បន្ទាប់ពីហុងកុង ម៉ាកាវបោះឆ្នោតប្រជាមតិទាមទារប្រព័ន្ធបោះឆ្នោតសកល
នៅថ្ងៃអាទិត្យនេះ សកម្មជនគាំទ្រប្រជាធិបតេយ្យនៅម៉ាកាវ បាននាំគ្នារៀបចំការបោះឆ្នោតប្រជាមតិ ក្រៅផ្លូវការ ដំណើរការពីថ្ងៃអាទិត្យនេះ រហូតដល់ថ្ងៃ៣០សីហា។ ជាការបោះឆ្នោតទាមទាររដ្ឋាភិបាលចិន អោយព្រមអោយមានប្រព័ន្ធបោះឆ្នោតសកល នៅម៉ាកាវ។ ក្រុងប៉េកាំងបានរិះគន់ការបោះឆ្នោតនេះ។ អភិបាលក្រុងម៉ាកាវ ចាត់ទុកការបោះឆ្នោតនេះថាខុសច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ម៉ាកាវជាតំបន់រដ្ឋបាលពិសេសរបស់ចិន។ ម៉ាកាវធ្លាប់ស្ថិតក្រោមអាណានិគមពរទុយហ្កាល់ ដល់ទៅជាង៤០០ឆ្នាំ មុននឹងពរទុយហ្កាល់ប្រគល់ម៉ាកាវទៅអោយចិនវិញ ក្នុងឆ្នាំ១៩៩៩។ ប៉ុន្តែ បណ្តាអ្នកគាំទ្រប្រជាធិបតេយ្យម៉ាកាវ មិនបានពេញចិត្តនឹងរបៀបគ្រប់គ្រងរបស់ក្រុងប៉េកាំងទេ។
ដូចជានៅហុងកុងដែរ អ្នកប្រជាធិបតេយ្យម៉ាកាវបានរៀបចំការបោះឆ្នោតប្រជាមតិក្រៅផ្លូវការ ពីថ្ងៃអាទិត្យនេះ រហូតដល់ថ្ងៃ៣០សីហា ទាមទាររដ្ឋាភិបាលចិន អោយអនុញ្ញាតអោយមានប្រព័ន្ធបោះឆ្នោតសកល នៅម៉ាកាវ។ ប្រជាជននាំគ្នាបោះឆ្នោតតាមអ៊ីនថឺនេត រឺតាមកន្លែងដែលគេរៀបចំអោយ ដោយសារគ្មានការិយាល័យត្រឹមត្រូវ។ មូលហេតុគឺមកពីតុលាការម៉ាកាវបានហាមឃាត់ការបោះឆ្នោតនេះ។ ពេលនេះ គេកំពុងចោទសួរលើការបោះឆ្នោតជ្រើសរើសមេដឹកនាំក្រុងម៉ាកាវ។ គណៈកម្មការបោះឆ្នោតមានសមាជិក៤០០នាក់ ជាអ្នកទទួលបន្ទុកបោះឆ្នោតជ្រើសរើសអ្នកគ្រប់គ្រងម៉ាកាវ។ ប៉ុន្តែ សកម្មជនគាំទ្រប្រជាធិបតេយ្យចង់អោយប្រជាជនគ្រប់រូបនៅម៉ាកាវ ជាអ្នកបោះឆ្នោតជ្រើសរើសមេដឹកនាំផ្ទាល់។
គិតមកដល់ម៉ោង១២ថ្ងៃត្រង់ ថ្ងៃអាទិត្យនេះ អ្នកបោះឆ្នោតប្រជាមតិ មានប្រមាណ៧៥០នាក់។ សកម្មជនប្រជាធិបតេយ្យសង្ឃឹមថា ក្នុងចំណោមប្រជាជនម៉ាកាវ៥សែន៥ម៉ឺននាក់ ប្រជាជន១០ម៉ឺននាក់នឹងមកបោះឆ្នោតប្រជាមតិនេះ។ កន្លងមក រដ្ឋាភិបាលចិនបានយល់ព្រមអោយមានប្រព័ន្ធបោះឆ្នោតសកលនៅហុងកុង អនុវត្តចាប់ពីឆ្នាំ២០១៧ទៅ។ ប៉ុន្តែ ចិនប្រហែលមិនអាចអនុញ្ញាតអោយមានប្រព័ន្ធបោះឆ្នោតសកល នៅម៉ាកាវ ដូចហុងកុងទេ ព្រោះថា ដែនដីម៉ាកាវតូចជាងហុងកុង ហើយប្រជាជនក៏មានតិចជាងហុងកុង។ ដូច្នេះ ម៉ាកាវមិនសូវជាសំខាន់ក្នុងក្រសែភ្នែករដ្ឋាភិបាលចិនទេ។
លទ្ធផលបោះឆ្នោតប្រជាមតិនឹងចេញផ្សាយនៅថ្ងៃ៣១សីហា។ ថ្ងៃ៣១សីហានេះដែរ ជាថ្ងៃដែលគណៈកម្មការបោះឆ្នោតបោះឆ្នោតតែងតាំងលោក ហ្វ៊ែរណង់ដូ ឈុយ Fernando Chui អោយគ្រប់គ្រងម៉ាកាវ។ លោកឈុយ គ្រប់គ្រងម៉ាកាវតាំងពីឆ្នាំ២០០៩ម្ល៉េះ។ លោកជាបេក្ខជនតែមួយគត់ ឈរឈ្មោះសម្រាប់អាណត្តិដឹកនាំថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ