អាជ្ញាធរអះអាងពីការប្រឹងប្រែងរបស់ខ្លួន ក្នុងការនាំយកវត្ថុដ៏មានតម្លៃក្នុងលោក ត្រលប់មកវិញ
មន្ត្រីជាន់ខ្ពស់ប៉ូលិសក្រសួងមហាផ្ទៃថ្លែងថា ការរកឃើញព្រះសិរីរិកធាតុ និងវត្ថុមានតម្លៃមួយចំនួនមកវិញ និងការចាប់ខ្លួនជនសង្ស័យ គឺដោយសារតែមានការចូលរួមពីប្រជាជន។ បន្ទាប់ពីបាត់ព្រះសារីរិកធាតុអស់រយៈពេលជិត២ខែកន្លងមក ក្រសួងមហាផ្ទៃបានបង្កើតគណៈកម្មការស៊ើបអង្កេតមួយ ដោយមានការស្រាវជ្រាវយ៉ាងស្វិតស្វាញ ខណៈដែលមានការរិះគន់ពីមហាជនដំណាលគ្នានោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ព្រះបរមសារីរិកធាតុ ដែលបានបាត់កាលពីខែធ្នូឆ្នាំទៅ ត្រូវបានសមត្ថកិច្ចរកឃើញកាលពីថ្ងៃព្រហស្បតិ៍ម្សិលមិញ ហើយត្រូវបានអះអាងថា មានសភាពដូចដើម ពេលនេះ បានស្ថិតនៅក្នុងការថែរក្សាពីសំណាក់មន្ត្រីសង្ឃជាន់ខ្ពស់នៃប្រទេសកម្ពុជា។ ជាមួយគ្នានេះ ព្រះបរមកោដ្ឋ និងព្រះសារីរិកធាតុក៏ត្រូវបានដង្ហែទៅតម្កល់ទុកនៅក្នុងព្រះបរមរាជវាំងផងដែរ ដើម្បីរង់ចាំថ្ងៃល្អ ដង្ហែទៅតម្កល់ទុកនៅភ្នំឧត្តុង្គវិញ។
លោកឧត្តមសេនីយ ឯក ម៉ក់ ជីតូ ប្រធាននាយកដា្ឋនកណ្តាលនគរបាលក្រសួងយុត្តិធម៌ក្រសួងមហាផ្ទៃ បានថ្លែងនៅថ្ងៃសុក្រនេះថា ការរកឃើញជនសង្ស័យដែលបានលួចព្រះបរមសារីរិកធាតុ និងវត្ថុមានតម្លៃនេះ គឺដោយអនុវត្តទៅតាមគោលនយោបាយ ភូមិឃុំមានសុវត្ថិភាព ពោលគឺប្រជាពលរដ្ឋចូលរួម និងជាអ្នកផ្តល់ដំណឹងដល់អាជ្ញាធរ។
កាលពីវេលាថ្ងៃត្រង់ម្សិលមិញ ព្រះបរមកោដ្ឋតម្កល់ព្រះសារីរិកធាតុព្រះពុទ្ធសាមនគោត្តមនៃយើង ត្រូវបានអាជ្ញាធរស្រាវជ្រាវរកឃើញនៅក្នុងភូមិកោះ ស្រុកទ្រាំង ខេត្តតាកែវ ដោយមានការឃាត់ខ្លួនជនសង្ស័យមួយរូបឈ្មោះ កែវ រស្មី ជាយុវជនអាយុ២៤ឆ្នាំ។
តាមការឲ្យដឹងពីអាជ្ញាធរមានសមត្ថកិច្ច ក្រៅពីការចាប់ឃាត់ខ្លួនជនសង្ស័យ គេបានរឹបអូសវត្ថុមានតម្លៃមួយចំនួន ដែលចោររូបនេះនឹងបក្សពួកបានលួចយកទៅ ហើយបញ្ចេញទៅទីផ្សារមិនទាន់អស់។ ក្នុងនោះមាន ព្រះបរមកោដ្ឋដែលតម្កល់ព្រះសារីរិកធាតុបិទជិត រូបព្រះពុទ្ធបដិមាករ ដែលចោរបកយកមាសទៅលក់ បកយកត្បូង គ្រឿងអលង្កា និងវត្ថុតាងដទៃទៀតជាច្រើន។
លោក ម៉ក់ ជីតូ ឲ្យដឹងទៀតថា អាជ្ញាធរកំពុងតែបន្តស្រាវជ្រាវបន្ថែមទៀត ក្នុងការប្រមូលភស្តុតាងនិងវត្ថុតាងនានា ដោយហេតុថា អំពើចោរកម្មដ៏កក្រើកនេះ ត្រូវបានសន្និដ្ឋានថា មានគ្នាលើសពីម្នាក់។ យ៉ាងណាក៏ដោយ មន្ត្រីប៉ូលិសរូបនេះ បានចាត់ទុកថា នេះគឺជាជោគជ័យមួយរបស់សមត្ថកិច្ចក្នុងការស្វែងរកព្រះសារីរិកធាតុត្រលប់មកវិញ ដោយមានការចូលរួមពីគ្រប់ផ្នែកដែលពាក់ព័ន្ធ។ ព្រះសារីរិកធាតុត្រូវបានប្រគេនដល់មន្ត្រីសង្ឃជាន់ខ្ពស់ កាលពីម្សិលមិញ ខណៈដែលគេមិនទាន់ដឹងថា នឹងត្រូវធ្វើពិធីសាសនាឡើងវិញនៅពេលណានៅឡើយទេ។
សូមរំលឹកថា ព្រះបរមកោដ្ឋព្រះបរមសារីរិកធាតុ និងវត្ថុមានតម្លៃជាច្រើន ដែលតម្កល់ទុកគោរពបូជានៅព្រះសក្យមុនីចេតិយ លើភ្នំឧត្តុង្គ ឬភ្នំព្រះរាជទ្រព្យ ត្រូវក្រុមចោរលួចយកទៅបាត់ នៅវេលាយប់ទៀបភ្លឺ ថ្ងៃទី១០ ខែធ្នូ ឆ្នាំ២០១៣។ ក្រសួងមហាផ្ទៃបានបង្កើតគណៈកម្មការស៊ើបអង្កេតមួយឡើង ដោយមានការឃាត់ខ្លួនឆ្មាំយាមមួយចំនួនទៅសាកសួរ ក្នុងនោះ មួយចំនួនត្រូវបានអាជ្ញាធរដោះលែងវិញ ដោយសារមិនមានការពាក់ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ