទំនងនយោបាយ និងពាណិជ្ជកម្មរវាងអតីតគូសត្រូវទំាងពីរកំពុងចម្រើនទៅមុខនារយៈពេលប៉ុន្មានឆ្នំាចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ