អ៊ុងសាន ស៊ូជី ទាមទារអោយសហគមន៍អន្តរជាតិគាំទ្រកំណែទម្រង់នយោបាយអន្តរកាលភូមា
នៅថ្ងៃអង្គារនេះ ក្នុងដំណើរទស្សនកិច្ចនៅប្រទេសបារាំង ប្រធានបក្សប្រឆាំងភូមា គឺលោកស្រី អ៊ុងសាន ស៊ូជី បានឆ្លៀតឱកាសទាមទារអោយសហគមន៍អន្តរជាតិជួយគាំទ្រកំណែទម្រង់នយោបាយភូមា ឆ្ពោះទៅកាន់លទ្ធិប្រជាធិបតេយ្យ។ ប្រធានាធិបតីបារាំង ហ្វ្រង់ស៊័រ ហូឡង់ បានទទាក់ទទួលលោកស្រីស៊ូជី នៅក្រុងប៉ារីស និងបានអះអាងចំពោះលោកស្រីថា បារាំងស្ថិតនៅក្បែរប្រជាជនភូមា ដើម្បីអោយកំណែទម្រង់នានា ដែលធ្លាប់បានសន្យានោះ បានលេចរូបរាងឡើង ក្នុងរយៈពេលសមស្របឆាប់ៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
នៅថ្ងៃអង្គារនេះ ប្រធានបក្សប្រឆាំងភូមាដ៏ល្បីល្បាញ អ៊ុងសាន ស៊ូជី បានបំពេញទស្សនកិច្ចនៅបារាំង ជួបលោកហ្វ្រង់ស៊័រ ហូឡង់ នៅក្រុងប៉ារីស។ លោកស្រីអ៊ុងសាន ស៊ូជី បានលើកឡើងថា ដំណើរការកំណែទម្រង់ក្នុងនយោបាយអន្តរកាលភូមានៅពេលនេះ កំពុងស្ថិតក្នុងភាពទ័លច្រកពិបាកដោះស្រាយ។ លោកស្រីបានសុំអោយមានការគាំទ្រពីសហគមន៍អន្តរជាតិ។ លោកស្រីស៊ូជីក៏បានបង្ហាញពីទំនុកចិត្តរបស់លោកស្រី ចំពោះបណ្តាប្រទេសជាមិត្តភូមានានា បែបយ៉ាងប្រទេសបារាំង ដើម្បីសុំអោយពួកគេជួយជំរុញកំណែទម្រង់នយោបាយភូមា អោយសម្រេចដល់គោលដៅ។
មុនពេលភូមារៀបចំការបោះឆ្នោតនៅខែវិច្ឆិកា ឆ្នាំ២០១៥ខាងមុខ ភូមានៅជួបឧបសគ្គនៅលើផ្លូវឆ្ពោះទៅកាន់លទ្ធិប្រជាធិបតេយ្យនៅឡើយ។ លោកស្រី អ៊ុងសាន ស៊ូជី បានគូសបញ្ជាក់ពីបញ្ហាបែបយ៉ាង វិសោធនកម្មរដ្ឋធម្មនុញ្ញ ភាពតានតឹងរវាងសហគមន៍ភាគតិច និងតួនាទីកងទ័ពក្នុងឆាកនយោបាយ។ តាំងពីឆ្នាំ២០១២មក ភាគនិរតីភូមា បានរងអំពើហិង្សាបង្ហូរឈាមរវាងអ្នកកាន់ពុទ្ធសាសនា និងអ្នកកាន់សាសនាអ៊ីស្លាម ធ្វើអោយមនុស្ស២៥០នាក់បាត់បង់ជីវិត និងធ្វើអោយមនុស្សប្រមាណ១សែន៤ម៉ឺននាក់ទៀតភៀសខ្លួន។
ប្រធានាធិបតីបារាំង ហ្វ្រង់ស៊័រ ហូឡង់ បានធានាអះអាងចំពោះលោកស្រីអ៊ុងសាន ស៊ូជី ពីការគាំទ្ររបស់ប្រទេសបារាំង។ បារាំងចង់អោយភូមាសម្រេចទិសដៅនៃដំណើរឆ្ពោះទៅកាន់លទ្ធិប្រជាធិបតេយ្យ បែបយ៉ាងការបោះឆ្នោតឆ្នាំ២០១៥ ការធ្វើវិសោធនកម្មរដ្ឋធម្មនុញ្ញ អនុញ្ញាតអោយប្រជាជនភូមាអាចបង្ហាញពីជម្រើសរបស់ខ្លួន។
លោកស្រីស៊ូជី ជាម្ចាស់ពានរង្វាន់សន្តិភាពពិភពលោក ធ្លាប់ជាប់ឃុំក្នុងគេហដ្ឋាន ក្រោមការត្រួតពិនិត្យរបស់អាជ្ញាធរក្នុងរបបសឹកចាស់អស់២ទសវត្ស។ របបសឹកចាស់ភូមាបានដោះលែងលោកស្រី ក្នុងឆ្នាំ២០១០។ លោកហ្វ្រង់ស៊័រ ហូឡង់ ធ្លាប់បានជួបលោកស្រីម្តងរួចហើយ កាលពីឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ