កម្ពុជា -

អត្ថបទចុះផ្សាយនៅថ្ងៃ ចន្ទ 30 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 30 កក្កដា 2012

បក្សប្រឆាំងពូនកម្លាំងរកអន្តរាគមន៍អោយជួយលោកសម រង្ស៊ី

លោកកឹម សុខា និងលោកគង់ គាំ រួមជាមួយលោកសម រង្ស៊ី (តាមវីដេអូខុនហ្វេរិន) ក្នុងពេលប្រជុំព្រឹកថ្ងៃ៣០កក្កដា

RFI/Channa Siv

ដោយ លាង ដឺលុច

គណបក្សសិទ្ធិមនុស្ស និងគណបក្សសម រង្ស៊ី បានរៀបចំកិច្ចប្រជុំរួមគ្នាតាមការគ្រោងទុក នៅព្រឹកថ្ងៃ៣០កក្កដានេះ ជាមួយសកម្មជនថ្នាក់ខេត្ត ស្រុក និងឃុំសង្កាត់។ កិច្ចប្រជុំនេះត្រូវបានរៀបចំធ្វើនៅទីស្នាក់ការគណបក្សសិទ្ធិមនុស្សក្នុងខណ្ឌទួលគោក រាជធានីភ្នំពេញ ប៉ុន្តែក៏មានដែរ វត្តមានរបស់លោក សម រង្ស៊ី តាមរយៈវីដេអូខុនហ្វេរិន និងវត្តមានរបស់សមាជិកជាន់ខ្ពស់របស់គណបក្សសម រង្ស៊ី។ មេដឹកនាំគណបក្សទាំងពីរប្រកាសស្វែងរកអន្តរាគមន៍ពីអាមេរិក និងសហភាពអឺរ៉ុប ដើម្បីជួយអោយលោកសម រង្ស៊ីអាចចូលប្រទេសកម្ពុជាវិញ។

សេចក្តីរាយការណ៍របស់លាង ដឺលុច ពីភ្នំពេញ

ស្តាប់ (02:05)

30/07/2012

មិនខ្វល់ថា គណៈកម្មាធិការជាតិរៀបចំការបោះឆ្នោត និងមន្ត្រីគណបក្សប្រជាជនកម្ពុជាអះអាងថា លោកសម រង្ស៊ីអស់សិទ្ធិចូលរួមបោះឆ្នោត ពិសេស គឺការឈឈ្មោះបោះឆ្នោតនោះឡើយ ប៉ុន្តែសម្រាប់ប្រធានគណបក្សប្រឆាំងធំជាងគេនៅកម្ពុជារូបនេះ កន្លែងនៅតែមានសម្រាប់លោក។ នៅព្រឹកថ្ងៃចន្ទនេះ នៅក្នុងពិធីជួបជុំមួយនៅទីស្នាក់ការគណបក្សសិទ្ធិមនុស្សដែលបានក្លាយជាសម្ព័ន្ធមិត្តរបស់គណបក្សលោកហើយនោះ លោក សម រង្ស៊ីហ៊ានដល់ប្រកាសថា លោកគឺនៅតែជាបេក្ខភាពនាយករដ្ឋមន្ត្រីនៅក្នុងការបោះឆ្នោតអាណត្តិក្រោយនេះដដែល។

ទោះយ៉ាណាក៏ដោយ ការអះអាងបែបនេះ ក៏ត្រូវបានសម រង្ស៊ីធ្វើឡើងដោយឈរលើមូលដ្ឋាន និងលក្ខខណ្ឌដែលលោកអាចរួចផុតពីសំណាញ់ច្បាប់ ដែលតុលាការកម្ពុជាបានរុំលោកនោះដែរ។ បើតាមការពន្យល់របស់លោកសម រង្ស៊ី លោក រួមជាមួយលោកកឹម សុខា និងលោកស្រី មូរ សុខហួរ នឹងព្យាយាមបញ្ចុះបញ្ចូលសហគមន៍អន្តរជាតិ ដូចជាសហរដ្ឋអាមេរិក សហភាពអឺរ៉ុប កាណាដា និងអូស្ត្រាលី អោយមិត្តភ័ក្តិរបស់កម្ពុជាមួយនេះ ធ្វើអន្តរាគមន៍ក្នុងសំណុំរឿងរបស់លោក។ ហើយថា ក្នុងចំណោមដៃគូអភិវឌ្ឍន៍ទាំងនេះលោកសម រង្ស៊ីបានបង្ហាញក្តីសង្ឃឹមខ្លាំងទៅលើសហរដ្ឋអាមេរិក ដែល បើតាមលោក សម រង្ស៊ីដដែល អាមេរិកកំពុងតែមានឥទ្ធិពលនៅក្នុងតំបន់ផង។

សមាជិកជាន់ខ្ពស់របស់គណបក្សសម រង្ស៊ី ដែលមានវត្តមាននៅក្នុងកិច្ចប្រជុំនៅទីស្នាក់ការគណបក្សសិទ្ធមនុស្សនោះ រួមមាន លោក គង់ គាំ ប្រធានស្តីទីគណបក្ស, លោកស្រី មូរ សុខហួរ អ្នកតំណាងរាស្ត្រកំពត, លោកស្រី កែ សុវណ្ណរ័ត្ន អគ្គលេខាធិការគណបក្ស។

គួរបញ្ជាក់អោយដឹងផងដែរថា ក្រៅពីអាមេរិក គណបក្សប្រឆាំងទាំងពីរក៏បានធ្វើលិខិតស្វែងរកអន្តរាគមន៍ពីសហភាពអឺរ៉ុបដែរ។ សំណើទៅសហភាពអឺរ៉ុប គឺមិនត្រឹមតែសុំអន្តរាគមន៍ ដើម្បីអោយលោកសម រង្ស៊ីអាចត្រឡប់កម្ពុជាបានវិញទេ ប៉ុន្តែ ក៏មានដែរអន្តរាគមន៍ដើម្បីអោយសហភាពអឺរ៉ុបពិនិត្យអំពីកំណែទម្រង់គណៈកម្មាធិការជាតិរៀបចំការបោះឆ្នោត។

លោក ខៀវ កាញារីទ្ធ អ្នកនាំពាក្យរដ្ឋាភិបាលធ្លាប់បានឆ្លើយតបរួចហើយថា អាមេរិក ចិន ឬបរទេសណាមួយផ្សេងទៀតក៏ដោយ ពួកគេមិនមែនជាអ្នកសម្រេចអំពីការវិលត្រឡប់របស់លោកសម រង្ស៊ីនោះឡើយ៕