សំណុំរឿងសពស្ត្រីទេសចរបារាំងនៅកំពត៖ ក្រុមគ្រួសារទម្លាយព័ត៌មានចុងក្រោយ
ជិតពីរឆ្នាំកន្លងទៅ ឃាតករដែលសម្លាប់ស្ត្រីទេសចរជនជាតិបារាំងម្នាក់ កាលពីខែកុម្ភៈ ឆ្នាំ២០១៣ នៅក្រុងកំពត មិនទាន់ត្រូវបានវែកមុខនៅឡើយ។ នៅថ្ងៃអាទិត្យ ទី១០នោះ អូហ្វេលី បេកនី (Ophélie Begnis) អាយុ២៥ឆ្នាំ ដែលជាភ្ញៀវនៃផ្ទះសំណាក់ ឡេ ម៉ង់ឃ្យេ (Les Manguiers) ត្រូវបានគេប្រទះឃើញអណ្តែតលើទឹកព្រែក ក្នុងក្រុងកំពត ដោយគ្មានសម្លៀកបំពាក់ ហើយក្បាល និងមុខរបួសខ្ទេចខ្ទី។ ទិដ្ឋភាពដ៏«ព្រៃផ្សៃ»នេះហាក់នៅថ្មីៗ នៅព្រឹកថ្ងៃសៅរ៍នេះ ខណៈដែលក្រុមគ្រួសាររបស់សព អន់ចិត្តនឹងភាពយឺតយ៉ាវនៃការស៊ើបអង្កេត ក្នុងរយៈពេល១៨ខែនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
«យើងចង់ស្តាប់ឃាតករថា ហេតុអ្វីបានជាគេសម្លាប់អូហ្វេលី ដែលស្រឡាញ់ប្រជាជនអាស៊ី ចង់ស្គាល់វប្បធម៌អាស៊ី និងមានចរិតស្លូតបូតពីធម្មជាតិ»។ នេះជាអ្វីដែលបងស្រីរបស់ អូហ្វេលី បេកនី (Ophélie Begnis) ឈ្មោះវៀស្ស៊ីនីញ៉ា (Virginia) បានថ្លែង នៅក្នុងសន្និសីទសារព័ត៌មានមួយ នៅទីក្រុងភ្នំពេញ កាលពីព្រឹកថ្ងៃសៅរ៍ ទី១៥ ខែវិច្ឆិកា ឆ្នាំ២០១។ វៀស្ស៊ីនីញ៉ា បន្ថែមថា៖ «ខ្ញុំភ័យខ្លាចណាស់។ នៅទីនេះ អ្នកដែលសើចដាក់យើងថ្ងៃនេះ អាចជាឃាតករនៅពេលក្រោយ»។
ចំណែកបងប្រុសរបស់ អូហ្វេលី វិញ «ការភ័យខ្លាច»បានចូលមកជំនួស«រូបភាពល្អរបស់កម្ពុជា» ដែលគាត់បានដឹងពីមិត្តភក្តិជនជាតិខ្មែរមួយចំនួននៅទីក្រុងលីយ៉ុងនៃប្រទេសបារាំង។ ចូណាតង់ (Jonathan) ពោលថា៖ «ខ្ញុំទោះបីជាខ្ញុំជាប្រុសដែលធម្មតាមិនចេះខ្លាច ក៏ខ្ញុំមានអារម្មណ៍ខ្លាចដែរ បន្ទាប់ពីបានមកស្នាក់នៅប្រទេសកម្ពុជាមួយសប្តាហ៍កន្លងទៅ»។ ក្រុមគ្រួសាររបស់កញ្ញា អូហ្វេលី បេកនី នឹងចាកចេញពីកម្ពុជានៅយប់នេះ បន្ទាប់ពីបានមកដល់កម្ពុជា កាលពីថ្ងៃអាទិត្យមុន និងបានជួបមន្ត្រីសំខាន់ៗទាក់ទងនឹងសំណុំរឿងនៅភ្នំពេញ និងនៅខេត្តកំពត។
ដោយរួមដំណើរជាមួយលោក គ្រីស្យង់ បេកនី (Christian Begnis) ដែលជាឪពុក ក្រុមគ្រួសាររបស់អូហ្វេលីបានជួបពិភាក្សាជាថ្មី ជាមួយឧត្តមសេនីយ៍ ម៉ក់ ជីតូ ប្រធាននាយកដ្ឋានកណ្តាល នគរបាលយុត្តិធម៌ និងលោក វុត្ថា វឌ្ឍនា ចៅក្រមស៊ើបសួរ។ មន្ត្រីទាំងពីររូបសុទ្ធតែបានធានាថា អាជ្ញាធរកម្ពុជានៅតែបន្តការស៊ើបអង្កេតនៅឡើយ។ នេះបើយោងតាមក្រុមគ្រួសារជនរងគ្រោះ ដែលបរិហារថា៖ «អាជ្ញាធរបារាំងយឺតយ៉ាវក្នុងការផ្តល់ជំនួយបច្ចេកទេស និងអ្វីៗ ដែលចាំបាច់សម្រាប់ការស៊ើបអង្កេត មកឱ្យអាជ្ញាធរកម្ពុជាតាមការសើ្នសុំ»។
លោក គ្រីស្យង់ បានឱ្យដឹងថា គាត់បានសន្ទនាតាមទូរស័ព្ទជាមួយកូនស្រីរបស់គាត់ជាចុងក្រោយនៅថ្ងៃសៅរ៍ ទី០៩ ខែកុម្ភៈ ឆ្នាំ២០១៣ មុនពេលដែល អូហ្វេលី ត្រូវបានសម្លាប់។ ពេលនោះ អូហ្វេលីប្រាប់គាត់ថា «នៅកម្ពុជាក្តៅណាស់» ខណៈដែល«នៅស្រុកបារាំងកំពុងរងារ»។ ក្រុមគ្រួសារនេះអះអាងថា៖ «យើងមិនដឹងថានាងត្រូវបានគេសម្លាប់នៅពេលណា នៅម៉ោងប៉ុន្មាន នៅកន្លែងណា ឱ្យប្រាកដទេ»។ ដោយប្រាប់ថា ចៅក្រមស៊ើបសួរបារាំងនឹងមកកម្ពុជានៅដើមឆ្នាំក្រោយ គ្រួសារបេកនីស្នើសុំឱ្យពង្រីកការស៊ើបអង្កេតនៅផ្ទះសំណាក់ ឡេ ម៉ង់ឃ្យេ (Les Manquiers) និងនៅម្តុំភូមិដែលគេឃើញសពរបស់នាង។
ជនសង្ស័យជនជាតិប៊ែលហ្ស៊ិកម្នាក់ត្រូវបានដោះលែង កាលពី៥ខែមុន បន្ទាប់ពីអាជ្ញាធរមានសមត្ថកិច្ចរកឃើញថា គាត់មិនជាប់ពាក់ព័ន្ធនឹងសំណុំរឿងឧក្រិដ្ឋកម្មខាងលើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ