វិបត្តិអ៊ុយក្រែន៖លោកពូទីនបានស្នើឲ្យមានលក្ខន្តិកពិសេសសម្រាប់តំបន់ប៉ែកខាងកើតអ៊ុយក្រែន
នៅពេលដែលសហគមន៍អន្តរជាតិកំពុងស្វែងរកទណ្ឌកម្មថ្មីប្រឆំាងប្រទេសរុស្ស៊ីនៅក្នុងវិបត្តិអ៊ុយក្រែន លោកប្រធានាធិបតីរុស្ស៊ីពូទីនបានលើកឡើងពីដំណោះស្រាយមួយចំនួនដើម្បីបញ្ចប់វិបត្តិ។ ទីភ្នាក់ងារព័ត៌មានរុស្ស៊ី Itar-Tass បានស្រង់សម្តីលោកពូទីនដែលថា មានតែការបើកកិច្ចចរចាជាបន្ទាន់រវាងរដ្ឋអំណាចអ៊ុយក្រែន និងពួកឧទ្ទាមទេទើបគេអាចបិទបញ្ចប់វិបត្តិបានឆាប់រហ័ស។ យោងតាមលោកពូទីន កិច្ចចរចានោះនឹងត្រូវកំណត់ឲ្យបានច្បាស់អំពីរចនាសម្ព័ន្ធនយោបាយ និងលក្ខន្តិកនៅតំបន់ប៉ែកខាងកើតអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
កិច្ចចរចាស៊ីជ្រៅ និងច្បាស់លាស់ត្រូវតែចាប់ផ្តើមភ្លាមៗដើម្បីជជែកអំពីរចនាសម្ព័ន្ធនយោបាយ និងលក្ខន្តិកនៅតំបន់ប៉ែកខាងកើតអ៊ុយក្រែនដែលកំពុងទទួលរងការងើបបះបោរពីពួកឧទ្ទាមអ្នកទាមទារផ្តាច់ទឹកដីនិយមក្នុងគោលដៅការពារផលប្រយោជន៍ស្របច្បាប់របស់ប្រជាជនដែលកំពុងរស់នៅទីនោះ នេះជាការថ្លែងរបស់លោកប្រធានាធិបតីរុស្ស៊ីពូទីនដែលទីភ្នាក់ងារព័ត៌មានរុស្ស៊ី Itar-Tass យកមកចុះផ្សាយក្នុងថ្ងៃអាទិត្យ ទី៣១ សីហា។ តាមរយៈសម្តីនេះ គេមិនដឹងថាលោកប្រមុខរដ្ឋរុស្ស៊ីចង់មានន័យយ៉ាងម៉េចទេ។ តែអ្នកនំាពាក្យវិមានក្រិមឡំាងបានធានាថា លោកពូទីនមិនមែនអំពាវនាវឲ្យបង្កើតរដ្ឋឯករាជ្យមួយនៅក្នុងតំបន់ប៉ែកខាងកើតនោះទេ។ អ្នកនំាពាក្យវិមានក្រិមឡំាងរូបនេះដដែលបានបញ្ជាក់ថា តំបន់ប៉ែកខាងកើតអ៊ុយក្រែននៅតែជាអធិបតេយ្យរបស់អ៊ុយក្រែន និងដែលជម្លោះសព្វថ្ងៃ គឺជាជម្លោះផ្ទែក្នុងអ៊ុយក្រែនសុទ្ធសាធ ពោលគឺមិនមែនជាជម្លោះរវាងរុស្ស៊ី និងអ៊ុយក្រែនទេ។
តែទន្ទឹមគ្នានេះ លោកប្រមុខរដ្ឋរុស្ស៊ីពូទីនបានអះអាងថា រុស្ស៊ីក៏មិនអាចឈរក្រពាត់ដៃមើលបានដែរ នៅពេលដែលឃើញមានការសម្លាប់មនុស្សនៅអ៊ុយក្រែន។ មួយវិញទៀត លោកពូទីនបានបញ្ជាក់ថា លោកមិនទាយទុកមុនថា តើវិបត្តិអ៊ុយក្រែននឹងត្រូវចប់នៅពេលណា និងដោយមធ្យោបាយណាទេ ព្រោះអ្វីៗវាអាស្រ័យលើឆន្ទៈនយោបាយរបស់រដ្ឋអំណាចអ៊ុយក្រែនបច្ចុប្បន្ន។ ដោយឡែក លោកពូទីនក៏បានឆ្លៀតស្តីបន្ទោសក្រុមប្រទេសលោកខាងលិចដែលបានឈឺឆ្អាលខ្លំាងជ្រុលនៅក្នុងវិបត្តិអ៊ុយក្រែននេះ។ លោកពូទីនយល់ថា ការគំាទ្ររបស់បច្ចិមលោកចំពោះប្រតិបត្តិយោធាអ៊ុយក្រែន គឺជាទង្វើផ្ទុយនឹងតម្លៃប្រជាធិបតេយ្យរបស់អឺរ៉ុប។
ទាក់ទងនឹងជំនួបថ្មីៗនេះរវាងលោកពូទីន និងលោកប្រធានាធិបតីអ៊ុយក្រែនប៉ូរ៉ូឆេនកូ លោកពូទីនបានចាត់ទុកលោកប៉ូរ៉ូឆេនកូថា ជាដៃគូម្នាក់ដែលគេអាចនិយាយគ្នាបាន និងថា លោកសង្ឃឹមនឹងមានដំណោះស្រាយនយោបាយមួយនាពេលឆាប់ៗខាងមុខ។ តែលោកពូទីនក៏ឆ្លៀតព្រមានថា អ៊ុយក្រែនកំពុងស្ថិតមាត់ជ្រោះនៃជម្លោះរំារ៉ៃមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ