កងទ័ពអ៊ុយក្រែនវាយលុកកាន់កាប់ផ្នែកមួយនៃទីតាំងធ្លាក់យន្តហោះម៉ាឡេស៊ី
ក្រុមឧទ្ទាមផ្តាច់ទឹកដីអ៊ុយក្រែនបានប្រកាសទទួលស្គាល់ថា ផ្នែកមួយនៃទីតាំងធ្លាក់យន្តហោះម៉ាឡេស៊ីត្រូវបានកងទ័ពជាតិអ៊ុយក្រែនវាយលុកចូលកាន់កាប់ នៅថ្ងៃចន្ទនេះ។ ការប្រកាសរបស់ក្រុមឧទ្ទាមត្រូវបានធ្វើឡើង ក្រោយពីរដ្ឋាភិបាលក្រុងគៀវបានអះអាងថា ខ្លួនកំពុងបើកការវាយប្រហារទៅលើក្រុងមួយចំនួន នៅជុំវិញទីតាំងធ្លាក់យន្តហោះនេះ។ ការវាយប្រយុទ្ធគ្នា ដែលបានរារាំងដំណើរក្រុមប៉ូលិសហូឡង់ និងអូស្រ្តាលីមិនឲ្យចូលទៅកាន់ទីតាំងនោះជាលើកទី២ នៅថ្ងៃចន្ទ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ក្រោយពីទទួលបរាជ័យ កាលពីថ្ងៃអាទិត្យ ក្រុមប៉ូលិសហូឡង់ និងអូស្រ្តាលី អមដំណើរដោយក្រុមអ្នកសង្កេតការណ៍អន្តរជាតិមកពីអង្គការ OSCE បានព្យាយាមសាជាថ្មីនៅថ្ងៃចន្ទ ដើម្បីចូលទៅក្នុងតំបន់ធ្លាក់យន្តហោះរបស់ក្រុមហ៊ុនម៉ាឡេស៊ី។ ក៏ប៉ុន្តែ ជាថ្មីម្តងទៀត ក្រុមប៉ូលិស និងអ្នកសង្កេតការណ៍អន្តរជាតិត្រូវបង្ខំចិត្តបកក្រោយវិញ ដោយសារតែមានការវាយប្រយុទ្ធគ្នា រវាងទាហានរដ្ឋាភិបាលអ៊ុយក្រែន និងក្រុមឧទ្ទាមផ្តាច់ទឹកដី នៅក្នុងតំបន់នោះ។
មន្រ្តីយោធាអ៊ុយក្រែនបានអះអាងថា កងទ័ពជាតិអ៊ុយក្រែនបានបើកការវាយប្រហារ ដើម្បីដណ្តើមកាន់កាប់ក្រុងមួយចំនួន ដែលនៅជុំវិញទីតាំងធ្លាក់យន្តហោះ ក៏ប៉ុន្តែ មិនបានបើកប្រតិបត្តិការយោធានៅចំទីតាំងធ្លាក់យន្តហោះនោះទេ។
មេដឹកនាំក្រុមឧទ្ទាមផ្តាច់ទឹកដីអ៊ុយក្រែនក៏បានប្រកាសទទួលស្គាល់ដែរថា ខ្លួនបានបាត់បង់ការគ្រប់គ្រងទៅលើផ្នែកមួយ នៃទីតាំងធ្លាក់យន្តហោះ ដោយត្រូវទាហានរដ្ឋាភិបាលវាយដណ្តើមកាន់កាប់នៅថ្ងៃចន្ទនេះ។ ក្រុមឧទ្ទាមក៏បានធ្វើការបរិហាររិះគន់រដ្ឋាភិបាលទីក្រុងគៀវផងដែរថាបានបើកប្រតិបត្តិការយោធានៅក្នុងតំបន់ធ្លាក់យន្តហោះនេះ បើទោះបីជាដឹងថា ក្រុមប៉ូលិស និងអ្នកសង្កេតការណ៍អន្តរជាតិគ្រោងនឹងធ្វើដំណើរចូលទៅកាន់ទីនោះ ហើយថា ផ្នែកខ្លះនៃទីតាំងធ្លាក់យន្តហោះកំពុងតែទទូលរងការខូចខាតដោយការបាញ់ផ្លោងពីសំណាក់ទាហានរដ្ឋាភិបាល។
នៅថ្ងៃចន្ទនេះដែរ អាជ្ញាធរអ៊ុយក្រែនបានអះអាងថា ទិន្នន័យដែលគេទទួលបានពីការវិភាគទៅលើប្រអប់ខ្មៅបង្ហាញថា យន្តហោះម៉ាឡេស៊ី ជើងហោះហើរលេខ MH17 ត្រូវធ្លាក់ដោយត្រូវអំបែងគ្រាប់មីស៊ីល។ ក៏ប៉ុន្តែ ក្រុមអ្នកជំនាញអង់គ្លេស ដែលទទួលបន្ទុកវិភាគប្រអប់ខ្មៅរបស់យន្តហោះបានបដិសេធមិនធ្វើអត្ថាធិប្បាយណាមួយ ជុំវិញការអះអាងរបស់អាជ្ញាធរអ៊ុយក្រែននេះទេ។ មន្រ្តីស៊ើបអង្កេតហូឡង់ ដែលជាអ្នកទទួលបន្ទុកដឹកនាំការស៊ើបអង្កេតករណីធ្លាក់យន្តហោះម៉ាឡេស៊ីនេះក៏បានបដិសេធមិនធ្វើអត្ថាធិប្បាយអ្វីដែរ ដោយលើកឡើងថា ពួកគេរង់ចាំឲ្យមានព័ត៌មានគ្រប់ជ្រុងជ្រោយជាមុនសិន ទើបអាចធ្វើការសន្និដ្ឋានទៅលើអ្វីដែលបានកើតឡើងទៅលើយន្តហោះនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ