កម្ពុជា -

អត្ថបទចុះផ្សាយនៅថ្ងៃ អាទិត្យ 30 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 03 តុលា 2012

នាយករដ្ឋមន្ត្រីហ៊ុន សែន នឹងប្រគល់មេដាយមាសអោយក្រុមយុវជនស្ម័គ្រចិត្ត

លោកនាយករដ្ឋមន្រ្តី ហ៊ុន សែន (រូបថតឯកសារ)

©channa/rfi

ដោយ គីន ហត្ថារ៉ូ

ថ្លែងពីស្រុកគាស់ក្រឡ ខេត្តបាត់ដំបង់ នៅខណៈដែលចុះប្រគល់ប័ណ្ណកម្មសិទ្ធិសម្គាល់ដីធ្លីជាលើកទី២ ដល់ពលរដ្ឋ១.៥៩១គ្រួសារ លោកនាយករដ្ឋមន្ត្រីហ៊ុនសែនបានប្រកាសជាសាធារណៈថា លោកនឹងប្រគល់មេដាយមាសដល់ក្រុមយុវជនស្ម័គ្រចិត្តទាំងអស់ព្រមទាំងមន្ត្រីពាក់ព័ន្ធដែលបានចូលរួមក្នុងការវាស់វែងបែងចែកធីធ្លីអោយពលរដ្ឋតាមគោលនយោបាយចាស់សកម្មភាពថ្មីលើវិស័យដីធ្លីរបស់រដ្ឋាភិបាល។

សេចក្តីរាយការណ៍របស់គិន ហត្ថារ៉ូ ពីទីក្រុងភ្នំពេញ

ស្តាប់ (02:02)

30/09/2012

លោកនាយករដ្ឋមន្ត្រី ហ៊ុន សែន នឹងប្រគល់មេដាយមាសដល់ក្រុមយុវជនស្ម័គ្រចិត្តទាំងអស់ព្រមទាំងមន្ត្រីពាក់ព័ន្ធដែលបានចូលរួមក្នុងការវាស់វែងបែងចែកដីធ្លីអោយពលរដ្ឋតាមគោលនយោបាយចាស់សកម្មភាពថ្មីលើវិស័យដីធ្លីរបស់រដ្ឋាភិបាល។

លោកនាយករដ្ឋមន្ត្រីបានថ្លែងយ៉ាងដូច្នេះពីស្រុកគាស់ក្រឡ ខេត្តបាត់ដំបង នៅខណៈដែលលោកចុះទៅចែកប័ណ្ណកម្មសិទ្ធិជាលើកទីពីរដល់ពលរដ្ឋ១.៥៩១ គ្រួសារ ដែលទទួលប័ណ្ណកម្មសិទ្ធិ ចំនួន ២.១៧៣ប័ណ្ណ លើផ្ទៃដីសរុបចំនួន ១០.៣០៥ ហិកតា។

លោកនាយករដ្ឋមន្ត្រី បានថ្លែងថា លោកនឹងប្រគល់មេដាយមាសដល់ក្រុមយុវជនស្ម័គ្រចិត្តទាំងអស់ ព្រមទាំងមន្ត្រីពាក់ព័ន្ធទាំងអស់ ក្នុងនោះរួមទាំងអ្នកបើកបររថយន្ត និងមន្ត្រីសុខាភិបាលផងដែរ។ ហើយលោកនាយករដ្ឋមន្ត្រីនឹងធ្វើពិធីជប់លៀងដ៏ធំមួយ នៅឯមជ្ឈមណ្ឌលកោះពេជ្រ ដោយអនុញ្ញាអោយនិស្សិតនាំប្រពន្ធ មិត្តស្រី ឬគូដណ្តឹងមកចូលរួមនៅក្នុងកម្មវិធីនោះផងដែរ។

នេះជាការចុះបែងចែកប័ណ្ណកម្មសិទ្ធិលើកទី២ហើយ បន្ទាប់ពីការចុះបែងចែកប័ណ្ណកម្មសិទ្ធិសម្គាល់ដីធ្លីលើកដំបូងអោយពលរដ្ឋចំនួន៥៦០គ្រួសារ ដែលមានប័ណ្ណកម្មសិទ្ធិសម្គាល់ដីធ្លី ៨៩០ ក្បាលដី ស្ថិតនៅក្នុងឃុំស្រែចារ និងឃុំ២ធ្នូ ស្រុកស្នួល ខេត្តក្រចេះ។ តាមការអះអាងរបស់លោកនាយករដ្ឋមន្ត្រី ឥឡូវនេះ ការបិទផ្សាយបានចំនួន ១៨.១៥១ ក្បាលដីទៅហើយ។ លោកនាយករដ្ឋមន្ត្រីបានថ្លែងអង្វរករដល់ពលរដ្ឋដែលទទួលបានកម្មសិទ្ធិទាំងនោះមិនត្រូវយកដីទៅលក់នោះទេតែអាចយកទៅបញ្ចាំបាន។

ក្រុមយុវជនស្ម័គ្រចិត្តដែលមានស្លៀកសំលៀកបំពាក់ឯកសណ្ឋានទាហាន មានស្លាកសញ្ញាក្រសួងរៀបចំដែនដី នគរូបនីយកម្មនិងសំណង់ បានចាប់ផ្តើមចេញដំណើរចាប់តាំងពីថ្ងៃទី២៨ ខែមិថុនា ឆ្នាំ២០១២ នៅក្នុងខេត្តចំនួន១៣ នៅក្នុងប្រទេសកម្ពុជា ដូចជា ខេត្តកំពង់ឆ្នាំង ពោធិ៍សាត់ ខេត្តបាត់ដំបង បន្ទាយមានជ័យ កំពង់ចាម កំពង់ធំ ក្រចេះ ព្រះវិហារ កំពង់ស្ពឺ កំពត រតនគិរី មណ្ឌលគិរី និងខេត្តស្ទឹងត្រែង ដែលយវុជនស្ម័គ្រចិត្តសរុបមាន១១៧៨នាក់។ យុទ្ធនាការវាស់វែងដីនេះ អាចនឹងចំណាយពេលចាប់ពី៦ ទៅ ៨ខែ នៅលើផ្ទៃដីដែលត្រូវវាស់វែងចំនួន ១.២០០.០០០ហិកតានៅទូទាំងប្រទេស ជូនប្រជាពលរដ្ឋចំនួន៣៥០.០០០គ្រួសារ៕

tags: កម្ពុជា