ចិន -

អត្ថបទចុះផ្សាយនៅថ្ងៃ ព្រហស្បតិ៍ 12 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 12 កក្កដា 2012

កំណើនសេដ្ឋកិច្ចចិនមានលំនឹងភាពឡើងវិញ

ទីក្រុងសៀងហៃ បង្ហាញឲ្យឃើញនូវអនុភាពសេដ្ឋកិច្ចចិន

©សេង ឌីណា

ដោយ សៀក សារិន

សន្ទុះកំណើនសេដ្ឋកិច្ចចិននឹងមានលំនឹងភាពឡើងវិញ ក្រោយពីបានស្គាល់ការថមថយនៅឆមាសទី១ឆ្នាំ២០១២។ នេះជាការប្រមាណរបស់អ្នកជំនាញការសេដ្ឋកិច្ចស្និទ្ធនឹងរដ្ឋាភិបាល ដែលបានថ្លែងប្រកាសមុនការផ្សព្វផ្សាយឲ្យដឹងពីតួលេខសំខាន់ៗរបស់សេដ្ឋកិច្ចចិន។

សេចក្តីរាយការណ៍របស់សៀក សារិន

ស្តាប់ (02:08)

12/07/2012 by សៀក សារិន

នៅត្រីមាសទីមួយនិងត្រីមាសទីពីរឆ្នាំ២០១២កន្លងទៅ សន្ទុះកំណើនសេដ្ឋកិច្ចចិនបានស្គាល់ការថយស្រុតចុះ ហើយនៅត្រីមាសទីបីនិងត្រីមាសទីបួន សន្ទុះកំណើនសេដ្ឋកិច្ចចិននឹងចាប់មានលំនឹងភាពឡើងវិញ”។ នេះជាការថ្លែងឲ្យដឹងនាឱកាសសន្និសីទកាសែតដោយលោក Yu Bin អគ្គនាយកដ្ឋានម៉ាក្រូសេដ្ឋកិច្ចនៃមជ្ឈមណ្ឌលស្រាវជ្រាវអភិវឌ្ឍន៍។

លោក Yu Bin បានថ្លែងឲ្យដឹងទៀតថា “នៅត្រីមាសទីមួយឆ្នាំ២០១២ គេសង្ឃឹមថា អត្រាកំណើនសេដ្ឋកិច្ចអាចមានប្រមាណ៨%”។ ហើយនៅទីបំផុត អត្រាកំណើនសេដ្ឋកិច្ចចិននៅត្រីមាសទី១ឆ្នាំ២០១២មាន៨,១%ទល់នឹង៩,២%នៅត្រីមាសទី១ឆ្នាំ២០១១ ហើយនិង១០,៤%នៅត្រីមាសទី១ឆ្នាំ២០១០។

គួរកត់សម្គាល់ថា តួលេខជាផ្លូវការនៃកំណើនសេដ្ឋកិច្ចចិននៅត្រីមាសទី២ឆ្នាំ២០១២នឹងត្រូវគេប្រកាសឲ្យដឹងនៅថ្ងៃសុក្រខាងមុខនេះ។ ហើយសន្ទុះកំណើនសេដ្ឋកិច្ចចិនដែលបានធ្លាក់ស្រុតចុះក៏ដោយហេតុតែកំណើនវិនិយោគបានស្រុតចុះ ពីព្រោះតែការនាំចេញជួបនឹងបញ្ហាលំបាក បង្កឡើងដោយវិបត្តិសេដ្ឋកិច្ចនៅអឺរ៉ុប។

ទោះបីជាការនាំចេញនិងការនាំចូលរបស់ប្រទេសចិនស្គាល់ការថយចុះក៏ដោយ ក៏សំណល់ផលពាណិជ្ជកម្មចិននៅតែមានកម្រិតខ្ពស់ ពោលគឺបានកើនឡើងដល់៦៨,៩២ពាន់លានដុលា្លរនៅឆមាសទី១ឆ្នាំ២០១២ បានសេចក្តីថាកើនឡើងបាន៥៦,៤%បើប្រៀបផ្ទឹមទៅនឹងរយៈកាលដដែលនៅឆ្នាំ២០១១។

មូលហេតុដែលនាំឲ្យសន្ទុះកំណើនសេដ្ឋកិច្ចចិនធ្លាក់ចុះ គឺបណ្តាលមកពីការបោះទុនធ្វើវិនិយោគនៅក្នុងប្រទេសចិនបានស្គាល់ការធ្លាក់ស្រុតចុះខ្លាំង។

ចំណែកឯការបោះទុនធ្វើវិនិយោគនៅក្នុងវិស័យហេដ្ឋារចនាសម្ព័ន្ធបានស្គាល់ការស្ទុះកើនឡើងយ៉ាងខ្លាំងក៏ពីព្រោះតែមានវិបត្តិហិរញ្ញវត្ថុនៅឆ្នាំ២០០៨ ហើយក៏ដោយសារតែមានផែនការជួយជំរុញរបស់រដ្ឋាភិបាលចិន។ លោកនាយករដ្ឋមន្ត្រីចិន វិន ជាប៉ាវ បានថ្លែងឲ្យដឹងនៅសប្តាហ៍នេះថា “ធ្វើឲ្យកំណើនសេដ្ឋកិច្ចចិនមានលំនឹងភាពនៅពេលនេះគឺជាកាតព្វកិច្ចមួយដ៏ចាំបាច់បន្ទាន់សម្រាប់ប្រទេសចិន”៕