ប្រធានស្ថាប័នផ្តល់ហិរញ្ញវត្ថុសម្រាប់អភិវឌ្ឍន៍ PROPARCO បំពេញទស្សនកិច្ចនៅកម្ពុជា
អគ្គនាយកស្ថាប័នផ្តល់ហិរញ្ញវត្ថុសម្រាប់ការអភិវឌ្ឍន៍ហៅកាត់ថា PROPARCO លោក ក្លូដ ប៉េរីយូ (Claude Périou ) នឹងមកបំពេញទស្សនកិច្ចនៅកម្ពុជានៅថ្ងៃទី ១៥ វិច្ឆិកានេះ។ PROPARCO គឺជាស្ថាប័នដែលផ្តល់ហិរញ្ញវត្ថុដោយទីភ្នាក់ងារបារាំងសម្រាប់អភិវឌ្ឍន៍ ( AFD ) ដែលបានផ្តល់ហិរញ្ញប្បទានដល់គម្រោងជាច្រើននៅកម្ពុជា។ ក្នុងដំណើរទស្សនកិច្ចនេះ លោក ក្លូដ ប៉េរីយូ គ្រោងជួបពិភាក្សាជាមួយប្រតិបត្តិករសេដ្ឋកិច្ចបារាំងនិងខ្មែរជាច្រើន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
នេះគឺជាដំណើរទស្សនកិច្ចលើកទី១ មកកាន់កម្ពុជារបស់លោក ក្លូដ ប៉េរីយូ ចាប់តាំងពីលោកបានឡើងកាន់តំណែងនេះកាលពីឆ្នាំ ២០១២ មក។ នេះបើយោងតាមសេចក្តីថ្លែងការណ៍របស់ស្ថានទូតបារាំងប្រចាំកម្ពុជាដែលចេញផ្សាយនៅថ្ងៃព្រហស្បតិ៍នេះ។
សេចក្តីថ្លែងការណ៍ឲ្យដឹងទៀតថា ស្ថាប័នផ្តល់ហិរញ្ញវត្ថុប្រូប៉ាកូ (PROPARCO ) មានវត្តមាននៅលើទឹកដីកម្ពុជាតាំងពីរឆ្នាំមុន មកម្ល៉េះ។ ស្ថាប័ននេះត្រូវបានផ្តល់ហិរញ្ញវត្ថុដោយទីភ្នាក់ងារបារាំងសម្រាប់ការអភិវឌ្ឍន៍ ( AFD) ដែលជាអ្នកផ្តល់ប្រាក់កម្ចីដល់គម្រោងអភិវឌ្ឍន៍ជាច្រើននៅកម្ពុជា។ AFD បានផ្តល់ប្រាក់កម្ចីនិងការវិនិយោគជាសាច់ប្រាក់សុទ្ធដល់បណ្តាវិស័យជំនួយ វិស័យធនាគារ និងហិរញ្ញវត្ថុ វិស័យហេដ្ឋារចនាសម្ព័ន្ធឧស្សាហកម្ម និងសេវាកម្ម។
បច្ចុប្បន្ន ទីភ្នាក់ងារបារាំងសម្រាប់ការអភិវឌ្ឍន៍ មានកញ្ចប់ថវិកាសម្រាប់ការវិនិយោគនៅក្នុងប្រទេសកម្ពុជារហូតដល់ទៅ ៥៤ លានដុល្លារអាមេរិក។ ក្នុងឆ្នាំ ២០១៣ នេះ PROPARCO បានធ្វើប្រតិបត្តិការជាច្រើនក្នុងនោះមានការផ្តល់ប្រាក់កម្ចី ១០ លានដុល្លារដល់ក្រុមហ៊ុនអង្ករមាសកម្ពុជា ( Golden Rice) ដែលជាក្រុមហ៊ុនផលិតអង្ករផ្កាម្លិះធំជាងគេនៅកម្ពុជា។
ក្រៅពីនោះ PROPARCO ក៏បានផ្តល់ជំនួយដល់ធនាគារអេស៊ីលីដា និងស្ថាប័នមីក្រូហិរញ្ញវត្ថុបីទៀតគឺ ស្ថាប័នមីក្រូហិរញ្ញវត្ថិអម្រិត ហត្ថាកសិករ និងធនាគារភូមិ ( TPC )។
ក្នុងផ្នែកហេដ្ឋារចនាសម្ព័ន្ធ PROPARCO ក៏ជាដៃគូរបស់ក្រុមហ៊ុនវិនិយោគលើអាកាសយានដ្ឋានកម្ពុជា ( SCA) ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ