កម្ពុជា -

អត្ថបទចុះផ្សាយនៅថ្ងៃ ព្រហស្បតិ៍ 23 សីហា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 23 សីហា 2012

គណបក្សប្រឆាំងបដិសេធការចូលរួមសង្កេតការណ៍ចុះឈ្នោះបោះឆ្នោត

ដោយ លាង ដឺលុច

គណបក្សប្រឆាំងទាំងពីរគឺ គណបក្សសម រង្ស៊ី និងសិទ្ធិមនុស្សបានចេញសេចក្តីថ្លែងការណ៍រួមគ្នាមួយនៅថ្ងៃពុធទី២២ សីហាប្រកាសធ្វើពហិកាមិនបញ្ជូនអ្នកសង្កេតការណ៍របស់ខ្លួនទៅចូលរួមសង្កេតការណ៍ដំណើរការពិនិត្យឈ្មោះ និងចុះឈ្មោះបោះឆ្នោតនោះទេ។ គណបក្សទាំងពីរថ្លែងថា វត្តមានរបស់គណបក្សទាំងពីរនៅក្នុងតំណើរការចុះឈ្មោះបោះឆ្នោតនឹងមិនធ្វើអោយមានការផ្លាស់ប្តូរឡើយ ហើយគណបក្សទាំងពីរទាមទារអោយមានការផ្លាស់ប្តូរសមាសភាពគណៈកម្មាធិការជាតិរៀបចំការបោះឆ្នោត។

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (01:55)

23/08/2012 by លាង ដឺលុច

សម្រាប់គណបក្សទាំងពីរនីតិវិធីនៃការចុះឈ្មោះ និងការលុបឈ្មោះអ្នកបោះឆ្នោតនៅតែស្មុគស្មាញ។រីឯមន្ត្រីដែលធ្វើការផ្នែកនេះ ភាគច្រើនលើសលប់ជាសកម្មជនគណបក្សកាន់អំណាច។ ទាំងនេះជាបញ្ហាដែលគណបក្សសម រង្ស៊ី និងគណបក្សសិទ្ធិមនុស្សបានលើកឡើងនៅក្នុងសេចក្តីថ្លែងការណ៍រួមនៅថ្ងៃព្រហស្បតិ៍នេះ។ អះអាងថាមានបញ្ហាទាំងនោះមែន ប៉ុន្តែគណបក្សប្រឆាំងទាំងពីរដែលកំពុងចាប់ដៃគ្នាបង្កើតគណបក្សថ្មីនោះ បែរជាមិនចូលរួមសង្កេតការណ៍ទៅវិញ។

លោកអ៊ូ ច័ន្ទឬទ្ធិ អគ្គលេខាធិការស្តីទីនៃគណបក្សសិទ្ធិមនុស្សបានពន្យល់ប្រាប់វិទ្យុបារាំងអន្តរជាតិថា វត្តមានអ្នកសង្កេតការណ៍របស់គណបក្សប្រឆាំងទាំងពីរនៅក្នុងការដំណើរការចុះឈ្មោះបោះឆ្នោតនឹងមិនធ្វើអោយមានការផ្លាស់ប្តូរ និងរឹតតែមិនអាចជួយឲ្យការបោះឆ្នោតឆ្នាំ ២០១៣ ខាងមុខប្រព្រឹត្តិទៅដោយត្រឹមត្រូវ សេរី និងយុត្តិធម៌ឡើយ។ លោកបន្តថា គណបក្សប្រឆាំងទាំងពីរបានទាមទារអោយមានការផ្លាស់ប្តូរសមាសភាពគណៈកម្មាធិការជាតិរៀបចំការបោះឆ្នោត ផ្លាស់ប្តូរនីតិវិធី ប្តូរពេលវេលាចុះឈ្មោះ និងទុកពេលឲ្យប្រជាពលរដ្ឋចុះឈ្មោះឲ្យបានគ្រប់គ្រាន់វិញ។

មិនអាចទាក់ទងមន្ត្រីគណៈកម្មាធិការជាតិរៀបចំការបោះឆ្នោតដើម្បីប្រតិកម្មទៅនឹងការរិះគន់របស់គណបក្សទាំងពីរឡើយ។ សមាសភាពនៃគណៈកម្មាធិការជាតិរៀបចំការបោះឆ្នោតបានក្លាយជាប្រធានបទនៃការរិះគន់របស់គណបក្សប្រឆាំងជាច្រើនឆ្នាំមកហើយ។ អ្នករាយការណ៍ពិសេសរបស់អគ្គលេខាធិការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស៊ូរិយ៉ា ស៊ូបេឌីធ្លាប់បានធ្វើបេសកម្មស្តីពីការបោះឆ្នោតនៅកម្ពុជា។ នៅក្នុងដំណើរបេសកកម្មពេលនោះ អ្នករាយការណ៍ពិសេសបានអត្ថាធិប្បាយថា លោកមិនផ្តល់សារៈសំខាន់ទៅលើបុគ្គលនៅក្នុងគណៈកម្មាធិការរៀបចំការបោះឆ្នោតនោះឡើយ។ តែលោកផ្តោតទៅលើប្រព័ន្ធ ច្បាប់ និងនីតិវិធីនៃតំណើរការបោះឆ្នោតទៅវិញ។

សូមបញ្ជាក់ថា ការពិនិត្យឈ្មោះ ការចុះឈ្មោះបោះឆ្នោតនេះ នឹងប្រព្រឹត្តិទៅពីថ្ងៃទី១កញ្ញារហូតដល់ថ្ងៃទី១២ខែតុលា។ អង្គការសង្កេតការណ៍បោះឆ្នោត ខុមហ្វ្រែលមានគម្រោងពង្រាយអ្នកសង្កេតការណ៍របស់ខ្លួន ចំនួន២៥០នាក់នៅក្នុងពេលនោះ៕