លោកពូទីន៖ខ្ញុំសង្ឃឹមថាស្ថានការណ៍នៅ អ៊ុយក្រែននឹងមិនជំរុញឲ្យខ្ញុំប្រើសិទ្ធិបញ្ជូនទ័ពរុស្ស៊ីទៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:២០
នៅថ្ងៃព្រហស្បតិ៍ ទី ១៧ មេសា ការប៉ះទង្គិចគ្នារវាងទាហានអ៊ុយក្រែន និងក្រុមគាំទ្ររុស្ស៊ី នៅទីក្រុង Mariupol ដែលស្ថិតនៅភាគខាងកើតអ៊ុយក្រែន បានសម្លាប់ ក្រុមគាំទ្ររុស្ស៊ី បីនាក់ដែលបានប៉ុនប៉ងចូលទៅលុកលុយមូលដ្ឋានទ័ពរដ្ឋាភិបាលអ៊ុយក្រែន។ ព្រឹត្តិការណ៍នេះ កើតមានតែប៉ុន្មានម៉ោងមុន ជំនួបចតុភាគី ដែលត្រូវបើកធ្វើ នៅទីក្រុងហ្សឺណែវ ប្រទេសស្វ៊ីសវិញ។ ប្រមុខ ការបរទេសអាមេរិក រុស្ស៊ី សហភាពអឺរ៉ុប និងអ៊ុយក្រែន ត្រូវជួបប្រជុំគ្នាដើម្បីរកច្រកចេញឲ្យវិបត្តិនៅអ៊ុយក្រែន។ លោកប្រធានាធិបតីរុស្ស៊ីសង្ឃឹមវិបត្តិអ៊ុយក្រែនដោះស្រាយ តាម ផ្លូវ នយោបាយ និងផ្លូវទូត ដោយ លោកសង្ឃឹមថា ព្រឹត្តិការណ៍នៅអ៊ុយក្រែន នឹងមិនជំរុញឲ្យលោកប្រើទ័ពទៅអន្តរាគមនៅក្នុងទឹកដីអ៊ុយក្រែន។
នៅក្នុងពេលដែលជំនួបកំពុងបើកធ្វើ ប្រមុខរដ្ឋាភិបាលរុស្ស៊ីបានថ្កោលទោស និងរិះគន់ អ៊ុយក្រែន ដែលបានបញ្ជូនយោធា ទៅបង្រ្កាបប្រជាជនដែលកំពុងតវ៉ា នៅភាគខាងកើតអ៊ុយក្រែន។ នៅទីក្រុងម៉ូស្គូ លោកប្រធានាធិបតីពូទីនបាននិយាយដាក់សម្ពាធទៅលើភាគីចរចា។ នៅក្នុងខណៈពេលដែលប្រមុខការបរទេសអ៊ុយក្រែន រុស្ស៊ី អាមេរិក និងសហភាពអឺរ៉ុបកំពុងជួបប្រជុំគ្នា ប្រមុខរដ្ឋរុស្ស៊ីបាននិយាយបែបបង្ហើរថា លោកសង្ឃឹមយ៉ាងមុតមាំថា ស្ថានភាពនៅអ៊ុយក្រែនបច្ចុប្បន្ន នឹងមិនជំរុញឲ្យលោកប្រើអំណាចបញ្ជូនទ័ពរុស្ស៊ី ទៅអ៊ុយក្រែនទេ។
តាមលោកពូទីន សភាជាន់ខ្ពស់រុស្ស៊ីបានផ្តល់អំណាចដល់លោក ក្នុងនាមជាប្រធានាធិបតី ដើម្បីអាចមានសិទ្ធិបញ្ជូនទ័ពទៅអ៊ុយក្រែន។ និយាយនៅក្នុងវេទិកាឆ្លើយនឹងសំណួររបស់ប្រជាជន ដែលគេតែងតែធ្វើជារៀងរាល់ឆ្នាំ លោកប្រធានាធិបតីរុស្ស៊ីបានបញ្ជាក់ ថា លោកសង្ឃឹមថា លោកនឹងមិនប្រើសិទ្ធិដែលសភាជាន់ខ្ពស់រុស្ស៊ីបានប្រគល់ឲ្យនោះទេ។ លោកសង្ឃឹមថា គេនឹងអាចរកឃើញមធ្យោបាយបន្ទាន់ មួយ ដើម្បីដោះស្រាយបញ្ហាប្រឈមមុខ នៅតំបន់ភាគខាងកើតអ៊ុយក្រែន។
ប្រមុខដឹកនាំរុស្ស៊ី បានទាមទារឲ្យគេធានា គោរព សិទ្ធិ និងផលប្រយោជន៍ របស់ប្រជាជនរុស្ស៊ី និងប្រជាជនដែលនិយាយភាសារុស្ស៊ី នៅ អ៊ុយក្រែន។ ការការពារសិទ្ធិ និងផលប្រយោជន៍របស់ប្រជាជនទាំងនេះ ដែលកំពុងរស់នៅក្នុងទឹកដីអ៊ុយក្រែន គឺជាកាតព្វកិច្ច របស់រុស្ស៊ី។ តាមលោកពូទីន អ្វីដែលសំខាន់ គឺទីក្រុងគៀវ ត្រូវយល់ព្រមចេញមុខធានាដល់តំបន់ដែលនិយាយភាសារុស្ស៊ី ដែលស្ថិតនៅភាគខាងកើតអ៊ុយក្រែន។ កិច្ចព្រមព្រៀងដែលត្រូវតែធ្វើរវាងភាគីជម្លោះ ក្នុងស្រុក និងគ្មានការចូលរួមពីភាគីបរទេស ខាងក្រៅ គឺជាកូនសោគន្លឹះសំខាន់ដើម្បីដោះស្រាយវិបត្តិនៅថ្ងៃអ៊ុយក្រែនបច្ចុប្បន្ននេះ។
បើទោះបីជាលោកពូទីន ចង់ឲ្យវិបត្តិអ៊ុយក្រែនដោះស្រាយតាមផ្លូវទូត នយោបាយ និងចង់ឲ្យ រដ្ឋាភិបាល អ៊ុយក្រែនចរចាជាមួយក្រុមបំបែកខ្លួន ប៉ុន្តែ តាមរយៈសំដីខាងលើ គេអាចយល់ថា លោកពូទីនកំពុងព្យាយាមរកហេតុផល ដើម្បីបញ្ជាក់វត្តមាន អន្តរាគមន៍ទ័ពរុស្ស៊ី ដែលរុស្ស៊ី អាចធ្វើ ទៅថ្ងៃមុខ ទៅក្នុងទឹកដីអ៊ុយក្រែន។ រហូតមក រុស្ស៊ីបានប្រកាសហើយថា នឹងការពាររាល់ផលប្រយោជន៍ របស់ប្រជាជនដែលនិយាយភាសារុស្ស៊ី។
នៅក្នុងជំនួបបួនភាគី ដែលនេះជាលើកទីមួយ ដែលប្រមុខការបរទេសអ៊ុយក្រែន ជួបជាមួយរដ្ឋមន្រ្តីការបរទេសរុស្ស៊ី រដ្ឋមន្រ្តីការបរទេសអ៊ុយក្រែនបង្ហាញជំហរ ចង់ដោះស្រាយជាមួយរុស្ស៊ី តាមផ្លូវការទូត។ ដំណោះស្រាយផ្លូវទូត ជាច្រកតែមួយ ដើម្បីស្ថិរភាពនៅអ៊ុយក្រែន។ ភាគីអ៊ុយក្រែននៅតែចោទរុស្ស៊ីថា ជាអ្នកនៅពីក្រោយក្រុមបំបែកខ្លួន ខុសច្បាប់ និងបដិសេធ ការបំបែកតំបន់ធ្វើជារដ្ឋសហព័ន្ធ នៅក្នុងទឹកដីអ៊ុយក្រែន ទៅតាមការស្នើឡើងរបស់ទីក្រុងម៉ូស្គូ។ សម្រាប់អ៊ុយក្រែន គឺមានតែរដ្ឋាភិបាល និងប្រជាជនអ៊ុយក្រែន ដែលជាអ្នកសម្រេច។ អ៊ុយក្រែនសុំឲ្យតែរុស្ស៊ីដកទ័ពចេញពីទឹកដីអ៊ុយក្រែនទៅ គឺបានហើយ។
នៅពេលវិបត្តិផ្ទុះកាន់តែខ្លាំង នៅភាគខាងកើតអ៊ុយក្រែន ទីក្រុងម៉ូស្គូវាយតម្លៃថា រដ្ឋអ៊ុយក្រែនលែងដំណើរដូចមុនទៀតហើយ។ មានតែការបោះឆ្នោតប្រជាមតិ ដើម្បីបង្កើតរដ្ឋសហព័ន្ធតូចៗ ដល់តំបន់ដែលកំពុងជួបការតវ៉ាខ្លាំង ទើបគេអាចដោះស្រាយវិបត្តិនៅអ៊ុយក្រែនបាន។ ដូចនិយាយខាងដើម រុស្ស៊ីធ្លាប់បានសន្យាការពារផលប្រយោជន៍ របស់ប្រជាជនដែលនិយាយភាសារុស្ស៊ី។ កាលពីថ្ងៃចន្ទ ក្រេមឡាំងបានអះអាងថា ខ្លួនបានទទួលពាក្យសុំអន្តរាគមន៍ជាច្រើន ពីក្រុមបំបែកខ្លួន នៅភាគខាងកើត អ៊ុយក្រែន។
នៅថ្ងៃនេះ អ្វីៗ គ្មានអ្វីដែលត្រូវលាក់លៀមទៀតទេ។ លោកប្រធានាធិបតីរុស្ស៊ីប្រកាសយ៉ាងក្តែងៗ ថា គឺកងទ័ពរុស្ស៊ី ដែលនៅប្រចាំការ ពីក្រោយក្រុមប្រដាប់អាវុធ ដើម្បីឯករាជ្យនៅ គ្រីមេ។ តាមលោកពូទីន គឺវត្តមានកាន់តែចេញមុខរបស់អង្គការអូតង់ នៅអឺរ៉ុប ខាងកើត ក្បែរមកព្រំដែនរុស្ស៊ី ដែលជំរុញឲ្យរុស្ស៊ី សម្រេចយកទឹកដីគ្រីមរបស់អ៊ុយក្រែន មកធ្វើជាទឹកដីរបស់ខ្លួន។ សម្រាប់ម៉ូស្គូ ការតាំងទី អាវុធ របស់អូតង់ នៅក្នុងប្រទេសអឺរ៉ុបខាងកើត កំពុងគំរាមកំហែងសន្តិសុខរបស់រុស្ស៊ី ដែលរុស្ស៊ី ត្រូវតែធ្វើការឆ្លើយតបជាបន្ទាន់។
អាមេរិកគំរាមដាក់ទណ្ឌកម្មថ្មី ប្រសិនបើជំនួបចតុភាគីបរាជ័យ
ភាគីអាមេរិក នៅតែទាមទារឲ្យរុស្ស៊ី ឈប់គាំទ្រ និងលើកទឹកចិត្តក្រុមបំបែកខ្លួន អ៊ុយក្រែន ដែលរហូតមកដល់ថ្ងៃនេះ បានចូលកាន់កាប់ ដោយខុសច្បាប់ ទីតាំងស្ថាប័នរដ្ឋនៅក្នុងទីក្រុង១០ ដែលស្ថិតនៅភាគខាងកើតអ៊ុយក្រែន។ អាមេរិកបានទាមទារផងដែរ ឲ្យរុស្ស៊ីដកទ័ពជាង ៤ម៉ឺននាក់ ចេញ ពីតំបន់ជាប់ព្រំដែន ជាមួយ អ៊ុយក្រែន។
នៅមួយថ្ងៃមុន ជំនួបបួនភាគីបើកធ្វើ សេតវិមានបានប្រកាសគំរាមដាក់ទណ្ឌកម្មថ្មីទៅលើរុស្ស៊ី ក្នុងករណីរុស្ស៊ីមិនចូលរួមជួយសម្រាលស្ថានភាពនៅអ៊ុយក្រែន។ នៅក្នុងបទសម្ភាសន៍មួយជាមួយទូរទស្សន៍ អាមេរិក កាលពីយប់ថ្ងៃពុធទី ១៦ មេសា លោកអូបាម៉ា បានចោទប្រកាន់រុស្ស៊ីចំៗថា បានគាំទ្រក្រុមប្រដាប់អាវុធ នៅភាគខាងត្បូង និងខាងកើតអ៊ុយក្រែន។ សម្រាប់ប្រធានាធិបតីអាមេរិក វាច្បាស់ណាស់ថា ប្រសិនបើរុស្ស៊ីមិនចាប់យកឱកាស ក្នុងជំនួបនៅថ្ងៃនេះ ដើម្បីបន្ធូរបន្ថយភាពតានតឹងនៅអ៊ុយក្រែនទេ នោះរុស៊្សី នឹងប្រឈមនឹងផលវិបាកកាន់តែធ្ងន់។
លោកអូបាម៉ាទំនងជាចង់ព្រលយពីទណ្ឌកម្មថ្មី ដែលអាមេរិកនឹងអាចដាក់ទៅលើរុស្ស៊ី។ រដ្ឋបាលអាមេរិកបានប្រុងជើងជាស្រេចដើម្បីដាក់ទណ្ឌកម្ម ប្រសិនបើជំនួបបួនភាគី នៅថ្ងៃនេះ មិនផ្តល់លទ្ធផលជាផ្លែផ្កា។ តាមមន្រ្តីមិនបញ្ចេញឈ្មោះរបស់សេតវិមាន ទណ្ឌកម្មថ្មី នឹងអាចទម្លាយឲ្យដឹង នៅថ្ងៃសុក្រចុងសប្តាហ៍នេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ