កម្ពុជា - 
អត្ថបទចុះ​ផ្សាយ​នៅ​ថ្ងៃ សៅរ៍ 05 វិច្ឆិកា 2011 - ព័ត៌មានទើប​កែប្រើ​លើកចុងក្រោយ​ ថ្ងៃ សៅរ៍ 05 វិច្ឆិកា 2011

និពន្ធ​នាយក​កាសែត​រស្មីកម្ពុជា​ដ៏ធំ​ជាងគេ​នៅ​កម្ពុជា​ប្រឈម​នឹង​ពាក្យបណ្តឹង

កាសែត​រស្មី​កម្ពុជា​ដែល​ទទួលរង​ការ​ប្តឹង​ពី​បទ​បរិហារកេរ្តិ៍
កាសែត​រស្មី​កម្ពុជា​ដែល​ទទួលរង​ការ​ប្តឹង​ពី​បទ​បរិហារកេរ្តិ៍
RFI/Channa Siv

ដោយ គី សុខលីម

ព្រះរាជ​អាជ្ញា​តុលាការ​ខេត្ត​សៀមរាប​ប្តឹង​និពន្ធនាយក​និង​អ្នកយកព័ត៌មាន​កាសែតរស្មី​កម្ពុជា​ពីបទ​បរិហារកេរ្តិ៍​តាម​សារព័ត៌មាន។ លោក ប៉ែន សមិទ្ធិ និពន្ធនាយក​កាសែតរស្មី​កម្ពុជា​ និង​ជាប្រធាន​ក្លឹប​អ្នកកាសែត​កម្ពុជា ​​ដែល​រងការ​ចោទ​ប្រកាន់​ប្រកាស​ទទួល​ខុសត្រូវ​ចំពោះ​មុខច្បាប់។

សេចក្តី​រាយការណ៍​របស់​ គី សុខលីម ពី​ភ្នំពេញ
 

05/11/2011

 

ដោយសារ​អត្ថបទ​ពីរ​របស់​ខ្លួន លោក ប៉ែន សមិទ្ធិ និពន្ធ​នាយក ​និង​អ្នកយកព័ត៌មាន​កាសែត​រស្មី​កម្ពុជា ​ទទួល​រងការ​ប្តឹងផ្តល់​​ពី​សំណាក់​ព្រះរាជអាជ្ញា​សាលា​ដំបូង​ខេត្ត​សៀមរាប ​គឺ​​លោក ទី សុវិនថាល់​ ពី​បទ​បរិហារកេរ្តិ៍​តាម​សារព័ត៌មាន។ ​នេះបើយោង​តាម​ការ​បញ្ជាក់​របស់​លោក ប៉ែន សមិទ្ធិ​ ដែល​ជា​ប្រធាន​​ក្លឹប​អ្នកកាសែត​កម្ពុជា​ផង។
 
សេចក្តីថ្លែងការណ៍​របស់​ក្លឹប​អ្នកកាសែត​កម្ពុជា​​បាន​បញ្ជាក់​ថា លោក ព្រះ​រាជអាជ្ញា​ ទី សុវិនថាល់ ​បាន​យក​អត្ថបទ​ចំនួន​ពីរ​ ដែល​ចុះ​ផ្សាយ​ក្នុង​កាសែតរស្មី​កម្ពុជា​ មក​ធ្វើ​ជា​មូលហេតុ​នៃ​ការ​ប្តឹង។ អត្ថបទ​ទី​មួយ​មាន​ចំណងជើង​ថា “មាន​ការ​លួច​បំផ្លាញ​វត្ថុតាង​សសរ​បេតុង​ចាក់​ស្រោប​លើ​ឈើ​ក្រញូង​ពី​ក្នុង” ចុះផ្សាយ​កាល​ពី​ខែ​កក្កដា​កន្លងមក ​និង​​អត្ថបទ​ទីពីរ​ ដែល​បាន​ចុះ​ផ្សាយ​កាល​ពីខែ​តុលា​កន្លងមក​ មាន​ចំណងជើង​ថា “បទល្មើស​ព្រៃឈើ​នៅ​សៀមរាប​កើត​ឡើង​ដោយ​គ្មាន​ការ​បង្រ្កាប”។
 
ទាក់ទង​ទៅ​នឹង​ពាក្យ​បណ្តឹ​នេះ ក្លឹប​អ្នកកាសែត​កម្ពុជា​បាន​សម្តែង​ការ​ព្រួយបារម្ភ​យ៉ាង​ខ្លាំង​ពី​ស្ថានភាព​សេរីភាព​សារព័ត៌មាន​នៅ​ក្នុង​ប្រទេស​កម្ពុជា។ ក្លឹប​អ្នកកាសែត​កម្ពុជា​យល់​ឃើញ​ថា អត្ថបទ​ទាំងពីរ​ដែល​បាន​ចុះផ្សាយ​នៅ​ក្នុង​ទំព័រ​កាសែត​រស្មីកម្ពុជា​ គឺ​គ្មាន​ចំណុច​ណា​មួយ​ដែល​ត្រូវ​ប្តឹង​និង​ចោទ​ប្រកាន់​ពីបទ​បរិហារកេរ្តិ៍​នោះ​ឡើយ​ ពីព្រោះ​សំណេរ​របស់​អ្នកនិពន្ធ​ធ្វើ​ឡើង​ត្រឹមត្រូវ​តាម​វិជ្ជាជីវៈ​ ពោល​គឺ​សរសេរ​​ដោយយោង​តាម​ព័ត៌មាន​ជាក់ស្តែង​ និង​ដកស្រង់​សម្តី​អ្នក​ពាក់ព័ន្ធ​ទាំងអស់។
 
លោក ហង្ស​ ចក្រា និពន្ធ​នាយក​កាសែត​ខ្មែរ​​ម្ចាស់​ស្រុក ​ដែល​ធ្លាប់​ជាប់​ពន្ធនាគារ​ជិត​មួយ​ឆ្នាំ​ដោយសារ​ការ​ចោទ​ប្រកាន់​ពីបទ​ផ្សព្វផ្សាយ​ព័ត៌មាន​មិន​ពិត​ បាន​បញ្ចេញ​មតិ​គាំទ្រ​សេចក្តី​ថ្លែងការណ៍​របស់ក្លឹប​អ្នក​កាសែត​កម្ពុជា។
 
ក្លឹប​អ្នក​កាសែត​កម្ពុជា​បាន​អំពាវ​នាវ​ដោយ​ទទូច​ដល់​សាលា​ដំបូង​ខេត្ត​សៀមរាប​អោយ​យក​ច្បាប់​របប​សារព័ត៌មាន​មក​អនុវត្ត​ចំពោះ​ក្តី​នេះ ​និង​ប្រើប្រាស់​សុភនិច្ឆ័យ​ ដើម្បី​ធានា​ថា សេរីភាព​សារព័ត៌មាន​នៅ​កម្ពុជា​មិនត្រូវ​បាន​គេ​រំលោភ​ ហើយ​និពន្ធនាយក​កាសែត​រស្មី​កម្ពុជា​ត្រូវ​ទទួល​បាន​យុត្តិធម៌។
 
លោក ប៉ែន សមិទ្ធិ និពន្ធនាយក​កាសែតរស្មី​កម្ពុជា ​និង​ជា​ប្រធាន​ក្លឹប​អ្នក​កាសែត​កម្ពុជា​ ដែល​រងការ​ចោទ​ប្រកាន់ ​បាន​ប្រកាស​នៅថ្ងៃ​សៅរ៍​នេះ​ថា​ លោក​​ទទួល​ខុសត្រូវ​ចំពោះ​មុខ​ច្បាប់។ លោក​បន្ត​បញ្ជាក់​ទៀត​ថា ប្រសិនបើ​កាសែត​មិនមាន​ភស្តុតាង ​គាត់​ហ៊ាន​ទទួល​ខុស​ត្រូវ​ចំពោះ​មុខ​ច្បាប់។ ប៉ុន្តែ​ ប្រសិន​បើ​គាត់​ឈ្នះ​វិញ លោក​ព្រះរាជ​អាជ្ញា​ក៏​ត្រូវ​តែ​ហ៊ាន​ទទួល​ខុស​ត្រូវ​ដែរ៕

 

tags: កម្ពុជា - សេរីភាព​សារព័ត៌មាន
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close