ស៊ីរី -

អត្ថបទចុះផ្សាយនៅថ្ងៃ សុក្រ 22 មិថុនា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 22 មិថុនា 2012

អ្នកបើកយន្តហោះចម្បាំងស៊ីរីលើកដំបូងបង្អស់រត់ចោលជួរកងទ័ព

បាតុកម្មប្រឆាំងរបបស៊ីរី

RFI

ដោយ នុយ ប៊ែរណាដែត

អ្នកបើកយន្តហោះចម្បាំងធុនMig-21នៃប្រទេសស៊ីរីម្នាក់ បានបើកយន្តហោះភៀសខ្លួនចូលទៅប្រទេស Jordanieនៅថ្ងៃព្រហស្បតិ៍ម្សិលមិញ។ គឺជាលើកដំបូងបង្អស់ដែលអ្នកបើកយន្តហោះស៊ីរីមួយរូប បានរត់ចោលជួរកងទ័ពបែបនេះ ចាប់តាំងពីកើតមានចលនាបះបោរប្រជាជនអស់រយៈពេល១៥ខែកន្លងមកនៅក្នុងប្រទស។ ចលនាបដិវត្តន៍របស់ប្រជាជនស៊ីរី ត្រូវបានរបបលោក អាសាតវាយបង្ក្រាបយ៉ាងកាចសាហាវឥតស្រាកស្រាន្ត ជាហេតុបណ្តាលឲ្យមនុស្សស្លាប់អស់យ៉ាងតិច១ម៉ឹន៥ពាន់នាក់។

សេចក្តីរាយការណ៍របស់ នុយ ប៊ែរណាដែត

ស្តាប់ (02:38)

22/06/2012

គឹជាលើកដំបូងបង្អស់ចាប់តាំងពីមានការបះបោរចលនាបដិវត្តន៍ប្រជាជនស៊ីរីនៅថ្ងៃទី១៥មីនា២០១១មក អ្នកបើកយន្តហោះចម្បាំងស៊ីរីម្នាក់ បានរត់ចោលជួរកងទ័ពនៅថ្ងៃព្រហស្បតិ៍២១មិថុនាម្សិលមិញ។ លោកវរសេនីយឯក Hassan Merhi al-hamadé ដែលបើកយន្តហោះចម្បាំងធុន Mig-21ផលិតដោយរុស្ស៊ី បានបើកភៀសខ្លួនចូលក្នុងទឹកដី Jordanie ដើម្បីសុំចុះចតនៅលើមូលដ្ឋានកងទ័ពអាកាស Jordanie ។

ព្រឹត្តិការណ៍នេះ បានកើតមាននៅខណៈដែលកងទ័ពស៊ីរី កំពុងបន្តការវាយបង្ក្រាបយ៉ាងខ្លាំងឡើងវិញកាលពីម្សិលមិញ ។ កងទ័ពស៊ីរី បានបាញ់ផ្លោងគ្រាប់កាំភ្លើងធំទៅលើតំបន់បះបោរ ដូចជានៅHoms(ភាគកណ្តាលប្រទេស)និងDeraa (ភាគខាងត្បូង)ប្រទេសស៊ីរី។

យោងតាមអង្គការឃ្លាំមើលសិទ្ធិមនុស្សនៅស៊ីរិ OSDH ការវាយបង្ក្រាបនិងការវាយប្រយុទ្ធគ្នារវាងកងទ័ពរដ្ឋាភិបាលនិងទាហានរត់ចោលជួរ បានបណ្តាលឲ្យស្លាប់មនុស្ស ជិត១៧០នាក់ម្សិលមិញ។

អ្នកបើកយន្តហោះស៊ីរី បានសុំសិទ្ធិជ្រកកោននយោបាយនៅក្នុងរាជាណាចក្រ Jordanie និងបានទទួលយល់ព្រមភា្លមពីសំណាក់អាជ្ញាធរJordanie។ នៅស៊ីរីវិញ រដ្ឋមន្ត្រីការពារជាតិ បានប្រកាសចាត់ទុកលោកវរសេនីយឯក Hassan Merhi al-hamadé ថាជាអ្នករត់ចោលជួរនិងក្បត់ជាតិ។ រដ្ឋមន្ត្រីការពារជាតិស៊ីរី ថែមទាំងបានសន្យាដែរថា លោកវរសេនីយឯក Hassan Merhi al-hamadé នឹងត្រូវទទួលទណ្ឌកម្មដោយអាស្រ័យទៅលើវិធានផ្ទៃក្នុងនិងបានបញ្ជាក់ផងដែរថាស៊ីរី បានទាក់ទងជាមួយប្រទេស Jordanie ហើយដើម្បីទាមទារយន្តហោះធុន Mig-21 យកមកវិញ។

ការគេចខ្លួនរបស់កងទ័ពជើងអាកាសស៊ីរីនេះ ត្រូវបានសហរដ្ឋអាមេរិកអបអរសាទរនិងសង្ឃឹមថានឹងមានអ្នកបើកយន្តហោះដទៃទៀតយកគំរូតាមនិងបោះបង់ចោលរបបលោក Assad ។ ពីព្រោះកងទ័ពស៊ីរី ត្រូវបានអ.ស.ប.និងបណ្តាប្រទេសលោកខាងលិច ក៏ព្រមទាំងអង្គការក្រៅរដ្ឋាភិបាលអន្តរជាតិ ចោទប្រកាន់ពីបទ ឧក្រឹដ្ឋកម្មប្រឆាំងមនុស្សជាតិ។

ចំណែក ឯកអគ្គរដ្ឋទូតអាមេរិកនៅស៊ីរី លោក Robert Ford បានចុះផ្សាយនៅតាមទំព័របណ្តាញសង្គម Facebookរបស់ខ្លួននូវលិខិតចំហមួយទៅកាន់ទាហានស៊ីរីទាំងអស់ដោយអំពាវនាវសុំឲ្យឈប់គាំទ្ររបបលោកអាសាតតទៅទៀតនិងបានគូសបញ្ជាក់ថា អ្នកប្រព្រឹត្តអំពើសាហាវយង់ឃ្នងនឹងត្រូវចាប់ខ្លួននិងត្រូវយកទៅកាត់ទោសដែរ៕