Delicious
Digg
Facebook
Twitter
Yahoo!
Technorati
ចិន -
អត្ថបទចុះផ្សាយនៅថ្ងៃ ព្រហស្បតិ៍ 05 កក្កដា 2012 -
ព័ត៌មានទើបកែប្រើលើកចុងក្រោយ ថ្ងៃ សុក្រ 06 កក្កដា 2012
អាជ្ញាធរបោះបង់ចោលគម្រោងសាងសង់រោងចក្រស្លដែកថែប
ប្រជាជននៅក្រុង Shifang នាំគ្នាធ្វើបាតុកម្មប្រឆាំងគម្រោងសាងសង់រោងចក្រស្លដែកថែបឆ្នាំ២០១២
REUTERS/Handout
បន្ទាប់ពីបានកេណ្ឌគ្នីគ្នានិងបានប៉ះទង្គិចយ៉ាងហិង្សាជាមួយក្រុមនគរបាលអស់២ថ្ងៃមក ប្រជាជននៅក្រុង Shifang នៅទីបំផុតទៅ បានទទួលជ័យជំនះ។ អាជ្ញាធរតំបន់ បានសម្រេចចិត្តលុបចោលវិញ គម្រោងសាងសង់រោងចក្រស្លដែកថែបមួយ ដោយហេតុប្រជាជន ធ្វើបាតុកម្មតវ៉ាប្រឆាំងថា "គម្រោងសាងសង់រោងចក្របែបនេះនិងជំរុញឲ្យបរិសា្ថនតំបន់ទទួលរងអន្តរាយ ។ថ្ងៃពុធម្សិលមិញ ប្រជាជននៅ Shifang ជាច្រើនពាន់នាក់នៅតែប្រមូលផ្តុំគ្នាទៀតដោយហេតុពួកគេនៅតែមន្ទិលសង្ស័យពុំទាន់ទុកចិត្តលើអាជ្ញាធរទាំងស្រុងនោះឡើយ។
តាំងពីថ្ងៃចន្ទដើមសប្តាហ៍ប្រជាជននៅក្រុង Shifangបានកេណ្ឌគ្នីគ្នាជាច្រើនពាន់នាក់និងបានលុកលុយចូលទៅក្នុងទីស្នាក់ការអាជ្ញាធរតំបន់ដោយបានវាយបំផ្លាញយានជំនិះនគរបាល ។ នគរបាល បានវាយបង្ក្រាបតបត វិញ យ៉ាងកាចសាហាវ ទៅលើបាតុករដោយបោកគ្រាប់បែកផ្សែង និង វាយសំពងដោយព្រនង់។
ការចូលវាយលុករបស់បាតុករទៅលើទីស្នាក់ការអាជ្ញាធរ គឹដើម្បីប្រឆាំងគម្រោងសាងសង់រោងចក្រស្លដែកថែបមួយដែលពួកគេយល់ថានឹងធ្វើឲ្យបរិស្ថានតំបន់ទទួលរងអន្តរាយ ។ នៅឱកាសនោះ នគរបាល បានចាប់ខ្លួនបាតុករ ២៧នាក់ពីបទបានវាយកំទេចកញ្ចក់និងចោលដុំថ្ម ដុំឥដ្ឋ ទៅលើនគរបាលនិងមន្ត្រីរដ្ឋការ ប៉ុន្តែក្រោយមក បាតុករ២១នាក់ត្រូវបានដោះលែងវិញ ។
« បាតុករពីរនាក់ ប្រហែលជាបានស្លាប់នៅក្នុងការប្រឈមមុខជាមួយនគរបាល" -នេះបើយោងតាមការបញ្ជាក់របស់អង្គការ Human Rights Defenders ដែលជាអង្គការការពារសិទ្ធិមនុស្សចិន ក៏ប៉ុន្តែព័ត៌មាននេះ ត្រូវបានរដ្ឋាភិបាលបដិសេធចោល។
ដោយ ពុំអាចបង្ក្រាបបាតុកម្មឲ្យស្ងប់ស្ងាត់នោះ-ប្រមុខគណបក្សកុម្មុយនិស្តលោក Li Chengjing បានសម្រេចចិត្តបញ្ឈប់គម្រោងសាងសង់រោងចក្រស្លដែកថែប។ ក៏ប៉ុន្តែ អាជ្ញាធរតំបន់នេះ នៅតែខិតខំនិយាយអួតអាង ពីសារៈប្រយោជន៍នៃគម្រោងសាងសង់នេះ ដោយអះអាងថា « រោងចក្រធុននេះនឹងជំរុញឲ្យមានការងារធ្វើច្រើនសំរាប់ប្រជាជននិងបានផលចំណេញច្រើនសំរាប់ជាតិដែរ។
ប្រមុខគណបក្សកុម្មុយនិស្តនៅ Shifang- បានទទួលស្គាល់ដែរ ពីការងើបបះបោរប្រឆាំងរបស់ប្រជាជន និងបរាជ័យរបស់រដ្ឋាភិបាលក្នុងការពន្យល់ប្រជាជនខ្លួនអំពីផលប្រយោជន៍ជាច្រើនទៀតដែលនឹងត្រូវបានទទួលពីគម្រោងសាងសង់រោងចក្រ។
ទោះបីជាអាជ្ញាធរ-ប្រកាសលុបចោលគម្រោងសង់រោងចក្រក៏ដោយក្តី ប្រជាជន Shifang នៅតែប្រមូលផ្តុំគ្នាដដែលនៅជុំវិញទីស្នាក់ការអាជ្ញាធរនៅម្សិលមិញនេះ-ដែលជា ទីកន្លែងធ្លាប់មានការប៉ះទង្គិចគ្នាប៉ុន្មានថ្ងៃ រវាងនគរបាលនិងក្រុមបាតុករ-នេះជាអំណះអំណាងរបស់អ្នកកាសែតថតរូបម្នាក់នៃទីភ្នាក់ងារព័ត៌មានបារាំង AFP។
ការប្រមូលផ្តុំគ្នានេះនៅម្សិលមិញ បញ្ជាក់យ៉ាងច្បាស់ដែរថា ប្រជាជន Shifang នៅតែពុំទាន់ជឿទុកចិត្ត១០០%ទៅលើការសន្យារបស់អាជ្ញាធរឡើយនិងក៏បារម្ភខ្លាំងដែរ ខ្លាចការសន្យារបស់អាជ្ញាធរនេះ គ្រាន់តែជាលេសមួយដើម្បីបោកបញ្ឆោតពួកគេឲ្យឈប់ធ្វើចលនាបាតុកម្មតែប៉ុណ្ណោះគត់។
នៅប្រទេសចិន ការការពារបរិស្ថាន ជាញឹកញាប់តែងតែត្រូវគេបំភ្លេចចោល ដោយគេផ្តោតការយកចិត្តទុកដាក់ខ្លាំងទៅលើ តែកំណើនសេដ្ឋកិច្ចនិងការពង្រីកឧស្សាហកម្មប៉ុណ្ណោះ ហេតុដូច្នេះហើយ បានជាប្រជាជន នាំគ្នាងើបបះបោរតវ៉ាប្រឆាំងនឹងគម្រោងសាងសង់រោងចក្រឧស្សាហកម្មទាំងនេះដែលត្រូវប្រជាជនចោទថា ជាប្រភពនៃការបញ្ចេញសារធាតុពុល៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ