លោកអូបាម៉ានឹងប្រកាសផែនការ ៣០០ពាន់លានដុល្លារ ដើម្បីកាត់បន្ថយចំនួនអ្នកអត់ការងារធ្វើ
នៅយប់ថ្ងៃព្រហស្បតិ៍ ៨ កញ្ញា ២០១១នេះ លោកអូបាម៉ានឹងប្រកាសអំពីផែនការកាត់បន្ថយចំនួនអ្នកអត់ការងារនៅអាមេរិក ដែលបច្ចុប្បន្នមានចំនួនរហូតដល់ទៅជាង ១៤លាននាក់។ បញ្ហាអ្នកអត់ការងារធ្វើ អាចជាចំណុចស្លាប់រស់របស់លោកអូបាម៉ា នៅក្នុងការបោះឆ្នោតប្រធានាធិបតី នៅឆ្នាំក្រោយ។ សំណួរដែលចោទនៅពេលនេះ គឺនៅត្រង់ថា តើផែនការរបស់លោកអូបាម៉ា ដែលត្រូវចំណាយលុយរហូតដល់ ៣០០ពាន់លានដុល្លារ អាចនឹងត្រូវឆ្លងកាត់ការអនុម័តពីសភាបានដែរឬទេ?
ចុះផ្សាយនៅថ្ងៃ៖
ស្តាប់ - ០១:៤៨
សុន្ទរកថានៅមុខសភាពេញអង្គ នៅយប់ថ្ងៃព្រហស្បតិ៍នេះ គឺជាចំណុចរបត់ដ៏សំខាន់មួយ របស់លោកអូបាម៉ា ដែលចង់ជាប់ឆ្នោតជាប្រធានាធិបតីមួយអាណត្តិទៀត។ នៅសល់តែ ១៤ខែទៀត ដល់ពេលបោះឆ្នោតប្រធានាធិបតី ប្រជាប្រិយភាពរបស់លោកអូបាម៉ា កំពុងតែធ្លាក់ចុះខ្លាំង ដោយសារតែបញ្ហាអ្នកអត់ការងារធ្វើ ដែលមានអត្រារហូតដល់ទៅ ៩,១%។ គោលដៅចម្បងរបស់លោកអូបាម៉ា គឺត្រូវធ្វើយ៉ាងណាកាត់បន្ថយអត្រាអ្នកអត់ការងារធ្វើឲ្យបាន នៅមុនពេលបោះឆ្នោត។
នៅយប់នេះ លោកអូបាម៉ានឹងប្រកាសដាក់ចេញនូវវិធានការមួយចំនួន រួមមាន ការបង្កើនការចំណាយទៅលើហេដ្ឋារចនាសម្ព័ន្ធ និងការកាត់បន្ថយពន្ធទៅលើប្រាក់បៀវត្សរ៍ ព្រមទាំងវិធានការផ្សេងទៀត ដើម្បីជំរុញឲ្យក្រុមហ៊ុន និងសហគ្រាសខ្នាតតូច បង្កើនការជ្រើសរើសបុគ្គលិក។ ជាសរុប ផែនការនេះនឹងត្រូវចំណាយលុយប្រមាណ ៣០០ពាន់លានដុល្លារ ក្នុងពេលដែល អាមេរិកកំពុងតែព្យាយាមកាត់បន្ថយឱនភាពថវិកាជាតិ។ កញ្ចប់ថវិកានេះ នឹងត្រូវឆ្លងកាត់ការអនុម័តពីសភាទាំងពីរ ក្នុងនោះ មានសភាអ្នកតំណាង ដែលកាន់កាប់ដោយគណបក្សសាធារណរដ្ឋ ដែលជាបក្សប្រឆាំង។
ដោយមើលឃើញអំពីភាពជាប់គាំង ក្នុងសំណុំរឿងប្រាក់បំណុលនាពេលកន្លងទៅថ្មីៗនេះ សំណួរចោទឡើងថា តើផែនការបង្កើតការងាររបស់លោកអូបាម៉ា នៅពេលនេះ អាចនឹងចេញពីសភារួចដែរឬទេ? អ្នកនាំពាក្យសេតវិមានបានឲ្យដឹងថា លោកអូបាម៉ានឹងខិតខំព្យាយាមស្វែងរកការគាំទ្រពីសមាជិកសភាមកពីគណបក្សទាំងពីរ ដើម្បីអនុម័តផែនការនេះ។ ក៏ប៉ុន្តែ មន្រ្តីគណបក្សប្រជាធិបតេយ្យបានបង្ហើបឲ្យដឹងថា ប្រសិនបើគណបក្សសាធារណរដ្ឋរារាំងផែនការរបស់លោកអូបាម៉ា នៅក្នុងយុទ្ធនាការឃោសនាបោះឆ្នោត គេនឹងទម្លាក់ការទទួលខុសត្រូវទាំងអស់នេះទៅលើគណបក្សសាធារណរដ្ឋ។ គណបក្សសាធារណរដ្ឋនឹងត្រូវឆ្លើយបកស្រាយចំពោះមុខពលរដ្ឋអាមេរិកថា តើហេតុអ្វីពួកគេយកប្រយោជន៍បក្សធ្វើជាធំ ដោយមិនគិតគូរអំពីស្ថានភាពសេដ្ឋកិច្ចជាតិ?
ជារួម យុទ្ធសាស្រ្តរបស់លោកអូបាម៉ា និងគណបក្សប្រជាធិបតេយ្យ គឺធ្វើយ៉ាងណាចាត់វិធានការកាត់បន្ថយអត្រាអ្នកអត់ការងារធ្វើឲ្យបានមុនពេលបោះឆ្នោត ហើយបើសិនជាមិនបានទេ ទម្លាក់កំហុសនេះទៅលើគណបក្សសាធារណរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ