អ៊ីរ៉ង់ -

អត្ថបទចុះផ្សាយនៅថ្ងៃ ព្រហស្បតិ៍ 30 សីហា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 30 សីហា 2012

ជំនួបកំពូលចលនាមិនចូលបក្សសម្ព័ន្ធគ្របដណ្តប់ដោយបញ្ហានុយក្លេអ៊ែរអ៊ីរ៉ង់ និងវិបត្តិស៊ីរី

ទីតាំងប្រជុំកំពូលរបស់ចលនាមិនចូលបក្សសម្ព័ន្ធ នៅអ៊ីរ៉ង់

AFP PHOTO

ដោយ សេង ឌីណា

ជំនួបកំពូលរបស់ចលនាមិនចូលបក្សសម្ព័ន្ធបានចាប់ផ្តើមបើកធ្វើហើយ នៅថ្ងៃព្រហស្បតិ៍នេះ នៅក្នុងរដ្ឋធានីតេហេរ៉ង់ ប្រទេសអ៊ីរ៉ង់។ ប្រមុខរដ្ឋ ប្រមុខរដ្ឋាភិបាល និងមន្រ្តីជាន់ខ្ពស់ តំណាងប្រទេសជាសមាជិកទាំង ១២០ប្រទេស មានវត្តមាននៅក្នុងជំនួបកំពូលនេះ។ ក៏ប៉ុន្តែ វត្តមានដែលគេចាប់អារម្មណ៍ខ្លាំងជាងគេ គឺប្រធានាធិបតីអេហ្ស៊ីប និងអគ្គលេខាធិការអ.ស.ប.។ គណៈប្រតិភូស៊ីរីវិញបានដើរចេញពីកិច្ចប្រជុំក្រោយពីអេហ្ស៊ីបរិះគន់រឿងបង្រ្កាបក្រុមប្រឆាំង។

សេចក្តីរាយការណ៍របស់ សេង ឌីណា

ស្តាប់ (02:53)

30/08/2012

នៅក្នុងចំណោមប្រទេសជាសមាជិកទាំង ១២០ របស់ចលនាមិនចូលបក្សសម្ព័ន្ធ មាន ២៩ប្រទេស ដែលមានតំណាងថ្នាក់ប្រមុខរដ្ឋ ឬប្រមុខរដ្ឋាភិបាល ទៅចូលរួមក្នុងជំនួបកំពូលរយៈពេលពីរថ្ងៃនេះ។ ក្នុងនោះ ក៏រួមមាននាយករដ្ឋមន្រ្តីកម្ពុជាផងដែរ។ ប្រទេសផ្សេងទៀត តំណាងដោយមន្រ្តីជាន់ខ្ពស់ថ្នាក់អនុប្រធានាធិបតី ឧបនាយករដ្ឋមន្រ្តី ឬរដ្ឋមន្រ្តីក្រសួងការបរទេស។

វត្តមានដែលគេនាំគ្នាផ្តោតអារម្មណ៍ខ្លាំងជាងគេ ក្នុងជំនួបកំពូលនេះ គឺវត្តមានរបស់លោកមហាមេដ ម័រស៊ី (Mohamed Morsi) ប្រធានាធិបតីអេហ្ស៊ីប និងលោកបាន គីមូន អគ្គលេខាធិការអ.ស.ប.។

លោកម័រស៊ី គឺជាប្រធានាធិបតីអេហ្ស៊ីបទីមួយ ដែលឈានជើងជាន់ដីអ៊ីរ៉ង់ ចាប់តាំងពីមានបដិវត្តន៍អ៊ីស្លាម នៅអ៊ីរ៉ង់ កាលពីឆ្នាំ១៩៧៩។ អ៊ីរ៉ង់ និងអេហ្ស៊ីបបានផ្តាច់ទំនាក់ទំនងការទូតជាមួយគ្នា ចាប់ពីឆ្នាំនោះមក ដោយសារតែអេហ្ស៊ីបបានទទួលស្គាល់រដ្ឋអ៊ីស្រាអែល និងបានចុះកិច្ចព្រមព្រៀងសន្តិភាពជាមួយអ៊ីស្រាអែល ព្រមទាំងមានទំនាក់ទំនងជាសម្ព័ន្ធមិត្តជាមួយសហរដ្ឋអាមេរិក។

ចំពោះវត្តមានរបស់លោកបាន គីមូនវិញ ត្រូវបានទទួលរងនូវការរិះគន់ពីសំណាក់សហរដ្ឋអាមេរិក និងអ៊ីស្រាអែល ដោយសារតែពួកគេយល់ថា វត្តមានរបស់លោកអគ្គលេខាធិការអ.ស.ប. គឺជាការលើកមុខលើកមាត់អ៊ីរ៉ង់ ដែលកំពុងរំលោភលើច្បាប់អន្តរជាតិ តាមរយៈការអភិវឌ្ឍកម្មវិធីនុយក្លេអ៊ែរយោធា និងការគំរាមកម្ទេចប្រទេសអ៊ីស្រាអែលចេញពីផែនទីពិភពលោក។

ជាការពិត គេសង្កេតឃើញថា អ៊ីរ៉ង់កំពុងតែឆ្លៀតឱកាសជាប្រធានផ្លាស់វេន និងជាម្ចាស់ផ្ទះ មកទាក់ទាញប្រទេសសមាជិកចលនាមិនចូលបក្សសម្ព័ន្ធឲ្យគាំទ្រកម្មវិធីនុយក្លេអ៊ែររបស់ខ្លួន និងឲ្យងើបឡើងប្រឆាំងនឹងប្រទេសលោកខាងលិច។ នៅក្នុងសុន្ទរកថាបើកជំនួបកំពូលចលនាមិនចូលបក្សសម្ព័ន្ធ នៅថ្ងៃនេះ លោក Ali Khamenei បានរិះគន់ធ្ងន់ៗ ទៅលើក្រុមប្រឹក្សាសន្តិសុខអ.ស.ប. ដោយចាត់ទុកថាជាស្ថាប័ន ដែលប្រើអំណាចផ្តាច់ការ ហើយស្ថិតក្រោមខ្សែញាក់របស់មហាអំណាចលោកខាងលិច។

ក៏ប៉ុន្តែ លោកបាន គីមូនវិញ បានឆ្លៀតយកពេល ដែលលោកមានវត្តមានក្នុងជំនួបកំពូលចលនាមិនចូលបក្សសម្ព័ន្ធនេះ ទាមទារឲ្យអ៊ីរ៉ង់ខិតខំប្រឹងប្រែងដោយសុទ្ធចិត្ត ដើម្បីដោះស្រាយសំណុំរឿងនុយក្លេអ៊ែរ។ ម្យ៉ាងទៀត លោកអគ្គលេខាធិការអ.ស.ប. ក៏បានថ្លែងរិះគន់យ៉ាងខ្លាំងៗផងដែរ ទៅលើអ៊ីរ៉ង់ ជុំវិញបញ្ហាសិទ្ធិមនុស្ស និង ជាពិសេស ការប្រើភាសាគំរាមកម្ទេចប្រទេសអ៊ីស្រាអែលចេញពីផែនទីពិភពលោក ដែលធ្វើឡើងជាច្រើនលើកច្រើនសា ដោយលោកប្រធានាធិបតីអ៊ីរ៉ង់ ម៉ះមូដ អះម៉ាឌីនចាត (Mahmoud Ahmadinejad)។ លោកបាន គីមូន បានថ្លែងថា ប្រទេសសមាជិកមួយរបស់អ.ស.ប. ដែលគំរាមប្រើកម្លាំងកម្ទេចប្រទេសជាសមាជិកមួយទៀត គឺវាផ្ទុយពីគោលការណ៍ជាមូលដ្ឋាន ដែលអ.ស.ប. តែងតែប្រកាន់យក។

ហេតុការណ៍ដែលគួរឲ្យកត់សម្គាល់មួយទៀត ក្នុងជំនួបកំពូលចលនាមិនចូលបក្សសម្ព័ន្ធនៅថ្ងៃនេះ គឺគណៈប្រតិភូរបស់រដ្ឋាភិបាលស៊ីរី ដែលជាសម្ព័ន្ធមិត្តយ៉ាងជិតស្និទ្ធរបស់អ៊ីរ៉ង់ បានដើរចេញពីកិច្ចប្រជុំ ក្រោយពីលោកប្រធានាធិបតីអេហ្ស៊ីបថ្លែងរិះគន់របបដឹកនាំស៊ីរី ជុំវិញការប្រើកម្លាំងបង្រ្កាបក្រុមប្រឆាំង៕