Delicious
Digg
Facebook
Twitter
Yahoo!
Technorati
កូរ៉េខាងជើង -
អត្ថបទចុះផ្សាយនៅថ្ងៃ ចន្ទ 30 កក្កដា 2012 -
ព័ត៌មានទើបកែប្រើលើកចុងក្រោយ ថ្ងៃ ចន្ទ 30 កក្កដា 2012
កូរ៉េខាងជើងបដិសេធព័ត៌មានស្តីពីគម្រោងធ្វើកំណែទម្រង់នយោបាយ
លោកគីម ជុងអ៊ុន ក្នុងអំឡុងសន្និបាតបក្ស កាលពីខែមេសា ២០១២
REUTERS/KCNA
កាលពីថ្ងៃអាទិត្យ ម្សិលមិញ កូរ៉េខាងជើងបានបដិសេធព័ត៌មានផ្សព្វផ្សាយដោយបណ្តាញព័ត៌មានកូរ៉េខាងត្បូង ដែលថា កូរ៉េខាងជើងគ្រោងធ្វើកំណែទម្រង់សំខាន់ៗមួយចំនួន។ មន្រ្តីជាន់ខ្ពស់កូរ៉េខាងជើងបានប្រាប់ទៅរដ្ឋាភិបាលកូរ៉េខាងត្បូងថា កុំស្រមើស្រមៃឲ្យសោះថា ក្រោមការដឹកនាំរបស់លោកគីម ជុងអ៊ុន កូរ៉េខាងជើងនឹងមានការផ្លាស់ប្តូរនយោបាយអ្វីណាមួយនោះ។
ការរំពឹងថានឹងមានកំណែទម្រង់ធំៗនៅកូរ៉េខាងជើងបានកើតមានឡើង នៅក្នុងមួយរយៈកាលចុងក្រោយនេះ ជាពិសេស នៅក្រោយពេលដែលគេឃើញមានការផ្លាស់ប្តូរមេទ័ពកំពូលៗ និងការបើកបង្ហាញពីជីវិតផ្ទាល់ខ្លួនរបស់លោកគីម ជុងអ៊ុន។
ថ្មីៗនេះ ប្រព័ន្ធផ្សព្វផ្សាយកូរ៉េខាងជើងបានប្រកាសឲ្យដឹងជាសាធារណៈថា ស្រ្តីអាថ៌កំបាំង ដែលគេតែងតែឃើញនៅក្បែរលោកគីម ជុងអ៊ុន គឺជាភរិយារបស់គាត់។ ការប្រកាសបង្ហាញជាសាធារណៈអំពីជីវិតអាពាហ៍ពិពាហ៍របស់ប្រមុខដឹកនាំកូរ៉េខាងជើងបែបនេះ គឺជារឿងដែលគេមិនធ្លាប់ឃើញមានទេ កាលពីក្នុងជំនាន់ឪពុក និងជីតារបស់លោកគីម ជុងអ៊ុន នៅកាន់អំណាច។ ដូច្នេះហើយបានជាធ្វើឲ្យគេគិតថា លោកគីម ជុងអ៊ុន ដែលទទួលការអប់រំនៅប្រទេសស្វ៊ីស គឺជាមេដឹកនាំជំនាន់ថ្មី មានគំនិតបើកចំហ ហើយមិនប្រកាន់គំនិតអភិរក្សនិយមដូចឪពុក និងជីតារបស់គាត់។
ម្យ៉ាងទៀត គេគិតថា ការផ្លាស់ប្តូរតំណែងមេទ័ពចាស់ៗសល់ពីសម័យមុន គឺត្រូវបានរៀបចំធ្វើឡើង ដើម្បីឲ្យលោកគីម ជុងអ៊ុន ពង្រឹងអំណាច ហើយឈានទៅរៀបចំធ្វើកំណែទម្រង់នយោបាយ។
ក៏ប៉ុន្តែ នៅថ្ងៃអាទិត្យម្សិលមិញនេះ មន្រ្តីជាន់ខ្ពស់រដ្ឋាភិបាលកូរ៉េខាងជើងបានប្រកាសថា ការរំពឹងអំពីការធ្វើកំណែទម្រង់នៅកូរ៉េខាងជើង គ្រាន់តែជាការស្រមើស្រមៃរបស់កូរ៉េខាងត្បូងតែប៉ុណ្ណោះ។ លោកគីម ជុងអ៊ុន នឹងនៅបន្តអនុវត្តនយោបាយរបស់ឪពុក និងជីតារបស់គាត់ គឺនយោបាយយកកងទ័ពជាធំ ដោយគ្មានផ្លាស់ប្តូរអ្វីនោះទេ។ អ្នកណាដែលរង់ចាំការផ្លាស់ប្តូរនយោបាយនៅកូរ៉េខាងជើង គឺដូចជារង់ចាំព្រះអាទិត្យរះពីទិសខាងលិចអ៊ីចឹងដែរ។
ក្នុងពេលជាមួយគ្នា គណៈកម្មការការពារជាតិកូរ៉េខាងជើងបានចេញសេចក្តីថ្លែងការណ៍មួយ ព្រមានកូរ៉េខាងត្បូង និងសហរដ្ឋអាមេរិក ជុំវិញការប៉ុនប៉ងបំផ្លាញរូបសំណាកលោកគីម អ៊ីលស៊ុង និងលោកគីម ជុងអ៊ីល នៅក្នុងទីក្រុងព្យុងយ៉ាង។ សេចក្តីថ្លែងការណ៍នេះបានព្រមានថា ទង្វើបែបនេះ គឺមានន័យស្មើនឹងការប្រកាសសង្រ្គាម ហើយថា កូរ៉េខាងជើងមានសមត្ថភាពគ្រប់គ្រាន់ ដើម្បីវាយតទល់នឹងសព្វាវុធទំនើបៗរបស់អាមេរិក។
គួររំឭកថា នៅក្នុងសន្និសីទសារព័ត៌មាន កាលពីដើមខែនេះ កូរ៉េខាងជើងបានបង្ហាញមុខមនុស្សម្នាក់ ដែលបានអះអាងថា ខ្លួនត្រូវបានទីភ្នាក់ងារចារកិច្ចកូរ៉េខាងត្បូងជួលឲ្យមកដាក់គ្រាប់បែកបំផ្លាញរូបសំណាក់អតីតប្រមុខដឹកនាំកូរ៉េខាងជើង៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ