អាមេរិក-អាហ្វហ្កានីស្តង់ -

អត្ថបទចុះផ្សាយនៅថ្ងៃ សៅរ៍ 03 កក្កដា 2010 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 03 កក្កដា 2010

មេបញ្ជាការថ្មីនៃកងទ័ពអាមេរិកមកដល់អាហ្វហ្កានីស្តង់

ឧត្តមសេនីយ៍ David Petraeus (ស្តាំ) ពេលមកដល់ទីក្រុងកាប៊ុល កាលពីថ្ងៃសុក្រ ទី២ កក្កដា ២០១០

©Reuters

ដោយ សេង ឌីណា

ឧត្តមសេនីយ៍ ដេវីដ ភីត្រេអឺស (David Petraeus) មេបញ្ជាការ ថ្មី នៃកងទ័ពអាមេរិកប្រចាំអាហ្វហ្កានីស្តង់ បានធ្វើដំណើរមកដល់អាហ្វហ្កានីស្តង់ហើយ កាលពីថ្ងៃសុក្រ ម្សិលមិញ ដើម្បីចូលកាន់តំណែងជំនួសឧត្តមសេនីយ៍ម៉ាក់គ្រីស្តាល់ (McChrystal) ដែលត្រូវលោកអូបាម៉ាដកតំណែង។ ការផ្លាស់ប្តូរមេបញ្ជាការនៅពេលនេះ បានបណ្តាលឲ្យមានការចោទជាសំណួរអំពីការផ្លាស់ប្តូរយុទ្ធសាស្រ្តរបស់ អាមេរិក នៅអាហ្វហ្កានីស្តង់។ ក៏ប៉ុន្តែ លោកអូបាម៉ាបានធានាថា យុទ្ធសាស្រ្តនៅអាហ្វហ្កានីស្តង់មិនមានអ្វីប្រែប្រួលនោះទេ។

បទវិភាគរបស់ សេង ឌីណា

03/07/2010

ស្តាប់ (03:11)

ឧត្តមសេនីយ៍ម៉ាក់គ្រីស្តាល់ ត្រូវបានលោកអូបាម៉ាដកតំណែង ក្រោយពីលោកបានផ្តល់បទសម្ភាសន៍ដល់សារព័ត៌មានមួយ ដោយក្នុងបទសម្ភាសន៍នោះ លោកបានរិះគន់ធ្ងន់ៗដល់រដ្ឋមន្រ្តីក្រសួងការពារជាតិ ដល់អនុប្រធានាធិបតី បូករួមទាំងលោកអូបាម៉ា ដែលជាប្រធានាធិបតី និងជាអគ្គបញ្ជាការកងទ័ពអាមេរិកផង។ ដូច្នេះ ការដកតំណែងនេះ គឺជាការដាក់ទោសដល់មន្រ្តីទ័ព ដែលធ្វើខុសនឹងវិន័យទ័ព មិនមែនដោយមកពីមានការផ្លាស់ប្តូរយុទ្ធសាស្រ្តនៅអាហ្វហ្កានីស្តង់ នោះទេ។

លោកអូបាម៉ាបានអះអាងថា ការដកតំណែងឧត្តមសេនីយ៍ម៉ាក់គ្រីស្តាល់ នឹងមិនធ្វើឲ្យមានការផ្លាស់ប្តូរយុទ្ធសាស្រ្តអាមេរិក នៅអាហ្វហ្កានីស្តង់នោះទេ។ ដើម្បីធានាដល់ការអនុវត្តយុទ្ធសាស្រ្តនេះ លោកអូបាម៉ា ក៏បានសម្រេចតែងតាងឧត្តមសេនីយ៍ ភីត្រេអឺស ឲ្យមកកាន់តំណែងជំនួសលោកម៉ាក់គ្រីស្តាល់។

ឧត្តមសេនីយ៍ភីត្រេអឺស បច្ចុប្បន្ន គឺជាអគ្គបញ្ជាការកងទ័ពអាមេរិកប្រចាំតំបន់ដើមបូព៌ា (US Central Command) ដែលជាអ្នកត្រួតមើលទាំងសង្រ្គាមនៅអៀរ៉ាក់ និងសង្រ្គាមនៅអាហ្វហ្កានីស្តង់។ លោកធ្លាប់ធ្វើជាមេបញ្ជាការកងទ័ពអាមេរិក នៅអៀរ៉ាក់ ដែល នៅពេលនោះ លោកបានដាក់ចេញនូវយុទ្ធសាស្រ្តប្រឆាំងតាក់ទិកទ័ពព្រៃ នៅអៀរ៉ាក់ ប្រកបដោយប្រសិទ្ធិភាព។ យុទ្ធសាស្រ្តប្រឆាំងទ័ពព្រៃនេះ ក៏ត្រូវបានឧត្តមសេនីយ៍ម៉ាក់គ្រីស្តាល់ចម្លងយកមកប្រើ នៅអាហ្វហ្កានីស្តង់ដែរ។

នៅថ្ងៃសៅរ៍នេះ ឧត្តមសេនីយ៍ភីត្រេអឺស បានប្រកាសជាសាធារណៈអំពាវនាវឲ្យមានការរួបរួមគ្នារវាងអាជ្ញាធរស៊ីវិល និងកងទ័ព រវាងកងកម្លាំងអាហ្វហ្កានីស្តង់ និងកងកម្លាំងបរទេស ក្នុងការប្រយុទ្ធប្រឆាំងនឹងពួកឧទ្ទាមតាលីបង់ និងក្រុមអ៊ីស្លាមជ្រុលនិយម នៅអាហ្វហ្កានីស្តង់។ លោកក៏បានសន្យាផងដែរថា នឹងយកយុទ្ធសាស្រ្ត ដែលលោកធ្លាប់ប្រើ នៅអៀរ៉ាក់ មកអនុវត្តនៅអាហ្វហ្កានីស្តង់ ដើម្បីប្រយុទ្ធប្រឆាំងនឹងយុទ្ធសាស្រ្តទ័ពព្រៃរបស់ពួកតាលីបង់។

ឧត្តមសេនីយ៍ភីត្រេអឺស នឹងចូលកាន់តំណែងជាផ្លូវការ ក្នុងពិធីផ្លាស់ប្តូរតំណែង នៅថ្ងៃអាទិត្យស្អែក។ បន្ទាប់មក លោកនឹងត្រូវចូលជួបលោកប្រធានាធិបតីអាហ្វហ្កានីស្តង់ ហាមីដ កាហ្សៃ (Hamid Karzai)។

គួររំឭកឡើងវិញថា នៅក្នុងយុទ្ធសាស្រ្តដាក់ចេញដោយរដ្ឋាភិបាលលោកអូបាម៉ា ជំហានដំបូង កងទ័ពអាមេរិកនឹងត្រូវបញ្ជូនបន្ថែមទៅអាហ្វហ្កានីស្តង់ ដើម្បីបង្រ្កាបពួកតាលីបង់ផង និងដើម្បីជួយហ្វឹកហ្វឺនកងកម្លាំងអាហ្វហ្កានីស្តង់ផង។ ជំហានបន្ទាប់មកទៀត គឺនៅខែមិថុនា ឆ្នាំ២០១១ អាមេរិកនឹងចាប់ផ្តើមដកកងទ័ពចេញពីអាហ្វហ្កានីស្តង់។ លោកអូបាម៉ាធ្លាប់បានបញ្ជាក់ជាច្រើនលើកមកហើយថា ការដកកងទ័ពនឹងត្រូវធ្វើឡើងជាជំហានៗ ហើយនៅខែមិថុនា ឆ្នាំ២០១១នេះ គ្រាន់តែជាការដកជំហានទី១ប៉ុណ្ណោះ។

ទោះជាយ៉ាងណា អ្នកជំនាញខាងយុទ្ធសាស្រ្តទ័ពជាច្រើនយល់ថា បើមើលទៅលើស្ថានភាពបច្ចុប្បន្ន នៅអាហ្វហ្កានីស្តង់ ការចាប់ផ្តើមដកកងទ័ព នៅខែមិថុនា ឆ្នាំ២០១១នេះ ទំនងជាមិនអាចធ្វើទៅរួចនោះទេ៕