សាលារាជធានីអំពាវនាវឲ្យគោរពច្បាប់ចរាចរណ៍ពេលបុណ្យចូលឆ្នាំខ្មែរ
សាលារាជធានីភ្នំពេញបានអំពាវនាវដល់ប្រជាពលរដ្ឋទាំងអស់ ឲ្យគោរពច្បាប់ចរាចរណ៍ និងមានការប្រុងប្រយ័ត្នខ្ពស់ចំពោះបញ្ហាអគ្គិភ័យ និងចៀសវាងលេងល្បែងស៊ីសងជាដើម ដើម្បីរក្សាសន្តិសុខ សណ្តាប់ធ្នាប់សាធារណៈ និងរបៀបរៀបរយបានល្អក្នុងរាជធានីភ្នំពេញ។ នេះបើយោងតាមសេចក្តីជូនដំណឹងរបស់សាលារាជធានីភ្នំពេញ កាលពីថ្ងៃពុធម្សិលមិញ។ មុននេះមួយថ្ងៃពោល គឺថ្ងៃទី ០៨ មេសា ក្រសួងមហាផ្ទៃក៏បានចេញសេចក្តីអំពាវនាវដល់ប្រជាពលរដ្ឋទាំងអស់ ឲ្យគោរពច្បាប់ចរាចរណ៍ឲ្យបានខ្ជាប់ខ្ជួនក្នុងឱកាសបុណ្យចូលឆ្នាំខែ្មរផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ខណៈដែលបុណ្យចូលឆ្នាំខ្មែរខិតជិតមកដល់នោះ សាលារាជធានីភ្នំពេញ បានចាប់ផ្តើមអំពាវនាវដល់ប្រជាពលរដ្ឋទាំងអស់ឲ្យគោរពច្បាប់គោរពចរាចរណ៍ និងមានការប្រុងប្រយ័ត្នខ្ពស់ក្នុងរយៈពេលបីថ្ងៃនេះ។ តាមរយៈសេចក្តីជូនដំណឹងដែលបានចេញកាលថ្ងៃទី ០៩ មេសា សាលារាជធានីភ្នំពេញ បានអំពាវនាវដល់ប្រជាពលរដ្ឋទាំងអស់ត្រូវគោរពច្បាប់ចរាចរណ៍ និងមិនត្រូវបើកបរក្នុងស្ថានភាពស្រវឹងដើម្បីចៀសវាងគ្រោះថ្នាក់ផ្សេងៗ។
បន្ថែមលើនេះ ប្រជាពលរដ្ឋត្រូវចូលរួមទប់ស្កាត់គ្រោះអគ្គិភ័យនានាដែលបណ្តាលមកពីភ្លើងចង្ក្រាន និងចរន្តអគ្គិសនីជាដើម។ សាលារាជធានីភ្នំពេញក៏បានអំពាវនាវឲ្យប្រជាពលរដ្ឋ ចូលរួមលេងល្បែងប្រជាប្រិយនានា ក៏ប៉ុន្តែចៀសវាងការលេងបាញ់ទឹក ជះទឹក លាបធ្យូង ឬ ប៉ាតម្សៅ។ ទន្ទឹមគ្នានេះ ការលេងល្បែងស៊ីសង អុចផាវ និងគ្រឿងផ្ទុះគ្រប់ប្រភេទក៏ត្រូវបានហាមឃាត់ជាដាច់ខាតផងដែរ។
យ៉ាងណាក៏ដោយ សាលារាជធានីភ្នំពេញបានព្រមានថា នឹងចាត់វិធានការតាមផ្លូវច្បាប់ចំពោះអ្នកដែលប្រព្រឹត្តមិនគប្បីដែលប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់សាធារណៈ។
គួររម្លឹកថា កាលពីថ្ងៃទី ០៨ មេសា ក្រសួងមហាផ្ទៃក៏បានអំពាវនាវដល់ប្រជាពលរដ្ឋធ្វើដំណើរទាំងផ្លូវគោក និងផ្លូវទឹក ត្រូវគោរពច្បាប់ចរាចរណ៍ឲ្យបានខ្ជាប់ខ្ជួនក្នុងឱកាសបុណ្យចូលខែ្មរខាងមុខនេះផងដែរ ដើម្បីចៀសវាងគ្រោះថ្នាក់ផ្សេងៗ។
ប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន ក៏បានអំពាវនាវដល់ប្រជាពលរដ្ឋឲ្យមានការប្រុងប្រយ័ត្នខ្ពស់ ចៀសវាងការលេងល្បែងមិនគប្បីនានា និងត្រូវគោរពច្បាប់ផងដែរ។ជាមួយគ្នានោះ លោកនាយករដ្ឋមន្ត្រីក៏បានអំពាវនាវដល់ក្រុមហ៊ុនផ្តល់សេវាផ្សេងៗ រួមទាំងសេវាដឹកជញ្ជូនផង កុំមានការតម្លើងថ្លៃសេវា ក្នុងរដូវបុណ្យចូលឆ្នាំខ្មែរនេះ។
សូមបញ្ជាក់ថា កាលពីអំឡុងឆ្នាំ ២០១៣កន្លងមក គ្រោះថ្នាក់ចរាចរណ៍បានបណ្តាលឲ្យមានមនុស្សស្លាប់ប្រមាណ ១៩០០ នាក់ រងរបួសធ្ងន់ស្រាលប្រមាណ ៥៣០០ នាក់ និង ធ្វើឲ្យខាតបង់ថវិកាជាតិប្រមាណ ៣២០ លានដុល្លារ។ ចំនួនអ្នកស្លាប់និងរបួសកើនឡើងយ៉ាងគំហុក នៅក្នុងពិធីបុណ្យធំៗដូចជាចូលឆ្នាំជាដើម ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ