សភាអាហ្វហ្កានីស្ថានបានអនុម័តលើកិច្ចព្រមព្រៀងសន្តិសុខជាមួយអាមេរិក និងអង្គការអូតង់
នៅថ្ងៃអាទិត្យ ទី២៣ វិច្ឆិកា សភានៃប្រទេសអាហ្វហ្កានីស្ថានបានអនុម័តជាផ្លូវការលើកិច្ចព្រមព្រៀងសន្តិសុខជាមួយសហរដ្ឋអាមេរិក និងអង្គការអូតង់។ យោងតាមកិច្ចព្រមព្រៀង អាមេរិក និងអង្គការអូតង់នឹងបន្តរក្សាទុកកម្លំាងទ័ពមួយភាគរបស់ខ្លួនដើម្បីជួយបង្ហាត់ហ្វឹកហ្វឺនកម្លំាងទ័ពអាហ្វហ្កានីស្ថាន នៅក្រោយឆ្នំា ២០១៤ ពោលបន្ទាប់ពីអាមេរិក និងអូតង់ដកកម្លំាងទ័ពប្រយុទ្ធចេញពីអាហ្វហ្កានីស្ថាននៅក្នុងខែធ្នូខាងមុខ។
ចុះផ្សាយនៅថ្ងៃ៖
ស្តាប់ - ០១:៥៦
គឺនៅថ្ងៃទី៣០ កញ្ញាកន្លងទៅដែលរដ្ឋាភិបាលអាហ្វហ្កានីស្ថាន អាមេរិក និងអង្គការអូតង់បានចុះហត្ថលេខារួមគ្នាលើកិច្ចព្រមព្រៀងសន្តិសុខស្តីពីការបន្តរក្សាទុកកម្លំាងទ័ពបរទេសនៅក្នុងប្រទេសអាហ្វហ្កានីស្ថាននៅក្រោយឆ្នំា ២០១៤។ គឺជាកិច្ចព្រមព្រៀងមួយដែលបានអនុញ្ញាតឲ្យកម្លំាងទ័ពបរទេសចំនួន ១២ ៥០០នាក់អាចបន្តបេសកកម្មរបស់ខ្លួននៅក្នុងប្រទេសអាហ្វហ្កានីស្ថានសម្រាប់ឆ្នំា ២០១៥។ តែជាបេសកកម្មមួយនៅក្នុងក្របខ័ណ្ឌនៃការជួយគំាទ្រ និងបង្ហាត់បង្រៀនកម្លំាងទ័ពអាហ្វហ្កានីស្ថាន ពោលមិនមែនជាបេសកកម្មចេញប្រយុទ្ធទល់នឹងពួកឧទ្ទាមតាលីបង់ដោយផ្ទាល់ដូចពេលកន្លងមកទេ។ អ្វីជាការកត់សម្គាល់ កិច្ចព្រមព្រៀងដែលសភាអាហ្វហ្កានីស្ថានទើបបានអនុម័តទទួលយកដោយសម្លេងភាគច្រើនពេលនេះបានចុះហត្ថលេខានៅក្រោយការស្បថចូលកាន់តំណែងប្រធានាធិបតីរបស់លោក Ashraf Ghani បានមួយថ្ងៃ។ សូមជម្រាបជូនថា លោកអតីតប្រធានាធិបតីអាហ្វហ្កានីស្ថាន Hamid Karza¨r បានបដិសេធមិនព្រមចុះហត្ថលេខាលើកិច្ចព្រមព្រៀងនោះទេ ព្រោះអ្វីដែលលោក Karzaï ចង់បាន គឺការដកទ័ពបរទេសទំាងអស់ចេញពីទឹកដីអាហ្វហ្កានីស្ថាន។
អ៊ីចឹងហើយបានជានៅក្នុងសេចក្តីជូនដំណឹងមួយចេញផ្សាយក្នុងថ្ងៃអាទិត្យ ទី២៣ វិច្ឆិកាដដែល លោក Ghani បានសាទរចំពោះការដែលសភាបានអនុម័តទទួលយកកិច្ចព្រមព្រៀងសន្តិសុខនោះជាផ្លូវការ។ ទន្ទឹមគ្នានេះ លោក Ghani ក៏បានអំពាវនាវព្រឹទ្ធសភាឲ្យធ្វើការអនុម័តទទួលយកដូចករណីសភាដែរ។ លោកប្រមុខរដ្ឋថ្មីអាហ្វហ្កានីស្ថានបានចាត់ទុកការអនុម័តលើកិច្ចព្រមព្រៀងសន្តិសុខជាមួយអាមេរិក និងអូតង់ពេលនេះថា ជាការបោះមួយជំហានប្រកបដោយវិជ្ជមានឆ្ពោះទៅរកការពង្រឹងអធិបតេយ្យជាតិរបស់ប្រទេសអាហ្វហ្កានីស្ថាន។
គួរជម្រាបជូនថា ១៣ឆ្នំាក្រោយការដួលរលំរបបតាលីបង់ក្នុងឆ្នំា ២០០១ កម្លំាងទ័ពបរទេសបញ្ចប់បេសកកម្ម និងចាកចេញពីប្រទេសអាហ្វហ្កានីស្ថាន ដើម្បីទុកឲ្យកម្លំាងទ័ព និងកម្លំាងប៉ូលីសអាហ្វហ្កានីស្ថានធានារ៉ាប់រងសន្តិសុខ និងសុវត្ថិភាពដោយខ្លួនឯងម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ