អានតួអត្ថបទ
កម្ពុជា

អារម្មណ៍​អ្នក​នយោបាយ​និង​អ្នក​ស្និទ្ធ​ចំពោះ​​ការ​សោយ​ទិវង្គត​របស់​សម្តេច​ឪ​

អារម្មណ៍​សោក​ស្តាយ​ និង​ភ្ញាក់ផ្អើល គឺ​ជា​អារម្មណ៍​រួម​នៃ​អ្នក​នយោបាយ​ជាតិ និង​ មនុស្ស​សិ្នទ្ធ​នឹង​សម្តេច​ឪ​នរោត្តម សីហនុ​ដែល​បាន​សោយ​ទិវង្គត​នៅ​ព្រឹក​ថ្ងៃ​ទី​ចន្ទ​១៥​តុលា​២០១២។ ពួក​គេក៏​និយាយ​ដូច​គ្នា​ថា សម្តេច​ឪ​គឺ​ជា វីរៈបុរស​នៃ​កម្ពុជា ហើយ​អ្នក​ខ្លះ​សម្តែង​ការ​ព្រួយ​បារម្ភ​អំពី​នយោបាយ​កម្ពុជា នៅ​ពេល​ព្រះ​មហាវីរៈក្សត្រ​អស់​ព្រះជន្ម។  

ទង់ជាតិ​បង្ហូត​នៅពាក់កណ្តាលដង នៅព្រលានយន្តហោះអន្តរជាតិ​ភ្នំពេញ ថ្ងៃ១៥តុលា២០១២  ដើម្បី​ជា​ការកាន់ទុក្ខ​អតីតព្រះមហាក្សត្រខ្មែរ​ សម្តេចព្រះ​នរោត្តម សីហនុ
ទង់ជាតិ​បង្ហូត​នៅពាក់កណ្តាលដង នៅព្រលានយន្តហោះអន្តរជាតិ​ភ្នំពេញ ថ្ងៃ១៥តុលា២០១២ ដើម្បី​ជា​ការកាន់ទុក្ខ​អតីតព្រះមហាក្សត្រខ្មែរ​ សម្តេចព្រះ​នរោត្តម សីហនុ REUTERS/Samrang Pring
ផ្សាយពាណិជ្ជកម្ម

 លោក​ខៀវ កាញារីទ្ធ​ អ្នកនាំ​ពាក្យ​​រដ្ឋាភិបាល​បាន​អត្ថាធិប្បាយ​អោយ​ដឹង​ថា «កម្ពុជា​បាន​បាត់​បង់​​វីរៈ​បុរស​ជាតិ​មួយ​រូប»។ អ្នក​នយោបាយ​រូប​នេះ​បន្ត​ថា លោក​មាន​អនុស្សាវរីយ៍​ល្អៗ​ជា​ច្រើន​ជា​មួយ​សម្តេច​តា។

លោក​ចាប ញ៉ាលីវុទ្ធ អតីត​អភិបាល​ខេត្ត​និង​ជា​បង​ប្អូន​ម្តាយ​តែ​មួយ​ជា​មួយ​ព្រះអង្គ​ម្ចាស់​រណឬទ្ធិ បាន​ចាត់​ទុក​សម្តេច​តា គឺ​ជា​ព្រះមហាក្សត្រ​អស្ចារ្យ​មួយ​អង្គ​បន្ទាប់ពី​ព្រះ​មហាក្សត្រ​ជ័យវរ្ម័ន​ទី​៧។ លោក​បាន​ថ្លែង​អោយ​ដឹង​ថា«ព្រះអង្គ​គឺ​ជា​ក្សត្រ​ដែល​ស្រឡាញ់​ជាតិ និង​ស្រឡាញ់​យុត្តិធម៌​ពិត​ប្រាកដ»។

ចំណែក​ឯ​ក្មួយ​ប្រុស​និង​ជា​ព្រះរាជ​លេខា​ផ្ទាល់​របស់​សម្តេច​ឪ គឺ​ព្រះអង្គ​ម្ចាស់​ស៊ីសុវត្ថិ ធម្មិកោ​វិញ ព្រះអង្គ​បាន​បន្ទូល​ថា៖ «ព្រះអង្គ​បាន​បន្យល់​ទុក​កេរ្តិ៍មរតក​ច្រើន​ណាស់​នៅ​ក្នុង​ប្រវត្តិសាស្ត្រ​​កម្ពុជា និង​ក្នុង​ពិភពលោក។ ព្រះអង្គ​គឺ​ជា​ស្ថាបនិក​នៃ​ក្រុម​​ប្រទេស​មិន​ចូល​បក្ស​សម្ព័ន្ធ។

លោក​គៀត សុគន្ធ អនុ​ប្រធាន​គណៈកម្មការ​ប្រតិបត្តិ​នៃ​គណបក្ស​សិទ្ធិ​មនុស្ស​បាន​ចាត់ទុ​ក​ការ​សោយ​ទិវង្គត​របស់​សម្តេច​តា គឺ​ជា​ការ​បាត់បង់​អ្នក​ស្នេហាជាតិ​មួយ​រូប។ លោក​បន្ត​យ៉ាង​ដូច្នេះ​៖«ខ្ញុំ​ខក​ចិត្ត និង​អស់​សង្ឃឹម​ចំពោះ​ដំណឹង​នេះ។ សម្តេចឪ ព្រះអង្គ​មាន​ឥទ្ធិពល​លើ​នយោបាយ​បរទេស​ទាក់ទង​នឹង​បញ្ហា​បូរណភាព​ទឹកដី។ បរទេស​ខ្លាច​ព្រះអង្គ​ច្រើន»។

លោកហៃ លីអ៊ាង អគ្គ​នាយក​ក្រុមហ៊ុន PPM បាន​រម្លឹក​អោយ​ដឹង​យ៉ាង​មោទនៈ​អំពី​ស្នា​ព្រះហស្ថ​​របស់​សម្តេច​សីហនុ​ក្នុង​ទស្សវត្សរ៍​៦០។ អ្នក​ជំនួញ​រូប​នេះ​បញ្ជាក់​ថា សម្តេច​ឪ​នរោត្តម​សីហនុ​ជា​មេ​ដឹកនាំ​ឆ្នើម​ទាំង​លើ​ផ្នែក​នយោបាយ​និង​សេដ្ឋកិច្ច​ក្នុង​សម័យ​នោះ។
«កម្ពុជា​ធ្លាប់​ជា​ប្រទេស​នាំ​អង្ករ​ចេញ​ច្រើន​ជាង​គេ​នៅ​ក្នុង​ទស្សវត្សរ៍​៦០។ ការ​បាត់បង់​សម្តេច​ឪ​នៅ​ពេល​នេះ វា​អាច​ជា​ការ​បាត់បង់​តុល្យភាព​នយោបាយ​ផង​ដែរ» នេះ​ជា​ការ​អត្ថាធិប្បាយ​របស់​លោក​ហៃ លីអ៊ាង។

អ្នកកាសែតជនជាតិបារាំង លោក Pierre Gillette ដែលធ្លាប់ត្រូវបានអញ្ជើញ​អោយចូលជួប​សវនាការជាមួយសម្តេចឪនោះ ពិពណ៌នាថា សម្តេចតាមានតួនាទីយ៉ាងសំខាន់​ក្នុងឆាក​នយោបាយជាតិ និងអន្តរជាតិ។ អតីតនិពន្ធនាយកកាសែតភាសាបារាំង Cambodge Soir បានរម្លឹកថា« ព្រះមហាវីរៈក្សត្រគឺជាអ្នកអានសារព័ត៌មានព័ត៌មានជាភាសាបារាំងដ៏សកម្ម។ ព្រះអង្គចូល​ចិត្ត​អាន​ព័ត៌មានកីឡា។ ក្រៅពីនោះពេលខ្ញុំជួបសវនាការជាមួយព្រះអង្គ ព្រះអង្គ​ចូលចិត្ត​រម្លឹក​ច្រើនពី​ព្រឹត្តិការណ៍នៃការទាមទារឯករាជ្យពីអាណាព្យបាលបារាំង»។

​គួរ​បញ្ជាក់​អោយ​ដឹង​ផង​ដែរ​ថា ភ្លាមៗ​បន្ទាប់​ពី​ការ​ប្រកាស​អំពី​ការ​សោយទិវង្គត​របស់​សម្តេច​ឪ មេ​ដឹក​នាំ​បរទេស​ក៏​បាន​ថ្លែង​ការណ៍​រំលែក​ទុក្ខ​ផង​ដែរ។ ជាក់​ស្តែង​ថ្នាក់​ដឹកនាំ​នៃ​ប្រទេស​ចិន។ អគ្គរដ្ឋទូត​ ប្រតិភូ​សហភាព​អឺរ៉ុប ប្រចាំ​កម្ពុជា​ក៏​ថ្លែងការណ៍​ខ្លី​ចូល​រួម​រំលែក​ទុក្ខ​ជាមួយ​សម្តេច​ម៉ែ និង​រាជ​វង្សានុវង្ស និង​ជាមួយ​ប្រជាជន​ខ្មែរ​ផង​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

ចែករំលែក :
រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ