Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ សៅរ៍ 25 កុម្ភៈ 2012 -
ព័ត៌មានទើបកែប្រើលើកចុងក្រោយ ថ្ងៃ សៅរ៍ 25 កុម្ភៈ 2012
សិស្សក្រីក្រជិត៥ពាន់នាក់ទទួលអាហារូបករណ៍ ពីអង្គការស្បៀងអាហារពិភពលោក
លោក អ៊ឹម សិទ្ធី រដ្ឋមន្រ្តីក្រសួងអប់រំ ផ្តល់អាហារូបករណ៍ដល់សិស្សក្រីក្រនៅខេត្តកំពង់ធំ
©ទេព សុរ៉ាវី
កម្មវិធីស្បៀងអាហារពិភពលោក របស់អង្គការសហប្រជាជាតិ បានចេញសេចក្តីប្រកាសព័ត៌មាន សម្រេចផ្តល់អាហារូបករណ៍ជាសាច់ប្រាក់ សម្រាប់ឆ្នាំសិក្សា២០១២នេះ ដល់សិស្សក្រីក្រនៅតាមសហគមន៍ជិត៥ពាន់នាក់ នៅកម្ពុជា ។ គម្រោងនេះជាផ្នែកសាកល្បងមួយ នៃកម្មវិធីអាហារតាមសាលារៀន ដែលផ្តល់ដោយកម្មវិធីស្បៀង អាហារពិភពលោក តាំងពីឆ្នាំ១៩៩៩ ហើយមានសិស្សក្រីក្រ ជិតកន្លះលាននាក់ កំពុងទទួលបាននូវអត្ថប្រយោជន៍នៃគម្រោងនោះ។
សិស្សបឋមសិក្សាក្រីក្រ ជិត៥ពាន់នាក់ ដែលរស់នៅក្នុងសហគមន៍ កំពុងជួបប្រទះបញ្ហាអសន្តិសុខស្បៀងនៅកម្ពុជា ទទួលបានប្រាក់អាហារូបករណ៍ចំនួន៥ដុល្លារក្នុងម្នាក់ៗ ជារៀងរាល់ខែ។ ការផ្តល់ឲ្យនេះ ធ្វើឡើងតាមរយៈគម្រោងផ្តល់អាហារូបករណ៍ជាសាច់ប្រាក់ នៃកម្មវិធីស្បៀងអាហារពិភពលោក។ នេះបើយោងតាមសេចក្តីប្រកាសព័ត៌មានរបស់កម្មវិធីស្បៀងអាហារពិភពលោក ចេញផ្សាយនៅថ្ងៃសុក្រ។ គម្រោងនេះផ្តោតសំខាន់ គឺដើម្បីជំរុញកុំឲ្យសិស្សក្រីក្របោះបង់ការសិក្សានៅត្រឹមថ្នាក់បឋមសិក្សា។
ក្នុងសេចក្តីប្រកាសព័ត៌មាន បានបន្តថា គម្រោងផ្តល់អាហារូបករណ៍ជាសាច់ ប្រាក់ផ្ទាល់ដល់សិស្សក្រីក្រ ជាផ្នែកសាកល្បងមួយ នៃកម្មវិធីអាហារតាមសាលា រៀន ដែលគាំទ្រដោយកម្មវិធីស្បៀងអាហារពិភពលោក តាំងពីឆ្នាំ១៩៩៩។ មានសិស្ស ក្រីក្រជិតកន្លះលាននាក់នៅកម្ពុជា ទទួលបានគម្រោងផ្តល់អាហារតាមសាលា ក្នុងរយៈពេលជាង ១០ឆ្នាំ។ តាមការស្រាវជ្រាវរបស់ក្រសួងអប់រំ បានឲ្យដឹងថាសិស្សក្រីក្រថ្នាក់ទី៤ និងថ្នាក់ទី៦ ប្រឈមមុខខ្ពស់ជាងគេបំផុត ចំពោះបញ្ហាបោះបង់ការសិក្សា។
រដ្ឋមន្រ្តីក្រសួងអប់រំ លោក អ៊ឹម សិទ្ធី បានឲ្យដឹងថា អត្រាបោះបង់ការសិក្សា ខ្ពស់ ជាបញ្ហាប្រឈមដ៏ចម្បង ដែលរារំាងដល់ការសម្រេចជោគជ័យនៃការអប់រំ ជាសកលនៅកម្រិតបឋមសិក្សា ។កម្មវិធីផ្តល់អាហារូបករណ៍ដល់គ្រួសារសិស្ស ក្រីក្រ ជាការជំរុញនិងលើកទឹកចិត្តឳពុកម្តាយ ឲ្យកូនអាចបន្តការសិក្សា។
តាមសំដីលោក ហ្សង់ ប្យ៉ែរ ដឺ ម៉ាហ្សឺរី ( Jean Pierre de Margerie ) នាយកកម្មវិធីស្បៀងអាហារពិភពលោក ប្រចាំកម្ពុជា បានឲ្យដឹងថាក្រសួងអប់រំត្រូវធានាឲ្យបានថា កុមារក្រីក្រ ទទួលបានការគាំទ្រ និងចាំបាច់បន្តការសិក្សាឲ្យបញ្ចប់នៅថ្នាក់បឋមសិក្សា។
បច្ចុប្បន្នក្រសួងអប់រំ កម្មវិធីស្បៀងអាហារពិភពលោក និងធនាគារពិភពលោក កំពុងធ្វើការវាយតម្លៃពីផលប៉ះពាល់ នៃការផ្តល់អាហារូបករណ៍ជាសាច់ប្រាក់និងស្បៀង ដើម្បីត្រៀមរៀបចំគោលនយោបាយសម្រាប់អាហារូបករណ៍នៅកម្រិតបឋមសិក្សា ក្នុងផែនការយុទ្ធសាស្រ្តថ្នាក់ជាតិ សម្រាប់វិស័យអប់រំនៅកម្ពុជា នៅឆ្នាំ២០១៣៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (1)
សិស្ស នៃគ្រួសារក្រីក្រក្នុងប្រទេសកម្ពុជាពិតជាត្រូវការជំនួយឧបត្ថម
ខ្ញុំសូមអរគុណ និងការគោរពដ៏ស្មោះស្ម័គ្រ ចំពោះវិទ្យុបារាំងអន្តរជាតិ (RFI) ដែលបានសរសេរ និងចុះផ្សាយអត្ថបទនេះ ព្រមទាំងអត្ថ បទផ្សេងៗជាច្រើនទៀតក្នុងការចូលរួមចំណែកលើកស្ទួយវិស័យព័ត៌មាន សិទ្ធិសេរីភាពក្នុងការសម្តែង មតិ ការអប់រំ និងសិក្សាស្រាវជ្រាវ ។ល។
ខ្ញុំក៏សូមសម្តែងនូវសេចក្តីអរគុណ និងការគោរពដ៏ស្មោះស្ម័គ្រ ចំពោះម្មវិធីស្បៀងអាហារពិភពលោក របស់អង្គការសហប្រជាជាតិ បានចេញសេចក្តីប្រកាសព័ត៌មាន សម្រេចផ្តល់អាហារូបករណ៍ជាសាច់ប្រាក់ សម្រាប់ឆ្នាំសិក្សា២០១២នេះ ដល់សិស្សក្រីក្រនៅតាមសហគមន៍ជិត៥ពាន់នាក់ នៅកម្ពុជា ។
ការផ្តល់អាហារូបករណ៍ជាសាច់ប្រាក់ និងស្បៀង គឺមិនទាន់គ្រប់គ្រាននោះទេ គឺត្រូវជួយផ្តល់ការ អប់រំ និងបណ្តុះបណ្តាលផ្នែកចិត្ត គំនិត ឬការគិត និងស្មារតី ជួយប្រឹក្សាយោបល់ និងជួយ តម្រង់ទិស ជាចាំបាច់ ពីសំណាក់ឪពុកម្តាយ ឬអាណាព្យាបាល លោកគ្រូ អ្នកគ្រូ ក្រសួងអប់រំ យុវជន និងកីឡា អង្គការ សមាគម ឬស្ថាប័ន/អង្គភាពជាតិ និងអន្តរជាតិនានា ដើម្បីជួយឱ្យពួក គេក្លាយទៅជាទំពាំស្នងឫស្សី និងជាធនធានមនុស្សដ៏មានសក្តានុពលជាវិជ្ជមាន ប្រកបដោយ ភាពទទួលខុសត្រូវខ្ពស់ ស្មោះត្រង់ គុណភាពល្អ ចរិតល្អ ពលរដ្ឋល្អ ការងារល្អ ក្រមសីលធម៌ គុណធម៌ ។ល។
ប្រតិកម្មជុំវិញអត្ថបទនេះ