អ្នកកាសែតបារាំង៤រូប ត្រូវបានដោះលែង ក្រោយគេចាប់ធ្វើជាចំណាប់ខ្មាំង១០ខែនៅស៊ីរី
នៅថ្ងៃសៅរ៍នេះ អ្នកសារព័ត៌មានបារាំង៤នាក់ ដែលត្រូវបានគេចាប់ធ្វើជាចំណាប់ខ្មាំងនៅប្រទេសស៊ីរី អស់១០ខែមកហើយនោះ ត្រូវបានដោះលែងអោយមានសេរីភាពឡើងវិញហើយ។ កងទ័ពតួកគីបានរកឃើញអ្នកសារព័ត៌មានទាំង៤នាក់ នៅព្រំដែនរវាងតួកគីនិងស៊ីរី។ អ្នកសារព័ត៌មានទាំង៤រូប មិនមានបញ្ហាសុខភាពអ្វីធ្ងន់នោះទេ ហើយត្រូវធ្វើដំណើរត្រលប់មកដល់បារាំងវិញ នៅយប់ថ្ងៃសៅរ៍១៩មេសានេះ រឺក៏ព្រឹកថ្ងៃអាទិត្យ២០មេសា។ តាំងពីស៊ីរីធ្លាក់ក្នុងសង្គ្រាមនៅដើមឆ្នាំ២០១១មក អ្នកសារព័ត៌មានស៊ីរី និងអ្នកសារព័ត៌មានបរទេសជាច្រើនរូប ត្រូវបានគេចាប់ធ្វើជាចំណាប់ខ្មាំងនៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
អ្នកសារព័ត៌មានបារាំងទាំង៤រូប ត្រូវបានគេចាប់ធ្វើជាចំណាប់ខ្មាំងនៅស៊ីរី តាំងតែពីខែមិថុនា ឆ្នាំ២០១៣ម្ល៉េះ ពោលគឺ១០ខែមកហើយ។ ក្នុងចំណោមអ្នកសារព័ត៌មានបារាំងទាំង៤រូប មានអ្នកថតរូប២នាក់ អ្នកកាសែតមកពីវិទ្យុអឺរ៉ុប១ និងអ្នកកាសែតមកពីទស្សនាវដ្តីប្រចាំសប្តាហ៍ Le Point។ ចំណាប់ខ្មាំង Didier François ជាអ្នកកាសែតមកពីវិទ្យុអឺរ៉ុប១បារាំង បានសំដែងការរីករាយដោយប្រាប់ថា វាគឺជាសុភមង្គលដែលលោកអាចមើលឃើញមេឃ និងអាចបញ្ចេញមតិយោបល់បានឡើងវិញ។
កងទ័ពតួកគីបានរកឃើញអ្នកសារព័ត៌មានបារាំងទាំង៤រូប នៅព្រំដែនរវាងតួកគី និងស៊ីរី ជិតក្រុងអាក់សាកាល់ ភាគអាគ្នេយ៍ប្រទេសតួកគី។ អ្នកកាសែតទាំងនេះ ត្រូវបានក្រុមមនុស្សមិនស្គាល់អត្តសញ្ញាណបោះបង់ចោលនៅទីនោះ។ កងទ័ពតួកគីឃើញថា អ្នកកាសែតបារាំងទាំង៤រូបត្រូវបានគេចងរឹត និងរុំក្រណាត់បិទភ្នែកជិតឈឹង។ ដំបូងឡើយ កងទ័ពតួកគីស្មានថា បុរសទាំង៤នាក់នេះ ជាអ្នករត់ពន្ធ។ ការដោះលែងចំណាប់ខ្មាំងបារាំងទាំង៤រូបនេះ ធ្វើឡើងក្រោយការដោះលែងអ្នកសារព័ត៌មានជាច្រើនរូបនៃបណ្តាប្រទេសអឺរ៉ុបផ្សេងទៀត។ អ្នកកាសែតអឺរ៉ុបទាំងនេះ ធ្លាប់ត្រូវបានក្រុមឧទ្ទាមជ្រុលនិយមនៅស៊ីរី ឈ្មោះថា “រដ្ឋអ៊ីស្លាម អ៊ីរ៉ាក់” ចាប់ធ្វើជាចំណាប់ខ្មាំងជាច្រើនខែ។
អ្នកសារព័ត៌មានស៊ីរី និងអ្នកសារព័ត៌មានបរទេសជាច្រើនរូប ត្រូវបានគេចាប់ធ្វើជាចំណាប់ខ្មាំងនៅប្រទេសស៊ីរី ចាប់តាំងពីប្រទេសនេះធ្លាក់ក្នុងវិបត្តិសង្គ្រាមនៅដើមឆ្នាំ២០១១ ជាសង្គ្រាមរវាងកងទ័ពប្រធានាធិបតីអាសាដ និងក្រុមឧទ្ទាម។ យោងតាមអង្គការការពារសិទ្ធិសារព័ត៌មាននានា ស៊ីរីបានក្លាយជាប្រទេសដែលគ្រោះថ្នាក់បំផុត ក្នុងពិភពលោក សម្រាប់សារព័ត៌មាន។ អ្នកកាសែតបរទេសជាច្រើនកំពុងជាប់ខ្លួនជាចំណាប់ខ្មាំង នៅស៊ីរី។
គេពិបាកនឹងដឹងចំនួនអ្នកកាសែតទាំងនោះអោយបានពិតប្រាកដណាស់ ព្រោះថា រដ្ឋាភិបាលនិងក្រុមគ្រួសារអ្នកកាសែតខ្លះ បានសុំអោយសារព័ត៌មានលាក់ព័ត៌មាន ពីការបាត់ខ្លួនរបស់អ្នកកាសែតទាំងនោះ ខណៈស្ថានភាពនៅស៊ីរី មានភាពច្របូកច្របល់គួរអោយបារម្ភ។ កាលពីខែធ្នូ ឆ្នាំ២០១៣ សារព័ត៌មានអន្តរជាតិធំៗចំនួន១៣ ដូចជា BBC, New York Times រឺក៏Reuters ធ្លាប់រំពឹងថា អ្នកាសែតដែលត្រូវគេចាប់ជាចំណាប់ខ្មាំងនៅស៊ីរី មានប្រមាណជាង៣០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ