សហជីពប្រឆាំង និងគាំទ្ររដ្ឋាភិបាល ប្រជែងទាញកម្មករ
ថ្ងៃទី២៤កុម្ភៈនេះ ជាថ្ងៃចាប់ផ្តើមនៃការធ្វើកូដកម្មរបស់កម្មករ កម្មការិនីដែលធ្វើពហិកាមិនធ្វើការបន្ថែមម៉ោង។ ចលនានេះត្រូវបានដឹកនាំដោយក្រុមសហជីពមួយចំនួនដែលមាននិន្នាការប្រឆាំងរដ្ឋាភិបាល។ គោលដៅនៃការដឹកនាំកម្មករមិនអោយធ្វើការងារថែមម៉ោង គឺដើម្បី ទាមទារអោយរដ្ឋាភិបាលដោះលែងកម្មករ និងសកម្មជនសិទ្ធិមនុស្ស២៣នាក់។ សហជីពកាត់ដេរដែលគាំទ្ររដ្ឋាភិបាលបានចាត់ទុក ការចលនាកូដកម្មនៅពេលនេះថាមានលក្ខណៈនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
មេសហជីពដែលមាននិន្នាការស្រប និងប្រឆាំង រដ្ឋាភិបាលនឹងត្រូវធ្វើការងារច្រើននៅថ្ងៃចន្ទទី២៤កុម្ភៈនេះ ពិសេសចាប់ពីពេលរសៀលនេះទៅ។ ជាច្រើនថ្ងៃមកហើយសហជីពមួយចំនួនបានចែកផ្សាយខិត្តប័ណ្ណចំនួន២០ម៉ឺនសន្លឹក ដែលអំពាវនាវអោយកម្មករចូលរួមធ្វើកូដកម្មមិនធ្វើការថែមម៉ោង ចាប់ពីថ្ងៃទី២៤ ដល់ថ្ងៃទី២៨កុម្ភៈ។ គោលដៅគឺ ដើម្បីទាមទារអោយតុលាការដោះលែងដែលត្រូវចាប់ខ្លួនឃុំខ្លួនទាំង២១នាក់ និងបន្តចរចាដំឡើងប្រាក់ឈ្នួលអប្បបរមា។
ចលនាអំពាវនាវនឹងត្រូវចាប់ផ្តើមជាក់ស្តែងនៅម៉ោង៤រសៀលនេះ។ ក្រុមមេដឹកនាំសហជីពមួយនឹងបន្តអំពាវនាវអោយកម្មករ កម្មការិនីចេញពីរោងចក្រ មិនអោយធ្វើការថែមម៉ោង ខណៈមេសហជីពមួយចំនួនទៀតដែលមាននិន្នាការគាំទ្ររដ្ឋាភិបាលក៏គ្រោងចែកខិត្តប័ណ្ណ និងអំពាវនាវកុំអោយកម្មករ កម្មការិនីចូលរួមក្នុងកូដកម្មនោះ និងនៅបន្តធ្វើការងារជាធម្មតា។
លោកអាត់ ធន់ ប្រធានសហព័ន្ធសហជីពស៊ីខៅឌូ ដែលជាអ្នកដឹកនាំអំពាវនាវមួយរូប អោយកម្មករចូលរួមធ្វើកូដកម្មមិនធ្វើការថែមម៉ោងនោះ បានប្រាប់វិទ្យុបារាំងអន្តរជាតិនៅព្រឹកថ្ងៃចន្ទនេះថា កម្មករជាច្រើនបានឆ្លើយតបជាវិជ្ជមានថា ពួកគេនឹងចូលរួមធ្វើកូដកម្មនេះ ចាប់ពីល្ងាចថ្ងៃចន្ទនេះទៅ។ លោកអាត់ ធន់ទទួលស្គាល់ថា មានក្រុមសហជីពដែលគាំទ្ររដ្ឋាភិបាលបានចេញមុខមកឃោសនា និងអំពាវនាវមិនអោយកម្មករចូលរួមក្នុងចលនាកូដកម្មនេះដែរ។
លោកសោម អូន ប្រធានក្រុមប្រឹក្សាសហជីពជាតិកម្ពុជា ដែលគេស្គាល់ថាមាននិន្នាការគាំទ្ររដ្ឋាភិបាលនោះ មិនបានបដិសេធការលើកឡើងរបស់លោកអាត់ ធន់ឡើយ។ ចំពោះលោកសោម អូន គេត្រូវពន្យល់កម្មករ កម្មការិនីអំពីផលវិបាកនៃអស្ថិរភាព សេដ្ឋកិច្ច ប្រសិនបើកម្មករ កម្មការិនីចូលរួមក្នុងចលនាកូដកម្មនេះ។ លោកសោម អូនពន្យល់ថា កម្មករ កម្មការិនីនឹងបាត់បង់ប្រយោជន៍ដូចការចូលរួមបាតុកម្មលើកមុន ដែលមិនទទួលបានផលអ្វីសោះនោះ។
បើសហជីពខ្លះចែកខិត្តប័ណ្ណស្នើអោយកម្មករចូលរួមកូដកម្មមិនធ្វើការថែមនោះ លោកសោម អូនក៏ប្រាប់អោយដឹងដែរ ចាប់ពីល្ងាចនេះទៅសហជីពលោកក៏ត្រៀមចែកខិត្តប័ណ្ណប្រាប់កម្មករ មិនអោយចូលរួមកូដកម្មដែរ។
គួររំលឹកថា មានក្រុមសហជីពចំនួន៨ដែលបានអំពាវនាវរូមគ្នាស្នើកម្មករអោយធ្វើកូដកម្មមិនទៅធ្វើការថែមម៉ោង ពីថ្ងៃទី២៤ដល់ថ្ងៃទី២៨កុម្ភៈ ដែលជាដំណាក់កាលនៃការតវ៉ាដំបូង។ បន្ទាប់មកទៀត ក្រុមសហជីពទាំងនេះមានគម្រោងរៀបចំការតវ៉ានៅលើទីលានប្រជាធិបតេយ្យ នៅថ្ងៃទី៨មីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ