ឧបទ្វីបកូរ៉េ -

អត្ថបទចុះផ្សាយនៅថ្ងៃ ចន្ទ 04 មិថុនា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 04 មិថុនា 2012

ព្យុងយ៉ាងគំរាមបាញ់កម្ទេចការិយាល័យផ្សព្វផ្សាយកូរ៉េខាងត្បូង

លោកគីម ជុងអ៊ុន មេដឹកនាំថ្មីរបស់កូរ៉េខាងជើងក្នុងដំណើរត្រួតពិនិត្យអគារស្នាក់នៅមួយដែល គេទើបសាងសង់រួចនៅទីក្រុងព្យុងយ៉ាង

REUTERS/KCNA

ដោយ ឈាង បុប្ផា

ក្រសួងការពារជាតិកូរ៉េខាងជើងបានគំរាម នៅថ្ងៃចន្ទទី ៤មិថុនា ថា ខ្លួននឹងបាញ់ឲ្យខ្ទេចការិយាល័យរបស់ប្រព័ន្ធផ្សព្វផ្សាយកូរ៉េខាងត្បូង ដែលមានទីតាំងក្នុងទីក្រុងសេអ៊ូល។ បើតាមរបបព្យុងយ៉ាង ប្រព័ន្ធផ្សព្វផ្សាយកូរ៉េខាងត្បូងបានសរសេររិះគន់ពិធីបុណ្យរំលឹកខួប សហជីពកុមារកូរ៉េ ដែលត្រូវបានរៀបចំឡើង កាលពីថ្ងៃ សៅរ៍កន្លងទៅ។

សេចក្តីរាយការណ៍របស់ឈាង បុប្ផា

ស្តាប់ (02:14)

04/06/2012 by ឈាង បុប្ផា

មានកុមារកូរ៉េខាងជើង ២ម៉ឺននាក់បានចូលរួមក្នុងពិធីបុណ្យរំលឹកខួបលើកទី៦៦នៃសហជីពកុមារកូរ៉េ ដែលបង្កើតឡើងដោយរបបកុម្មុយនិស្តកូរ៉េខាងជើង។ យោងតាមទីភ្នាក់ងារព័ត៌មានផ្លូវរដ្ឋកូរ៉េខាងជើង កុមារទាំងនោះបានសន្យាស្មោះស្ម័គ្រ និងបូជាជីវិតសម្រាប់តែមេដឹកនាំកូរ៉េខាងជើងបច្ចុប្បន្ន គឺលោកគីម ជុងអ៊ុន។ ប៉ុន្តែ ប្រព័ន្ធផ្សព្វផ្សាយកូរ៉េខាងត្បូង បានសរសេរចាត់ទុកព្រឹត្តិការណ៍នេះថា ជាឧបករណ៍ឃោសនាដែលរៀបចំឡើងដោយបក្សកុម្មុយនិស្តខាងជើង។ ក្រសួងការពារកូរ៉េខាងជើងបានចោទប្រកាន់កាសែត និងទូរទស្សន៍ថា បានបង្ខូច ឲ្យស្អុយឈ្មោះ សហជីពកុមារកូរ៉េ។ ក្នុងចំណោមទូរទស្សន៍ និងកាសែតកូរ៉េខាងត្បូង ទីក្រុងព្យុងយ៉ាងបានគំរាមសងសឹកទៅលើទូរទស្សន៍Dong A ខ្លាំងជាងគេ ព្រោះទូរទស្សន៍នេះបានប្រៀបធៀបសហជីពកុមារកូរ៉េ ទៅនឹងកុមារហ៊ីត្លែរ។

នៅក្នុងសេចក្តីប្រកាសព័ត៌មានដែលចុះផ្សាយដោយទីភ្នាក់ងារផ្លូវរដ្ឋ កាលពីថ្ងៃចន្ទនេះ កូរ៉េខាងជើងបានរាយឈ្មោះយ៉ាងលម្អិតកាសែត វិទ្យុ និងទូរទស្សន៍កូរ៉េខាងត្បូងដែល ខ្លួនមានគម្រោងវាយប្រហារ។ តាមក្រសួងការពារជាតិកូរ៉េខាងជើង កងអង្គភាពបានរៀបចំរួចហើយ មីស៊ីលដាក់តម្រង់ទិសទៅការិយាល័យប្រព័ន្ធផ្សព្វផ្សាយដែលស្ថិតនៅកណ្តាលក្រុងសេអ៊ូល។ ទីក្រុងព្យុងយ៉ាងនៅបានទម្លាក់កំហុសទៅលើលោកលី ម៉្យុងបាក់ ប្រធានាធិបតីកូរ៉េខាងត្បូង និងថា លោកជាអ្នកទទួលខុសត្រូវទាំងស្រុង នៅក្នុងករណីមានការបាញ់កម្ទេចទីតាំងកាសែត និងទូរទស្សន៍ នៅទីក្រុងសេអ៊ូល។

នេះមិនមែនជាលើកទីមួយទេ ដែលរបបព្យុងយ៉ាងបានគំរាមវាយប្រហារមកលើកូរ៉េខាងត្បូង។ កាលពីខែមេសាកន្លងទៅ កូរ៉េខាងជើងដែលចោទលោកប្រធានាធិបតីកូរ៉េខាងត្បូងថា បានបង្ខូចកេរ្តិ៍ឈ្មោះ ថ្នាក់ដឹកនាំខ្លួន ធ្លាប់បានគំរាមម្តងរួចហើយថា នឹងបាញ់កម្ទេចទីក្រុងសេអ៊ូលឲ្យទៅជាផេះ។

បើទោះជាកូរ៉េខាងជើងបានគំរាមត្រឹមពាក្យសំដី ដោយមិនទាន់បញ្ចេញសកម្មភាពជាក់ស្តែង ប៉ុន្តែ កូរ៉េខាងត្បូងតែងចាត់ទុកការគំរាមរបស់កូរ៉េខាងជើងថា ជាការគំរាមមួយដែលគេត្រូវយកចិត្តទុកដាក់ និងត្រៀមខ្លួនប្រុងប្រយ័ត្ន។ ការគំរាមលើកមុននោះ បានធ្វើឲ្យថ្នាក់ដឹកនាំ កូរ៉េខាងត្បូងចាត់វិធានបន្ទាន់ ដោយពង្រាយកម្លាំងប៉ូលិស នៅយាមតាមទីតាំងប្រព័ន្ធផ្សព្វផ្សាយ និងស្ថាប័នរដ្ឋសំខាន់។ រដ្ឋមន្រ្តីកូរ៉េខាងត្បូងទទួលបន្ទុកការរួបរួមកូរ៉េទាំងពីរវិញ បានអំពាវនាវនៅថ្ងៃនេះ ឲ្យកូរ៉េខាងជើងឈប់គំរាមកំហែងចង់បាញ់កម្ទេចប្រព័ន្ធផ្សព្វផ្សាយរបស់កូរ៉េខាងត្បូងតទៅទៀត ព្រោះនេះជាសញ្ញាបំផ្លិចបំផ្លាញលទ្ធិប្រជាធិបតេយ្យ៕