លោកស្រីពុង ឈីវកេក ព្រមទទួលតំណែងក្នុងគជប ប៉ុន្តែសុំឱ្យបក្សទាំងពីរធានាឯករាជភាពរបស់ស្ថាប័ន
នៅល្ងាចថ្ងៃចន្ទទី ២៨ កក្កដានេះ លោកស្រីពុង ឈីវកេក ប្រធានសម្ព័ន្ធខ្មែរជំរឿន និងការពារសិទ្ធមនុស្ស (លីកាដូ) បានយល់ព្រមទទួលធ្វើជាសមាជិកគ.ជ.ប ទៅតាមសំណើរបស់គណបក្សសង្គ្រោះជាតិ។ បើទោះបីជាមិនទាន់មានការផ្សព្វផ្សាយជាផ្លូវការពីគណបក្សកាន់អំណាច តែមន្ត្រីជាន់ខ្ពស់នៃបក្សនេះបានអះអាងថា មិនមានទោមនស្សអ្វីនោះទេចំពោះបេក្ខភាពរបស់លោកស្រី។ ប៉ុន្តែយ៉ាងណាក៏ដោយ លោកស្រីទាមទារឱ្យបក្សទាំងពីរធានាឯករាជភាពរបស់ស្ថាប័ននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
នៅទីបំផុត លោកស្រីពុង ឈីវកេក ប្រធានអង្គលីកាដូ បានយល់ព្រមទទួលយកតំណែងឯករាជ្យ ក្នុងការដឹកនាំគណៈកម្មាធិកាជាតិរៀបចំការបោះឆ្នោត តាមសំណើរបស់គណបក្សដែលមានអាសនៈក្នុងសភាហើយ។ តបតាមលិខិតប្រធានគណបក្សសង្គ្រោះជាតិ លោក សម រង្ស៊ី និងលោក កឹម សុខា ដែលបានស្នើសុំលោកស្រីយកតំណែងទី៩ ក្នុងគ.ជ.ប ដែលស្របតាមរូបមន្ត ៤-៤-១។
ប៉ុន្តែក្នុងលិខិតតបនៅថ្ងៃទី២៨កក្កដានេះ លោកស្រី ប្រធានអង្គការលីកាដូដែលមានវ័យ៧១ឆ្នាំរូបនេះ បានសុំឱ្យមានការធានាពីឯករាជភាព និងអព្យាក្រិតភាពនៃស្ថាប័ន គ.ជ.ប.។ ស្ថាប័ន គ.ជ.ប. ដែលមានសិទ្ធិស្វ័យភាពរបស់ខ្លួន ទាំងក្នុងការជ្រើសរើសបុគ្គលិកជំនាញ គ្រប់គ្រង និងមានស្វ័យភាពសម្រេចចិត្តដោយខ្លួនឯង រួមទាំងមានឯករាជភាពផ្នែកថវិកា។
លោកស្រីបញ្ជាក់ថា លោកស្រីនឹងខិតខំប្រឹងប្រែងធ្វើការងារតាមមនសិការ ដោយយោងទៅតាមរដ្ឋធម្មនុញ្ញ ច្បាប់ជាធរមានផ្សេងៗទៀត និងយុត្តិធម៌សម្រាប់សុខុមាលភាពរបស់ប្រជាពលរដ្ឋទូទាំងប្រទេស។
ជាការឆ្លើយតប គណបក្សសង្គ្រោះជាតិ ដែលមានហត្ថលេខារបស់លោក សម រង្ស៊ី និងលោក កឹម សុខា គណបក្សសង្គ្រោះជាតិ បានគាំទ្រនូវសំណើ និងសំណូមពរ ស្មារតី រួមទាំងមនសិការទទួលខុសត្រូវរបស់លោកស្រីពុង ឈីវកេកនេះ។
ក្នុងលិខិតឆ្លើយតបដដែល គណបក្សសង្គ្រោះជាតិ បានអះអាងថា ខ្លួននឹងជំរុញ និងធានាឱ្យ គណៈកម្មាធិការជាតិរៀបចំការបោះឆ្នោត ដែលនឹងត្រូវបញ្ចូលក្នុងស្ថាប័នធម្មនុញ្ញ មានឯករាជភាព និងស្វ័យភាពរបស់ខ្លួន។
ដោយឡែកគណបក្សប្រជាជនកម្ពុជា បានអះអាងថា មិនមានការយល់ទាស់អ្វីចំពោះបេក្ខភាពរបស់លោកស្រី ពុង ឈីវកេកនេះទេ។ នេះបើតាមការបញ្ជាក់ពីលោក ជាម យៀប សមាជិកការិយាល័យនយោបាយគណបក្សប្រជាជនកម្ពុជា ដែលបានប្រាប់វិទ្យុបារាំងនៅថ្ងៃចន្ទនេះ។
សូមបញ្ជាក់ថា ការជ្រើសរើសបេក្ខភាពសង្គមស៊ីវិលនេះ គឺធ្វើឡើងតាមសេចក្តីសម្រេចកាលពីថ្ងៃទី២២កក្កដា ក្នុងការប្រជុំនយោបាយកំពូលរវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី។ ជាកិច្ចប្រជុំដើម្បីដោះស្រាយបិទបញ្ចប់ជម្លោះនយោបាយ និងកែទម្រង់ស្ថាប័នជាតិមួយចំនួន។ ហើយការកែប្រែ គ.ជ.ប. គឺជាបញ្ហាស្នូល។ ដូចនេះ គណបក្សទាំងពីរបានយល់ព្រមបង្កើតរូបមន្តជ្រើសរើសក្បាលម៉ាស៊ីន គ.ជ.ប. ដោយប្រើប្រាស់រូបមន្ត ៤-៤-១ ដើម្បីធានាបានឯករាជភាពនៃស្ថាប័នកំពូលនេះ។ សូមបញ្ជាក់ថា លោកស្រីពុង ឈីវ កេក អាយុ៧១ ឆ្នាំបានដឹកនាំអង្គការលីកាដូតាំងពីឆ្នាំ១៩៩២មកម្លេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ