អង្គការសុខភាពពិភពលោក៖ការប្រែប្រួលអាកាសធាតុ ជាការប្រឈមសម្រាប់សុខភាព
ថ្ងៃពុធនេះ ក្នុងសន្និសីទនៅក្រុងហ្សឺណែវ អង្គការសុខភាពពិភពលោកចង់អោយគ្រប់គ្នា ជ្រាបច្បាស់ពីជំងឺផ្សេងៗដែលកកើតឡើង ដោយសារការប្រែប្រួលអាកាសធាតុ ដើម្បីចូលរួមស្រោចស្រង់អាយុជីវិតមនុស្សរាប់លាននាក់ ក្នុងមួយឆ្នាំៗ។ យោងតាមអង្គការសុខភាពពិភពលោក ការប្រែប្រួលអាកាសធាតុ អាចបង្កអោយមានមនុស្សស្លាប់ ក្នុងពិភពលោក ប្រមាណ២សែន៥ម៉ឺននាក់ បន្ថែមទៀត ក្នុងមួយឆ្នាំៗ។
ចុះផ្សាយនៅថ្ងៃ៖
ក្នុងសន្និសីទរយៈពេល៣ថ្ងៃ នៅក្រុងហ្សឺណែវ ប្រធានអង្គការសុខភាពពិភពលោក លោកស្រីម៉ាហ្ការ៉េត ចាន់ បានគូសបញ្ជាក់ពីការប្រែប្រួលអាកាសធាតុ ដែលគំរាមសុខភាពមនុស្សលោកយើង។ គេរំពឹងថា ពីពេលនេះ រហូតដល់ឆ្នាំ២០៣០ ការដោះស្រាយបញ្ហាសុខភាពដែលបង្កឡើងដោយការប្រែប្រួលអាកាសធាតុ អាចត្រូវការប្រាក់ពី២ពាន់លានដុល្លារ ទៅ៤ពាន់លានដុល្លារ។
យោងតាមលោក អាលីស្ទែរ វូតវ៉ាត ជាអ្នកបំរើការអោយក្រុមអន្តររដ្ឋាភិបាលទទួលបន្ទុកផ្នែកអាកាសធាតុ សីតុណ្ហភាពក្នុងផែនដី អាចនឹងកើនឡើង៤អង្សារបន្ថែម នៅចុងសតវត្សទី២១ ពោលគឺខុសពីការគិតទុកកន្លងមក ដែលថា សីតុណ្ហភាពអាចកើនត្រឹមតែ២អង្សារនោះ។ ដោយសារការកើនឡើងកំដៅផែនដី ជំងឺមួយចំនួន ដូចជាគ្រុនចាញ់ រឺក៏គ្រុនឈាម អាចនឹងរាលដាលដល់តំបន់ថ្មីៗផ្សេងទៀតនៅអាស៊ី និងអាហ្វ្រិក។
យោងតាមអង្គការសុខភាពពិភពលោក ការបំពុលបរិយាកាស បានធ្វើអោយមានមនុស្សស្លាប់មុនអាយុ រហូតដល់៧លាននាក់បន្ថែមទៀត ក្នុងមួយឆ្នាំ។ ដំណោះស្រាយបញ្ហាប្រែប្រួលអាកាសធាតុ គឺថា រដ្ឋាភិបាលគ្រប់ប្រទេសត្រូវយល់ស្របគ្នា កាត់បន្ថយឧស្ម័នផ្ទះកញ្ចក់។ ការកាត់បន្ថយឧស្ម័នផ្ទះកញ្ចក់នឹងធ្វើអោយការបំពុលបរិយាកាសថយចុះដូចគ្នា ដូច្នេះ ជំងឺបេះដូង រឺសរសៃឈាម រឺជំងឺផ្លូវដង្ហើមផ្សេងៗ ក៏អាចកាត់បន្ថយដូចគ្នាដែរ។ ការកាត់បន្ថយឧស្ម័នផ្ទះកញ្ចក់នឹងជួយស្រោចស្រង់អាយុជីវិតមនុស្ស២លាននាក់ ក្នុងមួយឆ្នាំៗ។
នៅថ្ងៃសុក្រនេះ កិច្ចប្រជុំក្រុងហ្សឺណែវ នឹងត្រូវសម្រេចអនុម័តអនុសាសន៍នានាដែលត្រូវអនុវត្តន៍ អោយបានមុនជំនួបកំពូលស្តីពីអាកាសធាតុ នៅក្រុងញូវយក ថ្ងៃ២៣កញ្ញា និងសម្រាប់សន្និសីទស្តីពីអាកាសធាតុនៅក្រុងប៉ារីស ឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ