ថៃ -

អត្ថបទចុះផ្សាយនៅថ្ងៃ សៅរ៍ 22 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 22 កញ្ញា 2012

ថៃ៖« អំពើភេរវកម្មសម្លាប់មនុស្សជាថ្មីនៅប៉ែកខាងត្បូងដែលសម្បូរពួកម៉ូស្លីមរស់នៅ »

REUTERS/Surapan Boonthanom

ដោយ គួច គន្ធារ៉ា

តំបន់ប៉ែកខាងត្បូងប្រទេសថៃដែលសម្បូរដោយអ្នកកាន់សាសនាអ៊ីស្លាមរស់នៅបានរងអំពើភេរវកម្មបំផ្ទុះរថយន្តជាថ្មីកាលពីថ្ងៃសុក្រ ទី២១ កញ្ញាម្សិលមិញ។ យោងតាមលទ្ធផលបណ្តោះអាសន្ន អំពើភេរវកម្មបានផ្តាច់ជីវិតមនុស្ស ៦នាក់ និងរងរបួស ៤១នាក់ ក្នុងនោះមានរបួសធ្ងន់ ១៩នាក់។ រថយន្តបានផ្ទុះនៅខាងក្នុងផ្សារមួយដែលកំពុងមានមនុស្សកកកុញច្រើនស្ថិតក្នុងខេត្តប៉ាតានី។ ម្យ៉ាងទៀត អំពើភេរវកម្មនោះបានកើតមានឡើង ចំពេលដែលកងទាហានថៃ និងក្រុមឧទ្ទាមមួយក្រុមកំពុងជួបចរចាគ្នា។

សេចក្តីរាយការណ៍របស់ គួច គន្ធារ៉ា

ស្តាប់ (01:54)

22/09/2012 by គួច គន្ធារ៉ា

អំពើភេរវកម្មជាថ្មីនេះបានកើតមានឡើង ១០ថ្ងៃ ក្រោយពីមានក្រុមសកម្មជនអ្នកទាមទារផ្តាច់ទឹកដីនិយមប្រមាណជា ១០០នាក់បានទម្លាក់អាវុធសុំចុះចូលជាមួយទាហានថៃ។ ការសុំចុះចូល បន្ទាប់ពីមានការចរចាគ្នាអស់រយៈពេលជាច្រើនខែរវាងក្រុមយោធាថៃ និងក្រុមឧទ្ទាមអ្នកកាន់សាសនាអ៊ីស្លាម។ អ្វីជាការកត់សម្គាល់ ការសុំចុះចូលរបស់ពួកឧទ្ទាមត្រូវបានធ្វើឡើង ដោយផ្អែកលើមូលដ្ឋាននៃការផ្តល់សម្បទានឲ្យគ្នា ទោវិញ ទៅមក៖ ក្រុមឧទ្ទាមទំាងនោះយល់ព្រមទម្លាក់អាវុធ និងទទួលបានការលើកលែងទោសមួយចំនួនពាក់ព័ន្ធនឹងបទឧក្រិដ្ឋដែលពួកគេបានប្រព្រឹត្តកន្លងមក។ ម្យ៉ាងទៀត កិច្ចចរចាក៏មិនបានផ្តោតលើសម្បទាននយោបាយទេ មានន័យថា អត់និយាយដល់រឿងការទាមទារស្វ័យភាពរបស់ខេត្តទំាង៣នៅប៉ែកខាងត្បូងដូចដែលពួកគេធ្លាប់បានទាមទារកន្លងមកទេ។ តែគេក៏នៅមិនទាន់អាចដឹងបានថា តើអ្វីទៅ ជាតួនាទីរបស់ក្រុមឧទ្ទាមទំាងនោះនៅក្នុងជួរកងទ័ពថៃ។

យ៉ាងណាក៏ដោយ អំពើហិង្សាជាថ្មីនៅថ្ងៃម្សិលមិញត្រូវបានគេមើលឃើញថា ជាការឆ្លើយតបយ៉ាងបង្ហូរឈាមមួយចំពោះពិធីសុំចុះចូលរបស់ក្រុមឧទ្ទាមដែលបានរៀបចំឡើងដោយទាហានថៃ និងដែលត្រូវបានទីក្រុងបាងកកចាត់ទុកជាសញ្ញាវិជ្ជមានមួយ។ តែបញ្ហានៅត្រង់ថា ស្នូលនៃជម្លោះនៅមិនទាន់បានដោះស្រាយទេ ព្រោះថា ចលនាបះបោររបស់ក្រុមសកម្មជនអ្នកទាមទារផ្តាច់ទឹកដីនិយមនៅបន្តយ៉ាងសកម្ម។ គួរជម្រាបជូនថា ចលនាបះបោរទាមទារផ្តាច់ទឹកដីនិយមមួយនេះគ្មានអ្នកដឹកនំាចេញមុខ និងរចនាសម្ព័ន្ធត្រឹមត្រូវទេ តែត្រូវបានរៀបចំឡើងជាក្រុមតូចៗមានគ្នាប្រមាណជា ១០នាក់។ ឃើញថា នេះពិតជាលំបាកខ្លំាងណាស់សម្រាប់រដ្ឋាភិបាលទីក្រុងបាងកក ក៏ដូចជាទាហានថៃក្នុងការបិទបញ្ចប់ទំាងស្រុងនូវចលនាទាមទារផ្តាច់ទឹកដីនិយមនៅតំបន់ប៉ែកខាងត្បូងមួយនេះ។ ចលនាដែលបានផ្តើមតំាងពីឆ្នំា ២០០៤ និងបានបណ្តាលឲ្យមានមនុស្សស្លាប់ប្រមាណជា
៥ ៣០០នាក់៕