កម្ពុជា -

អត្ថបទចុះផ្សាយនៅថ្ងៃ សៅរ៍ 11 សីហា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 11 សីហា 2012

បណ្តាញសហគមន៍ព្រៃឡង់នាំគ្នាចូលព្រៃដើម្បីល្បាតសាជាថ្មី

ប្រជាសហគមន៍ព្រៃឡង់ កាលពីពេលនាំគ្នាមកបន់ស្រន់នៅមុខព្រះអង្គដងកើ ក្រុងភ្នំពេញ (រូបថតឯកសារ)

RFI/Channa Siv

បណ្តាញសហគមន៍ព្រៃឡង់នៅក្នុងស្រុកសណ្តាន់ខេត្តកំពង់ធំរាប់រយនាក់នឹងធ្វើដំណើរតាមម៉ូតូចូលទៅក្នុងព្រៃឡង់រយៈពេល៣ថ្ងៃចាប់ពីថ្ងៃ១៣ដល់ថ្ងៃ១៥ខែសីហាឆ្នាំ២០១២នេះដើម្បីល្បាតនិងរុករកបទល្មើសព្រៃឈើ។នេះបើយោងតាមការប្រកាសឲ្យដឹងរបស់បណ្តាញសហគមន៍ព្រៃឡង់។ បេសកកម្មល្បាតព្រៃនេះធ្វើឡើងបន្តាប់ពីប្រជាសហគមន៍សង្ស័យថាសកម្មភាពកាប់បំផ្លាញព្រៃឡង់បានកម្រើកឡើងវិញ។

សេចក្តីរាយការណ៍របស់ សេង សិរីរ័ត្ន ពីភ្នំពេញ

ស្តាប់ (03:07)

11/08/2012

ប្រជាពលរដ្ឋបណ្តាញសហគមន៍ព្រៃឡង់ស្រុកសណ្តាន់ ខេត្តកំពង់ធំចំនួន១០០នាក់ នឹងចូលទៅក្នុងព្រៃឡង់ ដើម្បីប្រមូលវត្ថុតាងបទល្មើសព្រៃឈើដាក់ជូនរដ្ឋាភិបាល ដើម្បីវែកមុខជនល្មើស និងជួយការពារធនធានធម្មជាតិរបស់ប្រទេសផង។

លោក ឈឹម សាវុធ អ្នកសប្រសម្រួល ពង្រឹងសហគមន៍ព្រៃឡង់ នៃមជ្ឈមណ្ឌលសិទិ្ធមនុស្ស កម្ពុជាបានថែ្លងអោយដឹងថា ប្រជាពលរដ្ឋចំនួន ១០០ នាក់នឹងដើរចូលទៅក្នុងព្រៃឡង់រយៈពេល៣ថៃ្ង ចាប់ពីថៃ្ងទី១៣ដល់ថៃ្ងទី១៥ ខែសីហា ឆ្នាំ២០១២ ដើម្បីត្រួតពិនិត្យមើល និង ប្រមូលវត្ថុតាងទាំងអស់ ដើម្បីរៀបចំឯកសារដាក់អោយរាជរដ្ឋាភិបាល និងអ្នកជំនាញចាត់វិធានការទៅតាមផ្លូវច្បាប់។

គម្រោងល្បាតព្រៃជាថ្មីនេះ បានធ្វើឡើងបន្ទាប់ពីប្រជាសហគមន៍បានទទួលព័ត៌មានថា បច្ចុប្បន្ននេះ ក្នុងព្រៃឡង់ ចំណុចឃុំដងកាំបិត មានការកាប់ព្រៃស្រោង រាប់រយហិកតា ដើម្បីរានយកដីធ្វើចំការ ហើយជនល្មើសគឺជាមន្ត្រីប្រដាប់អាវុធក្នុងខេត្តនេះទៀតផង។

ពលរដ្ឋរស់នៅ ឃុំដងកាំបិត ដែលជាចំណុចតំបន់ដែលកំពុងរងការកាប់បំផ្លាញ លោក ជុំ យ៉ិន បានថ្លែងអោយដឹងថា មានឈ្មួញ និងអ្នកមាន មួយចំនួនបានចូលទៅកាប់បំផ្លាញព្រៃឡង់ជារៀងរាល់ថៃ្ង ហើយលោកទទូចសុំអោយរាជរដ្ឋាភិបាលនិងអាជ្ញាធរខ័ណរដ្ឋបាលព្រៃឈើ ចុះបង្រ្កាប បទលើ្មសនេះផង។

ប៉ុន្តែ អភិបាលរងខេត្តកំពង់ធំ លោក អ៊ុត សំអន បានអះអាងថា ដោយសារតែប្រជាពលរដ្ឋ មួយចំនួននៅក្នុងតំបន់នោះ មានការខ្វះខាត ទើបពួកគេចូលទៅក្នុងព្រៃឡង់ ដើម្បីកាប់ព្រៃ និងដឹកបញ្ជូនព្រៃឈើ យកមកធើ្វផ្ទះរបស់ពួកគេ ហើយនេះជាប្រពៃណីរបស់ពួកគាត់ទេ។ យ៉ាងណាក៏ដោយ បច្ចុប្បន្ននេះលោកកំពុងតែអោយអាជ្ញាធរខ័ណ្ឌរដ្ឋបាលព្រៃឈើ ចុះទៅត្រួតពិនិត្យលើព្រៃឡង់ ដើម្បីឲ្យដឹងថា តើការកាប់ព្រៃឈើនៅទីនោះ មានទ្រង់ទ្រាយធំឬយ៉ាងណា។ បើមានពិតមែន លោកអះអាងថា នឹងចាត់វិធានការបង្រ្កាបជនបទលើ្មសទាំងនោះ។

ក្រៅពីការកាប់ព្រៃរានយកដី ក៏មានបទល្មើសកាប់ឈើកំពុងកើតឡើងយ៉ាងធ្ងន់ធ្ងរ។ ក្នុងមួយ ថ្ងៃៗ មានគោយន្ត រទេះគោមិនតិចជាង៣០គ្រឿងទេ ដែលចូលព្រៃកាប់ឈើ និងមានរណាយន្តអាឈើឮរំពងពេញព្រៃ។ ទាំងអស់នេះគឺផ្ទុយគ្នាពីការបញ្ជាក់របស់អភិបាលរងខេត្តកំពង់ធំថា ពុំមានបទល្មើសកើតឡើងនៅតំបន់នោះទេ។

គួរបញ្ជាក់ថា ព្រៃឡង់គឺជាព្រៃដ៏ធំមួយដែលជាប់ខេត្ត៤ គឺ ខេត្តកំពង់ធំ ក្រចេះ សឹ្ទងត្រែង និងព្រះវិហារ ដែលមានទំហំ៤០ម៉ឺនហិកតា។ ប្រជាសហគមន៍ព្រៃឡង់ធ្លាប់បានចូលព្រៃ ដើម្បីដើរល្បាតបែបនេះជាច្រើនលើកមកហើយ ដើម្បីការពារព្រៃដ៏មានតម្លៃនេះកុំឲ្យមានការកាប់បំផ្លាញ។ ជួនកាល ពួកគេក៏បានប្រឈមមុខនឹងការរារាំងរបស់អាជ្ញាធរទៀតផង៕