ក្រុមផ្តាច់ខ្លួនបានដោះលែងអ្នកសង្កេតការណ៍ទាំង៧នាក់របស់អង្គការ OSCE
អ្នកសង្កេតការណ៍ទាំងនោះ ត្រូវបានក្រុមផ្តាច់ខ្លួនស្និទ្ធនឹងរុស្ស៊ីចាប់ខ្លួន កាលពីចុងសប្តាហ៍មុន។ ដំណឹងស្តីពីការដោះលែងក្រុមអ្នកសង្កេតការណ៍នេះត្រូវបានប្រកាសឲ្យដឹង នៅព្រឹកថ្ងៃសៅរ៍ ដោយតំណាងពេញសមត្ថកិច្ចរបស់ប្រធានាធិបតីរុស្ស៊ី ទទួលបន្ទុកខាងបញ្ហានេះ គឺលោក Vladimir Loukine។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ក្នុងចំណោម អ្នកសង្កេតការណ៍យោធាទាំង៧នាក់ គឺមានជាតិអាល្លឺម៉ង់ ៤នាក់ ឆែកម្នាក់ ដាណឺម៉ាកម្នាក់ និងប៉ូឡូញម្នាក់។ តាមពិត ក្រុមអ្នកសង្កេតការណ៍យោធារបស់អង្គការ OSCE ដែលត្រូវចាប់ខ្លួនទាំងនោះ មានគ្នាដល់ទៅ ៨នាក់ ឯណោះ ប៉ុន្តែ នាយទាហានម្នាក់ដែលជាជាតិស៊ុយអែត ត្រូវបានដោះលែងតាំងពីថ្ងៃចន្ទ ដើមសប្តាហ៍នេះម៉្លេះ មកពីគាត់ឈឺរោគទឹកនោមផ្អែម ដែលត្រូវការថ្នាំព្យាបាលឲ្យបានទៀងទាត់ មិនអាចអាក់ខានបាន។
ថ្លែងថ្ងៃនេះ ទៅពួកអ្នកកាសែត តំណាង ពេញសមត្ថកិច្ចរបស់ប្រធានាធិបតីរុស្ស៊ី ទទួលបន្ទុកខាងបញ្ហានេះ លោក Vladimir Loukine លំអិតថា ត្រូវបានដោះលែងឲ្យមាន សេរីភាព គឺទាំងនាយទាហានជាតិអ៊ុយក្រែន ៥នាក់ ជាមន្ត្រីនៃ «ស្ថាប័នសន្តិសុខអ៊ុយក្រែន” ដែលបានអមដំណើរ ក្រុមអ្នកសង្កេតការណ៍យោធាបរទេស ៨នាក់នោះ ដែលបានបំពេញបេសកកម្ម នៅតំបន់ខាងកើតនិងខាងត្បូងអ៊ុយក្រែន គឺទៅតាមសេចក្តីអញ្ជើញ របស់អាជ្ញាធរក្រុងគៀវ។
កងសេនាជនរុស្ស៊ីនិយម នៅក្រុង Slovyansk ចោទក្រុមនាយទាហាន ១៣នាក់នោះ ថាជា ចារបុរសលួចយកការណ៍ឲ្យក្រុងគៀវ ដ្បិតពេលឃាត់ខ្លួនពួកគេ នៅនឹងប៉ុស្តិ៍ល្បាតមួយ ត្រង់មាត់ច្រកចូល ក្រុងនេះ គេបានរកឃើញនៅនឹងជនទាំងនេះ គឺផែនទី ដែលមានចុចសម្គាល់ ទីកន្លែងនានា ជាប៉ុស្តិ៍ល្បាតការពារមាត់ច្រកចូលក្នុងក្រុងនេះ ដែលកាន់កាប់ ដោយពួកបះបោររុស្ស៊ីនិយម។
គួរនិយាយថា ជនបរទេសទាំងនោះ មុនដំបូង ត្រូវពួកផ្តាច់ទឹកដីនិយម គ្រោងប្តូរទល់នឹងគ្នីគ្នាខ្លួន ដែលជាប់ក្នុងការឃុំឃាំងនៅឯពន្ធនាគារក្រុងគៀវ។
ក្នុងសប្តាហ៍នេះ ពេលសន្ទនាតាមទូរសព្ទ លោកស្រីប្រមុខរដ្ឋាភិបាលអាល្លឺម៉ង់ Angela Merkel បានសុំលោកប្រធានាធិបតីរុស្ស៊ី ពូទីន ឲ្យប្រើឥទ្ធិពលខ្លួនទៅលើពួកសកម្មជនរុស្ស៊ីនិយម ដើម្បី ជួយដោះលែងជនបរទេសជាប់ថ្នូរ ដែលមាន រូបវរសេនីយឯកអាល្លឹម៉ងជាមេក្រុម ប៉ុន្តែ ក្រោយមក អ្នកនាំពាក្យរបស់ប្រមុខរដ្ឋរុស្ស៊ី បានបង្ហើបឲ្យដឹងថា រុស្ស៊ី គ្មាន «ទឹកមាត់ប្រៃ» លើពួកគេឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ